ನವದೆಹಲಿ :ಟಿಬೆಟಿಯನ್ ಸ್ವಾಯತ್ತ ಪ್ರದೇಶದಲ್ಲಿ (TAR) 18-21 ವರ್ಷ ವಯಸ್ಸಿನ ಟಿಬೆಟಿಯನ್ ಯುವಕರಿಗೆ ಚೀನಾ ಸರ್ಕಾರ ಮೊಬೈಲ್ ಫೋನ್‌ಗಳಲ್ಲಿ ಪಠ್ಯಗಳನ್ನು ರವಾನೆ ಮಾಡುತ್ತಿದೆ. ಈ ಹಿನ್ನೆಲೆ ಎರಡು ವರ್ಷಗಳ ಶಾಲಾ-ಕಾಲೇಜು ಶುಲ್ಕ ಮರುಪಾವತಿಗೆ ಬದಲಾಗಿ ಎರಡು ವರ್ಷಗಳ ಮಿಲಿಟರಿ ತರಬೇತಿ ಪಡೆಯಲು ಅನುವು ಮಾಡಿಕೊಟ್ಟಿದೆ ಎಂದು ಟಿಬೆಟಿಯನ್ ಮಾಧ್ಯಮ ವರದಿ ಮಾಡಿದೆ.
ಮಿಲಿಟರಿ ತರಬೇತಿ ಪಡೆದ ಯುವಕರಿಗೆ ಪೀಪಲ್ಸ್ ಲಿಬರೇಶನ್ ಆರ್ಮಿಯಲ್ಲಿ ಸೇವೆ ಸಲ್ಲಿಸಲು ಅವಕಾಶ ನೀಡಲಾಗಿದೆ. ಭಾರತ-ಚೀನಾ ಗಡಿಯಲ್ಲಿ ಕಾರ್ಯ ನಿರ್ವಹಿಸುವಂತೆ ಸೂಚಿಸಲಾಗಿದೆ. ಸರ್ಕಾರಿ-ಅನುದಾನಿತ ಶಿಕ್ಷಣ ಸಂಸ್ಥೆಗಳ ವಿದ್ಯಾರ್ಥಿಗಳಿಗೆ ದಾಖಲಾತಿ ಕಡ್ಡಾಯವಾಗಿದೆ. ಜತೆಗೆ ಎರಡು ವರ್ಷದ ಮಿಲಿಟರಿ ತರಬೇತಿ ಅವಧಿ ಮುಗಿದ ನಂತರ ಯುವಕರಿಗೆ ತಮ್ಮ ಅಧ್ಯಯನವನ್ನು ಮುಂದುವರಿಸಲು ಅವಕಾಶ ನೀಡಲಾಗುತ್ತದೆ.
ಮಿಲಿಟರಿ ತರಬೇತಿಯು ಪ್ರೌಢಶಾಲೆ ಮತ್ತು ಕಾಲೇಜು ಪಠ್ಯಕ್ರಮದ ಭಾಗವಾಗಿದ್ದರೂ, ಸರ್ಕಾರವು ದುಡ್ಡನ್ನು ಮರುಪಾವತಿಯ ರೂಪದಲ್ಲಿ ನೀಡುತ್ತಿರುವುದು ಇದೇ ಮೊದಲು. ಎರಡು ವರ್ಷಗಳ ಮಿಲಿಟರಿ ತರಬೇತಿ ಕೋರ್ಸ್‌ಗೆ ಅರ್ಜಿ ಸಲ್ಲಿಸಲು ಆಗಸ್ಟ್ 15 ಕೊನೆಯ ದಿನವಾಗಿದೆ.