ಮುಂಬೈ: ಐಪಿಎಲ್ನ ಅತ್ಯಂತ ಯಶಸ್ವಿ ತಂಡ ಎನಿಸಿಕೊಂಡಿರುವ ಮುಂಬೈ ಇಂಡಿಯನ್ಸ್ ಐಪಿಎಲ್ನಲ್ಲಿ 4 ಬಾರಿ ಟ್ರೋಫಿ ಎತ್ತಿಹಿಡಿಯುವಲ್ಲಿ ನೆರವಾಗಿದ್ದ ಶ್ರೀಲಂಕಾದ ಯಾರ್ಕರ್ ಕಿಂಗ್ ಲಸಿತ್ ಮಾಲಿಂಗ ಅವರನ್ನು 2021ರ ಐಪಿಎಲ್ಗೂ ಮುನ್ನ ತಂಡದಿಂದ ಕೈಬಿಟ್ಟಿದೆ.
ಬಿಸಿಸಿಐ ಜನವರಿ 20ರಂದು ರೀಟೈನ್ ಆಟಗಾರರ ಲಿಸ್ಟ್ ಸಲ್ಲಿಸಲು ಅಂತಿಮ ದಿನವಾಗಿ ಘೋಷಿಸಿತ್ತು. ಇಂದು ಮುಂಬೈ ಇಂಡಿಯನ್ಸ್ ತನ್ನ 18 ಆಟಗಾರರನ್ನು ಉಳಿಸಿಕೊಂಡಿರುವುದಾಗಿ ತಿಳಿಸಿದ್ದು, ಲಸಿತ್ ಮಾಲಿಂಗಾ ಸೇರಿದಂತೆ ಒಟ್ಟು 7 ಆಟಗಾರರನ್ನು ಬಿಟ್ಟುಕೊಟ್ಟಿದೆ.
ಮಾಲಿಂಗ 2009ರಲ್ಲಿ ಮುಂಬೈ ಇಂಡಿಯನ್ಸ್ ತಂಡಕ್ಕೆ ಸೇರ್ಪಡೆಗೊಂಡಿದ್ದರು. 2019ರವರೆಗೂ ಚಾಂಪಿಯನ್ ತಂಡದ ಪರ ಆಡಿದ್ದ ಅವರು 2020ರಲ್ಲಿ ವೈಯಕ್ತಿಕ ಕಾರಣಗಳಿಂದ ಟೂರ್ನಿಯಿಂದ ಹೊರ ಉಳಿದಿದ್ದರು. ಅವರು ಕಳೆದ ಒಂದು ವರ್ಷದಿಂದ ಯಾವುದೇ ಟೂರ್ನಿಯಲ್ಲಿ ಆಡದ ಕಾರಣ ಮುಂಬೈ ಇಂಡಿಯನ್ಸ್ ಅವರನ್ನು ಮಿನಿ ಹರಾಜಿಗೂ ಮುನ್ನ ತಂಡದಿಂದ ರಿಲೀಸ್ ಮಾಡಿದೆ. ಮಾಲಿಂಗ ಪ್ರಸ್ತುತ ಐಪಿಎಲ್ನಲ್ಲಿ ಗರಿಷ್ಠ ವಿಕೆಟ್ ಪಡೆದ ಬೌಲರ್ ಎಂಬ ದಾಖಲೆಯನ್ನು ಹೊಂದಿದ್ದಾರೆ. 37 ವರ್ಷದ ಶ್ರೀಲಂಕಾದ ವೇಗಿ 170 ವಿಕೆಟ್ ಪಡೆದಿದ್ದಾರೆ.
ಮಾಲಿಂಗ ಜೊತೆಗೆ ದುಬಾರಿ ಬೆಲೆ ಆಲ್ರೌಂಡರ್ ನಾಥನ್ ಕೌಲ್ಟರ್ ನೈಲ್, ಜೇಮ್ಸ್ ಪ್ಯಾಟಿನ್ಸನ್ರನ್ನು ಹಾಲಿ ಚಾಂಪಿಯನ್ ಹೊರಹಾಕಿದೆ.
ಇದನ್ನು ಓದಿ:18 ಆಟಗಾರರನ್ನು ಉಳಿಸಿಕೊಂಡ ಸಿಎಸ್ಕೆ: ಜಾಧವ್, ಚಾವ್ಲಾ ಸೇರಿ 6 ಮಂದಿ ಔಟ್