ಗುವಾಹಟಿ( ಅಸ್ಸೋಂ): ಬಾಲಿವುಡ್ ನಟಿ ಯಾಮಿ ಗೌತಮ್, ಅಭಿಮಾನಿ ಹಾಗೂ ಅಸ್ಸೋಂ ಜನತೆಯ ಗೌರವದ ಸಂಕೇತವಾದ ಗಮೋಸಾಗೆ ಅಗೌರವ ತೋರಿದ್ದಾರೆ ಎಂದು ಟೀಕೆಗೆ ಗುರಿಯಾಗಿದ್ದಾರೆ.
ಕಳೆದ ವಾರಾಂತ್ಯದಲ್ಲಿ ಯಾಮಿ ಗೌತಮ್ ಗುವಾಹಟಿ ವಿಮಾನ ನಿಲ್ದಾಣದಲ್ಲಿ ಬಂದಿಳಿದಾಗ, ಅಭಿಮಾನಿಯೊಬ್ಬರು ನಟಿಯನ್ನು ಸ್ವಾಗತಿಸುವ ಸಲುವಾಗಿ ಅಸ್ಸೋಂ ಗಮೋಸಾ(ಅಸ್ಸೋಂ ಶೈಲಿಯ ಸ್ಕಾರ್ಫ್) ತೊಡಿಸಲು ಮುಂದಾಗಿದ್ದಾರೆ. ಆದ್ರೆ, ಗಮೋಸಾದ ಗೌರವದ ತಿಳಿವಳಿಕೆಯೇ ಇಲ್ಲದಂತಿದ್ದ ನಟಿ ಯಾಮಿ ಗೌತಮ್, ಅಭಿಮಾನಿಯ ಈ ಅಭಿಮಾನವನ್ನು ಯಾವುದೇ ಮುಲಾಜಿಲ್ಲದೇ ನಿರಾಕರಿಸಿದ್ದಾರೆ. ಅಭಿಮಾನಿಯ ಕೈ ಹಿಂದಕ್ಕೆ ತಳ್ಳಿದ್ದಾರೆ. ಆ ವೇಳೆ, ನಟಿಯ ಸಹಾಯಕ ಕೂಡಾ ಅಭಿಮಾನಿಯನ್ನು ಹಿಂದಕ್ಕೆ ಹೋಗುವಂತೆ ಸೂಚಿಸಿದ್ದಾರೆ. ಇದಾದ ಬಳಿಕ ನಟಿ ವಿರುದ್ಧ ಸಾಕಷ್ಟು ಟೀಕೆಗಳ ಸುರಿಮಳೆ ಕೇಳಿ ಬರುತ್ತಿದೆ.
ಈ ಬಗ್ಗೆ ಅಸ್ಸೋಂನ ಟ್ವಿಟ್ಟರ್ ಬಳಕೆದಾರನೊಬ್ಬ ಟ್ವೀಟ್ ಮಾಡಿದ್ದು, ನಟಿ ಯಾಮಿ ಗೌತಮ್ ಅಸ್ಸೋಂನ ಹೆಮ್ಮೆಯ ಸಂಕೇತವಾದ ಗಮೋಸಾಗೆ ಅಗೌರವ ತೋರಿದ್ದಾರೆ. ಅಭಿಮಾನಿಯೊಬ್ಬರು ಅವರಿಗೆ ಗಮೋಸಾ ತೊಡಿಸಲು ಮುಂದಾದಾಗ ಅವರು ಅದನ್ನು ನಿರಾಕರಿಸಿದ್ದಾರೆ ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.