ಟೋಕಿಯೊ: ಟೋಕಿಯೊ ಒಲಿಂಪಿಕ್ಸ್ ಕ್ರೀಡಾಕೂಟದಲ್ಲಿ ಭಾರತೀಯ ಮಹಿಳಾ ಹಾಕಿ ತಂಡವು ಗ್ರೇಟ್ ಬ್ರಿಟನ್ ವಿರುದ್ಧ ಹೋರಾಡಿ ಪರಾಭವಗೊಂಡಿದ್ದು ಕಂಚಿನ ಪದಕ ಗೆಲ್ಲುವಲ್ಲಿ ವಿಫಲವಾಗಿದೆ.
ಮೊದಲಿಗೆ ಎರಡು ಗೋಲ್ಗಳನ್ನು ಗ್ರೇಟ್ ಬ್ರಿಟನ್ ತಂಡ ದಾಖಲಿಸಿದಾಗ ನಿರಾಸೆಗೊಳಗಾಗಿದ್ದ ಭಾರತೀಯ ವನಿತೆಯರ ತಂಡ ಮಿಂಚಿನ ವೇಗದಲ್ಲಿ ಮೂರು ಗೋಲುಗಳನ್ನು ದಾಖಲಿಸಿ ಪದಕದ ಭರವಸೆ ಸೃಷ್ಟಿಸಿತ್ತು. ಆದರೆ ಪಂದ್ಯದ ಅಂತ್ಯಕ್ಕೆ 4-3 ಗೋಲುಗಳ ಅಂತರದಿಂದ ಭಾರತೀಯ ವನಿತೆಯರ ತಂಡ ಸೋಲನ್ನಪ್ಪಿದೆ.
ಗುರುವಾರವಷ್ಟೇ ಸೆಮಿಫೈನಲ್‌ನಲ್ಲಿ ಅರ್ಜೆಂಟೀನಾ ವಿರುದ್ಧ 1-2 ಗೋಲುಗಳ ಅಂತರದ ಸೋಲು ಅನುಭವಿಸಿದ್ದ ಹಾಕಿ ತಂಡ ಫೈನಲ್‌ಗೆ ಪ್ರವೇಶಿಸುವಲ್ಲಿ ವಿಫಲವಾಗಿತ್ತು. ಈಗ ಕಂಚಿನ ಪದಕದ ಕಳೆದುಕೊಂಡಿದ್ದು, ಭಾರತೀಯ ಕ್ರೀಡಾಭಿಮಾನಿಗಳಿಗೆ ನಿರಾಸೆಯಾಗಿದೆ.
ಈ ಹಿಂದೆ 1980ರಲ್ಲಿ ನಡೆದ ಮಾಸ್ಕೋ ಒಲಿಂಪಿಕ್ಸ್ನಲ್ಲಿ ಭಾರತ ಮಹಿಳಾ ಹಾಕಿ ತಂಡವು ಆರು ತಂಡಗಳ ಪೈಕಿ ನಾಲ್ಕನೇ ಸ್ಥಾನ ಪಡೆದಿತ್ತು. ಭಾರತದ ಮಹಿಳಾ ಹಾಕಿ ಇತಿಹಾಸದಲ್ಲಿ ಇದೇ ಅತಿ ದೊಡ್ಡ ಸಾಧನೆಯಾಗಿದ್ದು, ಟೋಕಿಯೋ ಒಲಿಂಪಿಕ್ಸ್ನಲ್ಲಿ ಸೆಮಿಫೈನಲ್ ಪ್ರವೇಶಿಸಿದ್ದು, ದೊಡ್ಡ ಸಾಧನೆಯಾಗಿದೆ.