ಬ್ರಿಸ್ಬೇನ್:2020ರ ಟಿ-20 ವಿಶ್ವಕಪ್ ಅಭ್ಯಾಸ ಪಂದ್ಯದಲ್ಲಿ ಭಾರತದ ವನಿತೆಯರ ತಂಡ ವೆಸ್ಟ್ ಇಂಡೀಸ್ ವಿರುದ್ಧ 2 ರನ್ಗಳ ರೋಚಕ ಜಯ ಸಾಧಿಸಿದೆ.
ಮೊದಲ ಆಭ್ಯಾಸ ಪಂದ್ಯವನ್ನು ಮಳೆಯಿಂದ ತಪ್ಪಿಸಿಕೊಂಡಿದ್ದ ಭಾರತ ತಂಡ ಎರಡನೇ ಪಂದ್ಯದಲ್ಲಿ ನೀರಸ ಬ್ಯಾಟಿಂಗ್ ಪ್ರದರ್ಶನ ತೋರಿತು. ಟಾಸ್ ಗೆದ್ದು ಬ್ಯಾಟಿಂಗ್ ತೆಗೆದುಕೊಂಡು 20 ಓವರ್ಗಳಲ್ಲಿ ಕೇವಲ 107 ರನ್ ಕಲೆಹಾಕಿತು. ಶಿಖಾ ಪಾಂಡೆ 24 ರನ್ ಗಳಿಸಿ ಗರಿಷ್ಠ ಸ್ಕೋರರ್ ಎನಿಸಿದರೆ, ದೀಪ್ತಿ ಶರ್ಮಾ 21 ರನ್ ಗಳಿಸಿದರು. ಸ್ಟಾರ್ ಬ್ಯಾಟ್ಸ್ಮನ್ಗಳಾದ ಮಂಧಾನ, 4, ಯುವ ಆಟಗಾರ್ತಿ ಶಫಾಲಿ ವರ್ಮಾ 12, ರೋಡ್ರಿಗ್ಸ್ 0, ವೇದಾ ಕೃಷ್ಣಮೂರ್ತಿ 5, ನಾಯಕಿ ಹರ್ಮನ್ ಪ್ರೀತ್ ಕೌರ್ 11 ರನ್ಗಳಿಗೆ ವಿಕೆಟ್ ಒಪ್ಪಿಸಿ ನಿರಾಶೆ ಮೂಡಿಸಿದರು.
ವಿಂಡೀಸ್ ಮಹಿಳಾ ತಂಡದ ಪರ ಶಮಿಲ ಕನ್ನೆಲ್ 2, ಅನಿಸಾ ಮೊಹಮ್ಮದ್ 2, ಸ್ಟೆಫನಿ ಟೇಲರ್, ಚಿನೆಲ್ಲೆ ಹೆನ್ರಿ, ಆಲಿಯಾ ಅಲೆಯ್ನೆ ಹಾಗೂ ಅಫಿ ಫ್ಲೆಚರ್ ತಲಾ ಒಂದು ವಿಕೆಟ್ ಪಡೆದು ಭಾರತ ತಂಡವನ್ನು ನಿಯಂತ್ರಿಸಿದರು.
108 ರನ್ಗಳ ಸಾಧಾರಣ ಗುರಿ ಬೆನ್ನತ್ತಿದ ವೆಸ್ಟ್ ಇಂಡೀಸ್ ಭಾರತದ ಸ್ಪಿನ್ ದಾಳಿಗೆ ರನ್ ಗಳಿಸಲು ಪರದಾಡಿ 20 ಓವರ್ಗಳಲ್ಲಿ 105 ರನ್ ಗಳಿಸಲಷ್ಟೇ ಶಕ್ತವಾಯಿತು. ಆರಂಭಿಕ ಆಟಗಾರ್ತಿ ಲೀ-ಅನ್ ಕಿರ್ಬಿ 42 ಹಾಗೂ ಹೇಲಿ ಮ್ಯಾಥ್ಯೂಸ್ 25 ರನ್ ಗಳಿಸಿ ಗೆಲುವಿಗಾಗಿ ಕೊನೆಯ ಓವರ್ವರೆಗೂ ಹೋರಾಟ ನಡೆಸಿದರೂ 2 ರನ್ಗಳಿಂದ ಸೋಲು ಕಾಣುವಂತಾಯಿತು.
ಅದ್ಭುತ ಬೌಲಿಂಗ್ ಪ್ರದರ್ಶನ ತೋರಿದ ಪೂನಮ್ ಯಾದವ್ ಕೊನೆಯ ಓವರ್ನಲ್ಲಿ 2 ವಿಕೆಟ್ ಸಹಿತ ಒಟ್ಟು 3 ವಿಕೆಟ್ ಪಡೆದು ಗೆಲುವಿನ ರೂವಾರಿಯಾದರು. ಇವರಿಗೆ ಸಾಥ್ ನೀಡಿದ ದೀಪ್ತಿ ಶರ್ಮಾ, ಹರ್ಮನ್ ಹಾಗೂ ಶಿಖಾ ಪಾಂಡೆ ತಲಾ ಒಂದು ವಿಕೆಟ್ ಪಡೆದರು.
