ಮಂಗಳೂರು ಬೋಟ್ ದುರಂತ: ನಾಪತ್ತೆಯಾದ ನಾಲ್ವರ ಪತ್ತೆಗೆ ಮುಂದುವರಿದ ಶೋಧ

ಮಂಗಳೂರಿನ ಧಕ್ಕೆ ಅಳಿವೆ ಬಾಗಿಲಿನಲ್ಲಿ ನಡೆದ ಬೋಟ್ ದುರಂತದಲ್ಲಿ ನಾಪತ್ತೆಯಾದ ನಾಲ್ವರು ಮೀನುಗಾರರ ಶೋಧ ಕಾರ್ಯ ಇಂದು ಮತ್ತೆ ಆರಂಭವಾಗಿದೆ.

ಮಂಗಳೂರು: ಮೀನುಗಾರಿಕಾ ಬೋಟ್​ ಮುಳುಗಡೆಯಾಗಿ ನಾಪತ್ತೆಯಾದವರಲ್ಲಿ ಇನ್ನೂ ನಾಲ್ವರ ಸುಳಿವು ಸಿಗದ ಹಿನ್ನೆಲೆ ಇಂದು ಮತ್ತೆ ಶೋಧ ಕಾರ್ಯ ಆರಂಭವಾಗಿದೆ.

ಮಂಗಳೂರಿನ ಧಕ್ಕೆ ಅಳಿವೆ ಬಾಗಿಲಿನಲ್ಲಿ 'ಶ್ರೀರಕ್ಷಾ' ಎಂಬ ಬೋಟ್ ಸೋಮವಾರ ರಾತ್ರಿ ಮೀನು ಹಿಡಿದುಕೊಂಡು ಧಕ್ಕೆಗೆ ವಾಪಸ್​ ಬರುತ್ತಿರುವಾಗ ದುರಂತ ಸಂಭವಿಸಿ 6 ಮೀನುಗಾರರು ನಾಪತ್ತೆಯಾಗಿದ್ದರು. ಈ ಬೋಟ್​ನಲ್ಲಿದ್ದ 22 ಮೀನುಗಾರರಲ್ಲಿ 16 ಮಂದಿಯನ್ನು ರಕ್ಷಣೆ ಮಾಡಲಾಗಿತ್ತು.

ಕೋಸ್ಟ್ ಗಾರ್ಡ್, ಇತರೆ ಹಡಗಿನ ಮೀನುಗಾರರು ಮತ್ತು ಮುಳುಗು ತಜ್ಞರು ಶೋಧ ಕಾರ್ಯ ನಡೆಸಿ ನಿನ್ನೆ ಇಬ್ಬರ ಮೃತದೇಹ ಹೊರತೆಗೆದಿದ್ದರು. ಪಾಂಡುರಂಗ ಸುವರ್ಣ ಮತ್ತು ಪ್ರೀತಂ ಎಂಬುವರ ಮೃತದೇಹ ನಿನ್ನೆ ಪತ್ತೆಯಾಗಿದ್ದು, ಚಿಂತನ್, ಝಿಯಾವುಲ್ಲಾ, ಅನ್ಸಾರ್, ಹಸೈನಾರ್ ಎಂಬ ನಾಲ್ವರ ಮೃತದೇಹ ಇನ್ನೂ ಪತ್ತೆಯಾಗಿಲ್ಲ.

ನಿನ್ನೆ ರಾತ್ರಿ ಶೋಧ ಕಾರ್ಯ ಸ್ಥಗಿತಗೊಳಿಸಲಾಗಿದ್ದು, ಇಂದು ಬೆಳಗ್ಗೆಯಿಂದ ಮತ್ತೆ ಕಾರ್ಯಾಚರಣೆ ಆರಂಭವಾಗಿದೆ. ಸಮುದ್ರದೊಳಗೆ ಇರುವ ಬೋಟ್​ ಒಳಗಡೆ ಮುಳುಗು ತಜ್ಞರು ಶೋಧ ನಡೆಸಿ, ಮೀನುಗಾರರನ್ನು ಹೊರತರಲು ಪ್ರಯತ್ನಿಸುತ್ತಿದ್ದಾರೆ. ಇವರಿಗೆ ಕೋಸ್ಟ್​ ಗಾರ್ಡ್ ಸಿಬ್ಬಂದಿ, ಸ್ಥಳೀಯ ಮೀನುಗಾರರು ಕೈಜೋಡಿಸಿದ್ದಾರೆ.

ಮೀನುಗಾರಿಕಾ ವಹಿವಾಟು ಸ್ಥಗಿತಗೊಳಿಸಲು ಆಗ್ರಹ:

ಮಂಗಳೂರು ಬೋಟ್ ದುರಂತದಲ್ಲಿ ನಾಪತ್ತೆಯಾದ ನಾಲ್ವರು ಪತ್ತೆಯಾಗದಿರುವುದರಿಂದ ಬೆಂಗರೆ ನಿವಾಸಿಗಳು ಮಧ್ಯರಾತ್ರಿ ಶಾಂತಿಯುತವಾಗಿ ಧಕ್ಕೆ ಬಳಿ ಪ್ರತಿಭಟನೆ ನಡೆಸಿ, ನಾಪತ್ತೆಯಾದವರ ಮೃತದೇಹ ಪತ್ತೆಯಾಗುವವರೆಗೆ ಮೀನುಗಾರಿಕಾ ವಹಿವಾಟು ನಡೆಸದಂತೆ ಆಗ್ರಹಿಸಿದರು.