ಬರ್ಮಿಂಗ್ಯಾಮ್:ಇಂಗ್ಲೆಂಡ್ ವಿರುದ್ಧ ಉತ್ತಮ ಬೌಲಿಂಗ್ ಮಾಡಿದ ಟೀಂ ಇಂಡಿಯಾ ವೇಗಿ ಮೊಹಮದ್ ಶಮಿ ವಿಶ್ವಕಪ್ ಟೂರ್ನಿಯಲ್ಲಿ ದಾಖಲೆಗಳನ್ನು ಸರಿಗಟ್ಟಿದ ಶ್ರೇಯಕ್ಕೆ ಪಾತ್ರರಾಗಿದ್ದಾರೆ.
ಆಂಗ್ಲರ 337 ರನ್ಗಳ ಬೃಹತ್ ಮೊತ್ತದ ನಡುವೆಯೂ ಉತ್ತಮ ಬೌಲಿಂಗ್ ಪ್ರದರ್ಶಿಸಿದ ಶಮಿ 69 ರನ್ಗಳಿಗೆ 5 ವಿಕೆಟ್ ಕಬಳಿಸಿದರು. ಜಾನಿ ಬೇರ್ಸ್ಟೋವ್, ಜೋ ರೂಟ್, ಇಯಾನ್ ಮಾರ್ಗನ್, ಜೋಸ್ ಬಟ್ಲರ್ ಮತ್ತು ಕ್ರಿಸ್ ವೋಕ್ಸ್ ಅವರನ್ನು ಔಟ್ ಮಾಡಿದರು. ಈ ಮೂಲಕ ವಿಶ್ವಕಪ್ ಟೂರ್ನಿಯಲ್ಲಿ ಚೊಚ್ಚಲ ಬಾರಿಗೆ 5 ವಿಕೆಟ್ ಕಿತ್ತ ಸಾಧನೆಗೆ ಪಾತ್ರರಾದರು.
ಅಲ್ಲದೆ ವಿಶ್ವಕಪ್ನಲ್ಲಿ 5 ವಿಕೆಟ್ ಪಡೆದ ಕೆಲ ಭಾರತೀಯ ಸಾಧಕರ ಪಟ್ಟಿಗೆ ಶಮಿ ಸೇರ್ಪಡೆಯಾದರು. ಈ ಹಿಂದೆ 1983ರಲ್ಲಿ ಕಪಿಲ್ ದೇವ್, 1999ರಲ್ಲಿ ರಾಬಿನ್ ಸಿಂಗ್ ಹಾಗೂ ವೆಂಕಟೇಶ್ ಪ್ರಸಾದ್, 2003ರಲ್ಲಿ ಆಶಿಶ್ ನೆಹ್ರಾ, 2011ರಲ್ಲಿ ಯುವರಾಜ್ ಸಿಂಗ್ ಈ ಸಾಧನೆ ಗೈದಿದ್ದರು. 5 ವಿಕೆಟ್ ಪಡೆದ 6ನೇ ಬೌಲರ್ ಎಂಬ ದಾಖಲೆ ಬರೆದರು.
ಹಾಗೆಯೇ ನರೇಂದ್ರ ಹಿರ್ವಾನಿ ಬಳಿಕ ವಿಶ್ವಕಪ್ನಲ್ಲಿ ಸತತ ಮೂರು ಪಂದ್ಯಗಳಲ್ಲಿ 4 ವಿಕೆಟ್ ಪಡೆದ ಹೆಗ್ಗಳಿಕೆಯೂ ಶಮಿ ಪಾಲಾಯಿತು. ಅಲ್ಲದೆ ವಿಶ್ವಕಪ್ನಲ್ಲಿ ಪಾಕ್ನ ಶಾಹಿದ್ ಅಫ್ರಿದಿ ಬಳಿಕ ಈ ಸಾಧನೆ ಮಾಡಿದ ಶ್ರೇಯ ಶಮಿಗೆ ಸಂದಿದೆ. ಇನ್ನು ವಿಶ್ವಕಪ್ನ ಮೂರು ಪಂದ್ಯಗಳಿಂದ ಅವರು 13 ವಿಕೆಟ್ ಉರುಳಿಸಿದ್ದಾರೆ.