ಅಬ್ಬರಿಸಿದ ಅಂಬಾಟಿ, ಡುಪ್ಲೆಸಿಸ್​: ಚಾಂಪಿಯನ್ನರಿಗೆ ಮಣ್ಣು ಮುಕ್ಕಿಸಿದ ಧೋನಿ ಬಾಯ್ಸ್​

ಮುಂಬೈ ನೀಡಿದ 163 ರನ್​ಗಳ ಗುರಿಯನ್ನು ಬೆನ್ನತ್ತಿದ ಚೆನ್ನೈ ಸೂಪರ್​ ಕಿಂಗ್ಸ್​ ಇನ್ನು 4 ಎಸೆತಗಳು ಬಾಕಿಯಿರುವಂತೆ ಗೆಲುವಿನ ನಗೆ ಬೀರಿದೆ. ಅಂಬಾಟಿ ರಾಯುಡು 71 ರನ್​ ಸಿಡಿಸಿದರೆ, ಫಾಫ್​ ಡು ಪ್ಲೆಸಿಸ್ ಔಟಾಗದೆ 58 ರನ್​ಗಳಿಸಿ ತಂಡವನ್ನು ಗೆಲುವಿನ ದಡ ಸೇರಿಸಿದರು.

ಅಬುಧಾಬಿ: ಅಂಬಾಟಿ ರಾಯುಡು ಹಾಗೂ ಅನುಭವಿ ಫಾಫ್​ ಡು ಪ್ಲೆಸಿಸ್​ ಅವರ ಆಕರ್ಷಕ ಅರ್ಧಶತಕದ ನೆರವಿನಿಂದ ಸಿಎಸ್​ಕೆ 13ನೇ ಆವೃತ್ತಿಯ ಉದ್ಘಾಟನಾ ಪಂದ್ಯದಲ್ಲಿ 5 ವಿಕೆಟ್​ ಭರ್ಜರಿ ಗೆಲುವು ಸಾಧಿಸಿದೆ.

ಮುಂಬೈ ನೀಡಿದ 163 ರನ್​ಗಳ ಗುರಿಯನ್ನು ಬೆನ್ನತ್ತಿದ ಚೆನ್ನೈ ಸೂಪರ್​ ಕಿಂಗ್ಸ್​ ಇನ್ನು 4 ಎಸೆತಗಳು ಬಾಕಿಯಿರುವಂತೆ ಗೆಲುವಿನ ನಗೆ ಬೀರಿದೆ. ಅಂಬಾಟಿ ರಾಯುಡು 71 ರನ್​ ಸಿಡಿಸಿದರೆ, ಫಾಫ್​ ಡು ಪ್ಲೆಸಿಸ್ ಔಟಾಗದೆ 58 ರನ್​ಗಳಿಸಿ ತಂಡವನ್ನು ಗೆಲುವಿನ ದಡ ಸೇರಿಸಿದರು.

ಚೇಸಿಂಗ್​ ಆರಂಭಿಸುತ್ತಿದ್ದಂತಯೆ ಸಿಎಸ್​ಕೆ ತನ್ನ ಆರಂಭಿಕರಾಗಿ ಕಣಕ್ಕಿಳಿದಿದ್ದ ಮುರುಳಿ ವಿಜಯ್​(1) ಹಾಗೂ ಶೇನ್ ವಾಟ್ಸನ್​ (4) ವಿಕೆಟ್​ ಕಳೆದುಕೊಂಡು ಆಘಾತಕ್ಕೊಳಗಾಯಿತು. ಆದರೆ ಫಾಫ್ ಡು ಪ್ಲೆಸಿಸ್​ ಮತ್ತು ಅಂಬಾಟಿ ರಾಯಡು ಮೂರನೇ ವಿಕೆಟ್​ ಬರೋಬ್ಬರಿ 116 ರನ್​ಗಳ ಜೊತೆಯಾಟ ನಡೆಸಿ ಸೋಲಿನ ಸುಳಿಯಲ್ಲಿದ್ದ ತಂಡವನ್ನು ಗೆಲುವನತ್ತ ಕೊಂಡೊಯ್ದರು.

48 ಎಸೆತಗಳನ್ನೆದುರಿಸಿದ ರಾಯುಡು 3 ಸಿಕ್ಸರ್ಸ್​ ಹಾಗೂ 6 ಬೌಂಡರಿಗಳ ಸಹಿತ 71 ರನ್​ ಸಿಡಿಸಿ ಔಟಾದರು. ನಂತರ ಬಂದ ಜಡೇಜಾ 5 ಎಸೆತಗಳಲ್ಲಿ 10, ಸ್ಯಾಮ್​ ಕರ್ರನ್​ 6 ಎಸೆತಗಳಲ್ಲಿ 2 ಸಿಕ್ಸರ್ ಹಾಗೂ ಒಂದು ಬೌಂಡರಿ ಸಹಿತ 18 ರನ್​ ಸಿಡಿಸಿ ಗೆಲುವಿನ ಸನಿಹ ತಂದು ಔಟಾದರು.

ಕೊನೆಯವರೆಗೂ ತಾಳ್ಮೆಯಿಂದ ಆಡಿದ ಫಾಫ್​ ಡು ಪ್ಲೆಸಿಸ್ 44 ಎಸೆತಗಳಲ್ಲಿ 6 ಬೌಂಡರಿ ಸಹಿತ 58 ರನ್​ಗಳಿಸಿ ತಂಡವನ್ನು ಗೆಲುವಿನ ದಡ ದಾಟಿಸಿದರು.

ಮುಂಬೈ ಇಂಡಿಯನ್ಸ್​ ಪರ ಬೌಲ್ಟ್​ 23ಕ್ಕೆ 1, ಪ್ಯಾಟಿನ್ಸನ್​ 27ಕ್ಕೆ 1, ಬುಮ್ರಾ 43 ಕ್ಕೆ1, ಕೃನಾಲ್ ಪಾಂಡ್ಯ 37ಕ್ಕೆ1 ಹಾಗೂ ರಾಹುಲ್ ಚಹಾರ್​ 36ಕ್ಕೆ 1 ವಿಕೆಟ್​ ಪಡೆದರು.

ಇದಕ್ಕು ಮುನ್ನ ಬ್ಯಾಟಿಂಗ್​ ನಡೆಸಿದ್ದ ಮುಂಬೈ ಇಂಡಿಯನ್ಸ್ ಡಿಕಾಕ್​ 33ರನ್​, ಸೌರಭ್ ತಿವಾರಿ 42 ರನ್​ಗಳ ನೆರವಿನಿಂದ 20 ಓವರ್​ಗಳಲ್ಲಿ 9 ವಿಕೆಟ್ ಕಳೆದುಕೊಂಡು 162 ರನ್​ಗಳಿಸಿತ್ತು.

ಸಿಎಸ್​ಕೆ ಪರ ಲುಂಗಿ ಎಂಗಿಡಿ 38ಕ್ಕೆ 3, ದೀಪಕ್​ ಚಹಾರ್​ 32ಕ್ಕೆ 2, ರವೀಂದ್ರ ಜಡೇಜಾ 42ಕ್ಕೆ 2 ಸ್ಯಾಮ್ ಕರನ್​ ಹಾಗೂ ಚಾವ್ಲಾ ತಲಾ ಒಂದು ವಿಕೆಟ್ ಪಡೆದು ಮಿಂಚಿದ್ದರು.

ಬೌಲಿಂಗ್​ನಲ್ಲಿ 1 ವಿಕೆಟ್​ ಹಾಗೂ ಬ್ಯಾಟಿಂಗ್​ನಲ್ಲಿ 6 ಎಸೆತಗಳಲ್ಲಿ 18 ರನ್​ ಸಿಡಿಸಿ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದ ಸ್ಯಾಮ್ ಕರ್ರನ್​ ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು.