10 ವರ್ಷದಲ್ಲಿ 20,000 ರನ್​... ಕ್ರಿಕೆಟ್​ ಇತಿಹಾಸದಲ್ಲಿ ಯಾರೂ ಮಾಡದ ದಾಖಲೆ ಕೊಹ್ಲಿ ಹೆಸರಿಗೆ!

ವೆಸ್ಟ್​ ಇಂಡೀಸ್​ ವಿರುದ್ಧ ಬುಧವಾರ ನಡೆದ ಮೂರನೇ ಏಕದಿನ ಪಂದ್ಯದಲ್ಲಿ ಕೊಹ್ಲಿ ಶತಕಗಳಿಸುವ ಮೂಲಕ 2009 ರಿಂದ 2019ರ ವರೆಗಿನ 10 ವರ್ಷಗಳ ಅವಧಿಯಲ್ಲಿ 20 ಸಾವಿರ ಅಂತಾರಾಷ್ಟ್ರೀಯ ಕ್ರಿಕೆಟ್​ ರನ್ ಗಳಿಸಿದ ದಾಖಲೆಗೆ ಪಾತ್ರರಾಗಿದ್ದಾರೆ.

ಪೋರ್ಟ್​ ಆಫ್​ ಸ್ಪೇನ್​:ಭಾರತ ತಂಡದ ನಾಯಕ ವಿರಾಟ್​ ಕೊಹ್ಲಿ ವೃತ್ತಿ ಜೀವನಕ್ಕೆ ಕಾಲಿಟ್ಟು ದಶಕ ಕಳೆದಿದ್ದು, ಈ ಅವಧಿಯಲ್ಲಿ 20000 ಅಂತಾರಾಷ್ಟ್ರೀಯ ರನ್​ಗಳಿಸಿದ ಮೊಟ್ಟ ಮೊದಲ ಕ್ರಿಕೆಟಿಗ ಎಂಬ ಐತಿಹಾಸಿಕ ದಾಖಲೆಗೆ ಪಾತ್ರರಾಗಿದ್ದಾರೆ.

ವೆಸ್ಟ್​ ಇಂಡೀಸ್​ ವಿರುದ್ಧ ಬುಧವಾರ ನಡೆದ ಮೂರನೇ ಏಕದಿನ ಪಂದ್ಯದಲ್ಲಿ ಕೊಹ್ಲಿ ತಮ್ಮ 43 ನೇ ಶತಕ ಸಿಡಿಸಿ ಭಾರತ ತಂಡಕ್ಕೆ 6 ವಿಕೆಟ್​ಗಳ ಗೆಲುವು ತಂದುಕೊಟ್ಟಿದ್ದರು. ಕೊಹ್ಲಿ 2010 ರಿಂದ 2019ರ ವರೆಗಿನ ಅವಧಿಯಲ್ಲಿ 20 ಸಾವಿರ ಅಂತಾರಾಷ್ಟ್ರೀಯ ಕ್ರಿಕೆಟ್​ ರನ್ ಗಳಿಸಿದ ದಾಖಲೆಗೆ ಪಾತ್ರರಾಗಿದ್ದಾರೆ.

ಕೊಹ್ಲಿ 10 ವರ್ಷಗಳ ಅವಧಿಯಲ್ಲಿ 20 ಸಾವಿರ ರನ್​ಗಳಿಸಿದ ಮೊದಲ ಕ್ರಿಕೆಟಿಗ ಎನಿಸಿದ್ದಾರೆ. ಇವರನ್ನು ಬಿಟ್ಟರೆ 10 ವರ್ಷಗಳ ಅವಧಿಯಲ್ಲಿ ಆಸ್ಟ್ರೇಲಿಯಾದ ರಿಕಿ ಪಾಂಟಿಂಗ್​ 18962 ರನ್ಸ್​ ​, ಜಾಕ್​ ಕಾಲೀಸ್​ 16,777 ​, ಮಹೇಲಾ ಜಯವರ್ಧನೆ 16,304, ಕುಮಾರ್​ ಸಂಗಾಕ್ಕರ 15,999, ಸಚಿನ್​ ತೆಂಡೂಲ್ಕರ್​ 15,962, ರಾಹುಲ್​ ದ್ರಾವಿಡ್​ 15853ಮ ಹಾಶಿಮ್​ ಆಮ್ಲಾ 15185 ರನ್​ಗಳಿಸಿದ ದಾಖಲೆ ಹೊಂದಿದ್ದಾರೆ.

ಇದೇ ಪಂದ್ಯದಲ್ಲಿ ಕೊಹ್ಲಿ ನಾಯಕನಾಗಿ 21ನೇ ಶತಕ ಪೂರೈಸಿದ್ದಾರೆ. ಆಸ್ಟ್ರೇಲಿಯಾದ ರಿಕಿ ಪಾಂಟಿಂಗ್​ ನಾಯಕನಾಗಿ 22 ಶತಕ ದಾಖಲಿಸಿದ್ದು, ಕೊಹ್ಲಿ ಇನ್ನೊಂದು ಶತಕ ಬಾರಿಸಿದರೆ ಪಾಂಟಿಂಗ್​ ದಾಖಲೆ ಸರಿಗಟ್ಟಲಿದ್ದಾರೆ.

ಇದೇ ಪಂದ್ಯದಲ್ಲಿ ನಾಯಕನಾಗಿ ವೇಗವಾಗಿ(176) 10000 ಸಾವಿರ ಅಂತಾರಾಷ್ಟ್ರೀಯ ರನ್​ಗಳಿಸಿದ ಬ್ಯಾಟ್ಸ್​ಮನ್​ ಎನಿಸಿಕೊಂಡರು. ಎರಡನೇ ಸ್ಥಾನದಲ್ಲಿರುವ ರಿಕಿ ಪಾಂಟಿಂಗ್​ 225 ಇನ್ನಿಂಗ್ಸ್​ಗಳಲ್ಲಿ ಈ ಸಾಧನೆ ಮಾಡಿದ್ದಾರೆ. ಕೊಹ್ಲಿ ಬಿಟ್ಟರೆ 176 ಇನ್ನಿಂಗ್ಸ್​ಗಳಲ್ಲಿ ಯಾವೊಬ್ಬ ನಾಯಕ 8000 ರನ್​ ಕೂಡ ದಾಟಿಲ್ಲ ಎಂಬುದು ಗಮನಾರ್ಹ.

ಒಟ್ಟಾರೆ ಕೊಹ್ಲಿ ರನ್​ಮಷಿನ್ ಎಂಬ ಹೆಸರಿನ ಜೊತೆಗೆ ಸೆಂಚುರಿ ಮಷಿನ್​ ಕೂಡ ಆಗುತ್ತಿದ್ದಾರೆ. ಬ್ಯಾಟಿಂಗ್​ ದಾಖಲೆಗಳನ್ನು ಒಂದೊಂದಾಗಿ ತಮ್ಮ ಹೆಸರಿಗೆ ಬರೆದುಕೊಳ್ಳುತ್ತಿರುವ ಕೊಹ್ಲಿ ಮುಂದೊಂದು ದಿನ ಸಚಿನ್​ರ ಗರಿಷ್ಠ ಸ್ಕೋರ್​ ದಾಖಲೆಯನ್ನು ಮುರಿದರೂ ಅಚ್ಚರಿ ಪಡಬೇಕಾಗಿಲ್ಲ.