11ನೇ ಓವರ್​ನಲ್ಲೇ ಸಿರಾಜ್​ ಬದಲು ಅಶ್ವಿನ್​ಗೆ ಚೆಂಡು ನೀಡಿದ್ದೇಕೆ? ಬುಮ್ರಾ ಕೊಟ್ಟ ವಿವರಣೆ ಹೀಗಿದೆ!

ಪಿಚ್​ನಲ್ಲಿ ತೇವಾಂಶವಿದ್ದಿದ್ದರಿಂದ ಅಶ್ವಿನ್​ ಹೆಚ್ಚು ತಿರುವುಗಳನ್ನು ಪಡೆದರು ಎಂದು ಬುಮ್ರಾ ಹೇಳಿದ್ದಾರೆ. ಅಶ್ವಿನ್ ಈ ಪಂದ್ಯದಲ್ಲಿ ಮ್ಯಾಥ್ಯೂ ವೇಡ್​, ಸ್ಟಿವ್ ಸ್ಮಿತ್ ಮತ್ತು ಟಿಮ್ ಪೇನ್​ ವಿಕೆಟ್​ ಪಡೆದರು. ​

ಮೆಲ್ಬೋರ್ನ್​: ಆಸ್ಟ್ರೇಲಿಯಾ ವಿರುದ್ಧದ 2ನೇ ಟೆಸ್ಟ್​ನಲ್ಲಿ ವೇಗಿ ಮೊಹಮ್ಮದ್​ ಸಿರಾಜ್​ಗಿಂತಲೂ ಮೊದಲೂ ಸ್ಪಿನ್ನರ್​ ರವಿಚಂದ್ರನ್​ ಅಶ್ವಿನ್​​ರನ್ನು ಏಕೆ ಕಣಕ್ಕಿಳಿಸಲಾಯಿತು ಎನ್ನುವುದನ್ನು ವೇಗಿ ಬುಮ್ರಾ ಬಹಿರಂಗಗೊಳಿಸಿದ್ದಾರೆ.

ಮೊದಲ ಸ್ಪೆಲ್​ನಲ್ಲಿ ಬುಮ್ರಾ ಮತ್ತು ಉಮೇಶ್​ ಯಾದವ್​ ತಲಾ 5 ಓವರ್​ ಎಸೆದಿದ್ದರು. ಆದರೆ 11ನೇ ಓವರ್​ನಲ್ಲೇ ರಹಾನೆ, ಅಶ್ವಿನ್​ ಕೈಗೆ ಚೆಂಡನ್ನು ನೀಡಿದ್ದು ಎಲ್ಲರಿಗೂ ಆಶ್ಚರ್ಯವನ್ನುಂಟು ಮಾಡಿತ್ತು. ಈ ಕುರಿತು ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಬುಮ್ರಾ, ಪಿಚ್​ನಲ್ಲಿ ತೇವಾಂಶ ಇದ್ದಿದ್ದರಿಂದ ಅಶ್ವಿನ್​ರನ್ನು ಬೇಗ ಬೌಲಿಂಗ್​ ಮಾಡಲು ಅವಕಾಶ ಕೊಡಲಾಯಿತು ಎಂದು ತಿಳಿಸಿದ್ದಾರೆ.

"ನಾವು ಬೆಳಗ್ಗೆ ಬೌಲಿಂಗ್ ಮಾಡುವಾಗ ಪಿಚ್​ನಲ್ಲಿ​ ಸ್ವಲ್ಪ ತೇವಾಂಶವಿತ್ತು. ನೀವು ನೋಡಿದಂತೆ ಅಶ್ವಿನ್ ಮತ್ತು ಜಡ್ಡು (ರವೀಂದ್ರ ಜಡೇಜಾ) ಪಿಚ್​ನಲ್ಲಿ ಸ್ವಲ್ಪ ಸ್ಪಿನ್ ಮಾಡಿದ್ದರು. ನಾವು ತೇವಾಂಶವನ್ನು ಹೆಚ್ಚು ಬಳಸಿಕೊಳ್ಳಲು ಬಯಸಿದ್ದರಿಂದ ಆರಂಭದಲ್ಲೇ ಸ್ಪಿನ್ನರ್‌ಗಳನ್ನು ಕರೆತರುವ ತಂತ್ರ ಅನುಸರಿಸಿದೆವು. ಜೊತೆಗೆ ಅವರು ಉತ್ತಮ ಬೌನ್ಸ್ ಪಡೆಯುತ್ತಿದ್ದರು" ಎಂದು ಮೊದಲ ದಿನದ ಆಟದ ನಂತರ ಮಾಧ್ಯಮಗಳೊಂದಿಗೆ ಮಾತನಾಡಿದ ಬುಮ್ರಾ ತಿಳಿಸಿದ್ದಾರೆ.

ತೇವಾಂಶವಿದ್ದಿದ್ದರಿಂದ ಅಶ್ವಿನ್​ ಹೆಚ್ಚು ತಿರುವುಗಳನ್ನು ಪಡೆದರು ಎಂದು ಬುಮ್ರಾ ತಿಳಿಸಿದ್ದಾರೆ. ಅಶ್ವಿನ್ ಈ ಪಂದ್ಯದಲ್ಲಿ ಮ್ಯಾಥ್ಯೂ ವೇಡ್​, ಸ್ಟಿವ್ ಸ್ಮಿತ್ ಮತ್ತು ಟಿಮ್ ಪೇನ್​ ವಿಕೆಟ್​ ಪಡೆದರು. ​

ಬಾಕ್ಸಿಂಗ್ ಡೇ ಟೆಸ್ಟ್​ನಲ್ಲಿ ಮೊದಲ ಇನ್ನಿಂಗ್ಸ್​ ಬ್ಯಾಟಿಂಗ್ ಮಾಡಿದ ಆಸ್ಟ್ರೇಲಿಯಾ ತಂಡ 72.3 ಓವರ್​ಗಳಲ್ಲಿ 195ಕ್ಕೆ ಆಲೌಟ್​ ಆಯಿತು. ಲಾಬುಶೇನ್​ 48 ರನ್​ ಗಳಿಸಿ ಗರಿಷ್ಠ ಸ್ಕೋರರ್​ ಆದರು. ಇತ್ತ ಭಾರತದ ಪರ ಬುಮ್ರಾ 3, ಅಶ್ವಿನ್ 3, ಸಿರಾಜ್ 2 ಹಾಗೂ ಜಡೇಜಾ 1 ವಿಕೆಟ್ ಪಡೆದರು.

ಮೊದಲ ಇನ್ನಿಂಗ್ಸ್​ನಲ್ಲಿ ಬ್ಯಾಟಿಂಗ್ ಆರಂಭಿಸಿರುವ ಭಾರತ ಕೂಡ ಮಯಾಂಕ್ ಅಗರ್​ವಾಲ್(0) ವಿಕೆಟ್ ಕಳೆದುಕೊಂಡು ಆರಂಭಿಕ ಆಘಾತ ಅನುಭವಿಸಿದೆ. ಆದರೆ ಶುಬ್ಮನ್​ ಗಿಲ್​​​ ಅಜೇಯ 28 ಹಾಗೂ ಪೂಜಾರ ಅಜೇಯ 9 ರನ್​ ಗಳಿಸಿ 2ನೇ ದಿನಕ್ಕೆ ಬ್ಯಾಟಿಂಗ್ ಕಾಯ್ದಿರಿಸಿಕೊಂಡಿದ್ದಾರೆ.