ಮುಂಬೈ: ಪ್ಲೇ-ಆಫ್ ದೃಷ್ಟಿಯಿಂದ ಸಿಎಸ್ಕೆ ವಿರುದ್ಧ ನಮಗೆ ಸಿಕ್ಕಿರುವ ಅತ್ಯಮೂಲ್ಯ ಗೆಲುವಿದು ಎಂದು ಆರ್ಸಿಬಿ ವೇಗದ ಬೌಲರ್ ಜೋಶ್ ಹೇಜಲ್ವುಡ್ ಅಭಿಪ್ರಾಯಪಟ್ಟರು. ಬುಧವಾರ ನಡೆದ ಪಂದ್ಯದಲ್ಲಿ ಆರ್ಸಿಬಿ ಮೊದಲು ಬ್ಯಾಟ್ ಮಾಡಿ 173 ರನ್ಗಳಿಸಿತ್ತು. ಲೊಮ್ರೋರ್ 42, ಡುಪ್ಲೆಸಿಸ್ 38 ಮತ್ತು ದಿನೇಶ್ ಕಾರ್ತಿಕ್ ಅಜೇಯ 26 ರನ್ಗಳಿಸಿದ್ದರು. 174 ರನ್ಗಳ ಗುರಿ ಬೆನ್ನಟ್ಟಿದ ಸಿಎಸ್ಕೆ ಉತ್ತಮ ಆರಂಭದ ಹೊರತಾಗಿಯೂ 13 ರನ್ಗಳಿಂದ ಸೋಲುಂಡಿತು. ಇದೇ ವೇಳೆ, ಸತತ 3 ಸೋಲುಗಳ ನಂತರ ಆರ್ಸಿಬಿ ನಿರ್ಣಾಯಕ ಪಂದ್ಯದಲ್ಲಿ ಗೆಲುವು ಪಡೆದು ಅಂಕಪಟ್ಟಿಯಲ್ಲಿ ಮತ್ತೆ ಟಾಪ್ 4ಕ್ಕೆ ಪ್ರವೇಶಿಸಿತು.
"ಭಾಗಶಃ ಇಲ್ಲಿಯವರೆಗೆ ಟೂರ್ನಮೆಂಟ್ನಲ್ಲೇ ನಮಗೆ ಸಿಕ್ಕಂತಹ ಗೆಲುವುಗಳಲ್ಲಿ ಇದು ಪ್ರಮುಖವಾದದ್ದು. ಪ್ಲೇ-ಆಫ್ ಪ್ರವೇಶಿಸಲು ನಾವು ಎಲ್ಲಾ ಪಂದ್ಯಗಳನ್ನು ಗೆಲ್ಲಬೇಕಾದ ಹಂತದಲ್ಲಿದ್ದೇವೆ. ಈ ನಿಟ್ಟಿನಲ್ಲಿ ಇದು ನಮ್ಮ ಮೊದಲ ಹೆಜ್ಜೆ" ಎಂದು ಹೇಜಲ್ವುಡ್ ಹೇಳಿದರು.