ಬೆಂಗಳೂರು: ಅರ್ಜುನ್ ದೇಶ್ವಾಲ್ ಮತ್ತು ದೀಪ್ ನಿವಾಸ್ ಹೂಡ ಅವರ ಅದ್ಭುತ ಪ್ರದರ್ಶನದ ನೆರವಿನಿಂದ ಜೈಪುರ ಪಿಂಕ್ ಪ್ಯಾಂಥರ್ಸ್ 32-29ರ ಅಂತರದಿಂದ ಯುಪಿ ಯೋದ ತಂಡವನ್ನು ಮಣಿಸಿದರೆ, ಯು ಮುಂಬಾ ಮತ್ತು ತಮಿಳ್ ತಲೈವಾಸ್ ನಡುವಿನ ಪಂದ್ಯ ರೋಚಕ ಟೈನಲ್ಲಿ ಅಂತ್ಯವಾಗಿದೆ.
ಪ್ರೋಕಬಡ್ಡಿ ಲೀಗ್ನ 16ನೇ ಪಂದ್ಯದಲ್ಲಿ ಜೈಪುರ ತಂಡ ಆರಂಭದಿಂದಲೇ ಮುನ್ನಡೆ ಸಾಧಿಸಿಕೊಂಡು ಸಾಗಿತು. ಮೊದಲಾರ್ಧದ ವೇಳೆ ಜೈಪುರ 19-12ರಲ್ಲಿ ಮುನ್ನಡೆ ಸಾಧಿಸಿತ್ತು. ಆದರೆ, ದ್ವಿತೀಯಾರ್ಧದಲ್ಲಿ ಯುಪಿ ಯೋದ ಚಾಣಾಕ್ಷತನದಿಂದ ಆಡಿತು. ಒಂದೊಂದೇ ಅಂಕವನ್ನು ಪಡೆಯುತ್ತ ಹಿನ್ನಡೆ ತಗ್ಗಿಸುತ್ತಿತ್ತು. ಆದರೆ, ನಿರ್ಣಾಯಕವಾಗಿ ಕೊನೆಯ ರೈಡ್ನಲ್ಲಿ ಜೈಪುರ ತಂಡ ನಾಯಕ 2 ಅಂಕ ಪಡೆದು ಜಯಕ್ಕೆ ಕಾರಣರಾದರು.
ಜೈಪುರದ ಪರ ಅರ್ಜುನ್ ದೇಶ್ವಾಲ್ 11, ದೀಪಕ್ ನಿವಾಸ್ ಹೂಡ 9 ರೈಡಿಂಗ್ ಅಂಕ ಪಡೆದರೆ, ಡಿಫೆಂಡರ್ ನಿತಿನ್ 4 ಅಂಕ ಪಡೆದರು. ಯುಪಿ ಪರ ಸುರೇಂದರ್ ಗಿಲ್ 10 , ರೋಹಿತ್ ತೋಮರ್ 7 ಅಂತ ಪಡೆದು ಮಿಂಚಿದರು.
ಇದಕ್ಕೂ ಮುನ್ನ ನಡೆದಯು ಮುಂಬಾ ಮತ್ತು ತಮಿಳ್ ತಲೈವಾಸ್ ನಡುವಿನ ಪಂದ್ಯದ ಟೈನಲ್ಲಿ ಅಂತ್ಯವಾಯಿತು. ಮುಂಬೈ ಪರ ವಿ. ಅಜಿತ್ ಕುಮಾರ್ 15 ಅಂಕ ಪಡೆದರೆ ಡಿಫೆಂಡರ್ಗಳಾದ ರಾಹುಲ್ ಸೇತ್ಪತಿ ಮತ್ತು ರಿಂಕು ತಲಾ 22 ಅಂಕ ಪಡೆದರು. ತಲೈವಾಸ್ ಪರ ಮಂಜೀತ್ 8, ಅತುಲ್ 7, ಡಿಫೆಂಡರ್ಗಳಾದ ಸುರ್ಜೀತ್ ಸಿಂಗ್ ಮತ್ತು ಸಾಹಿಲ್ ಸಿಂಗ್ ತಲಾ 3 ಅಂಕ ಪಡೆದು ರೋಚಕ ಟೈ ಆಗಲು ಪ್ರಮುಖ ಪಾತ್ರವಹಿಸಿದರು.
ಇದನ್ನೂ ಓದಿ:U19 ಏಷ್ಯಾಕಪ್: ಅಫ್ಘಾನಿಸ್ತಾನಕ್ಕೆ ಸೋಲುಣಿಸಿ ಸೆಮಿಫೈನಲ್ ಪ್ರವೇಶಿಸಿದ ಭಾರತ ತಂಡ