ಕನ್ನಡ ಚಿತ್ರರಂಗ ಅಲ್ಲದೆ ಟಾಲಿವುಡ್, ಕಾಲಿವುಡ್, ಬಾಲಿವುಡ್ನಲ್ಲೂ ಮುದ್ರೆ ಒತ್ತಿರುವ ಕಿಚ್ಚ ಸುದೀಪ್, ಸದ್ಯಕ್ಕೆ ಕನ್ನಡದಲ್ಲಿ ಕೋಟಿಗೊಬ್ಬ-3 ಸಿನಿಮಾದಲ್ಲಿ ಬ್ಯುಸಿ ಇದ್ದಾರೆ. ಜೊತೆಗೆ ಹಿಂದಿಯಲ್ಲಿ ಸಲ್ಮಾನ್ ಖಾನ್ ಜೊತೆ ಅಭಿನಯಿಸಿರುವ ದಬಾಂಗ್-3 ಕೂಡಾ ಬಿಡುಗಡೆಯಾಗಬೇಕಿದೆ.
ಅಭಿಮಾನಿಗಳಿಗೆ, ಸಹನಟರಿಗೆ ಯಾವಾಗಲೂ ಗೌರವ ನೀಡುವ ಕಿಚ್ಚ, ಇದೀಗ ತಮ್ಮ ಮೇಕಪ್ ಮ್ಯಾನ್ ಬಗ್ಗೆ ಅಚ್ಚರಿಯ ವಿಷಯವೊಂದನ್ನು ಹಂಚಿಕೊಂಡಿದ್ದಾರೆ. ಸುದೀಪ್, 'ತಾಯವ್ವ' ಎಂಬ ಸಿನಿಮಾದಿಂದ ಪುಟ್ಟ ಪಾತ್ರದ ಮೂಲಕ ಕರಿಯರ್ ಆರಂಭಿಸಿ ಈಗ ಬಹುಭಾಷಾ ನಟನಾಗಿ ಬೇಡಿಕೆ ಹೆಚ್ಚಿಸಿಕೊಂಡಿರುವುದು ಇತಿಹಾಸ. 'ಸ್ಪರ್ಶ' ಸಿನಿಮಾ ಮೂಲಕ ನಾಯಕನಾಗಿ ಗುರುತಿಸಿಕೊಂಡ ಸುದೀಪ್, ಸದ್ಯ ತೆರೆ ಹಿಂದಿರುವ ವ್ಯಕ್ತಿಯ ಅಪರೂಪದ ವಿಡಿಯೋವೊಂದನ್ನು ಶೇರ್ ಮಾಡುವ ಮೂಲಕ ಖುಷಿ ಹಂಚಿಕೊಂಡಿದ್ದಾರೆ.