ಶಾರುಖ್ ಖಾನ್ ಅಭಿನಯದ ಕಾಮಿಡಿ ಡ್ರಾಮಾ 'ಡಂಕಿ' ಹಾಗೂ ಪ್ರಭಾಸ್ ಅಭಿನಯದ ಆ್ಯಕ್ಷನ್ ಎಂಟರ್ಟೈನ್ಮೆಂಟ್ 'ಸಲಾರ್' ಬಿಡುಗಡೆಗೆ ಕ್ಷಣಗಣನೆ ಆರಂಭವಾಗಿದ್ದು, ಬಾಕ್ಸ್ ಆಫೀಸ್ ಮಹಾ ಪೈಪೋಟಿಗೆ ವೇದಿಕೆ ಸಜ್ಜಾಗಿದೆ. ಕ್ರಿಸ್ಮಸ್ ರಜೆ ಸಂದರ್ಭದಲ್ಲಿ ತೆರೆಕಾಣುತ್ತಿರುವ ಸಲಾರ್ ಮತ್ತು ಡಂಕಿ ವೀಕ್ಷಿಸಲು ಅಪಾರ ಸಂಖ್ಯೆಯ ಅಭಿಮಾನಿಗಳು ಕಾತರದಿಂದ ಕಾಯುತ್ತಿದ್ದಾರೆ. ಎರಡೂ ಸಿನಿಮಾಗಳು ಪ್ರೇಕ್ಷಕರ ಆಸಕ್ತಿ ಹೆಚ್ಚಿಸಿದೆ. ಸಿನಿಮಾ ಉದ್ಯಮದ ಟ್ರ್ಯಾಕರ್ ಸ್ಯಾಕ್ನಿಲ್ಕ್ ವರದಿ ಪ್ರಕಾರ, ಸಲಾರ್ ಅಡ್ವಾನ್ಸ್ ಟಿಕೆಟ್ ಸೇಲ್ ವ್ಯವಹಾರದಲ್ಲಿ 'ಡಂಕಿ'ಯನ್ನು ಮೀರಿಸಿದೆ.
ಪ್ರೇಕ್ಷಕರ ಮೊದಲ ಆದ್ಯತೆ 'ಸಲಾರ್' ಎಂದು ತೋರುತ್ತಿದೆ. ಬಾಲಿವುಡ್ ಕಿಂಗ್ ಖಾನ್ ಶಾರುಖ್ ಅಭಿನಯದ ಡಂಕಿ ಸಿನಿಮಾ ಮೀರಿಸುವ ಸಾಧ್ಯತೆಗಳು ಹೆಚ್ಚಿದೆ. ಪ್ರಶಾಂತ್ ನೀಲ್ ನಿರ್ದೇಶನದ ಸಲಾರ್ ಸಿನಿಮಾ ಈಗಾಗಲೇ 12.85 ಕೋಟಿ ರೂಪಾಯಿಗಳ ವ್ಯವಹಾರ (ಮೊದಲ ದಿನದ ಕಲೆಕ್ಷನ್) ನಡೆಸಿದೆ. ದೇಶಾದ್ಯಂತ 6,439 ಶೋಗಳಿಗೆ 5,77,406 ಟಿಕೆಟ್ಗಳನ್ನು ಈಗಾಗಲೇ ಮಾರಾಟ ಮಾಡಿದೆ.
ಮತ್ತೊಂದೆಡೆ ಡಂಕಿ ಸಿನಿಮಾ 12,612 ಶೋಗಳಲ್ಲಿ 3,62,027 ಟಿಕೆಟ್ಗಳನ್ನು ಮಾರಾಟ ಮಾಡುವಲ್ಲಿ ಯಶಸ್ವಿಯಾಗಿದೆ. ಈ ಮೂಲಕ 10.3 ಕೋಟಿ ರೂ.ನ ಬ್ಯುಸಿನೆಸ್ ನಡೆದಿದೆ. ಮಂಗಳವಾರದವರೆಗೆ ಡಂಕಿ ಮುನ್ನಡೆ ಸಾಧಿಸಿತ್ತು. ಆದ್ರೀಗ ಸಲಾರ್ ಮುಂದಿದೆ. ಈ ಅಂಕಿ ಅಂಶ ಕ್ಷಣ ಕ್ಷಣಕ್ಕೂ ಏರುತ್ತಿದ್ದು, ಮೊದಲ ದಿನದ ಕಲೆಕ್ಷನ್ ನಂಬರ್ ಬಂದ ಬಳಿಕವಷ್ಟೇ ಸ್ಪಷ್ಟ ಚಿತ್ರಣ ಸಿಗಲಿದೆ.