ಹಾಸಿಗೆ ನಿರಾಕರಿಸಿದರೆ ಕಾನೂನು ಕ್ರಮ ಕೈಗೊಳ್ಳಲು ಸಿಎಂ ಸೂಚನೆ: ಸಚಿವ ಆರ್.ಅಶೋಕ್

ಇನ್ನು ಮುಂದೆ ನಾನು ಯಾವ ಸಭೆಯನ್ನೂ ನಡೆಸಲ್ಲ. ಕಷ್ಟದ ಸಂದರ್ಭದಲ್ಲಿ ಯಾರೂ ಹಾಸಿಗೆ ನಿರಾಕರಿಸಬಾರದು. ನಿರಾಕರಿಸಿದರೆ ಕಠಿಣ ಕ್ರಮ ಕೈಗೊಳ್ಳಲಾಗುವುದಾಗಿ ಸಿಎಂ ಖಾಸಗಿ ಮೆಡಿಕಲ್​ ಕಾಲೇಜು ಆಸ್ಪತ್ರೆಗಳಿಗೆ ಎಚ್ಚರಿಕೆ ನೀಡಿದ್ದಾರೆ ಎಂದು ಕಂದಾಯ ಸಚಿವ ಆರ್​. ಅಶೋಕ್​ ವಿವರಿಸಿದರು.

ಬೆಂಗಳೂರು: ಕೋವಿಡ್ -19 ರೋಗಿಗಳಿಗೆ ಹಾಸಿಗೆ ನಿರಾಕರಿಸಬಾರದು, ಒಂದು ವೇಳೆ ನಿರಾಕರಿಸಿದರೆ ಕಾನೂನು ಕ್ರಮ ಕೈಗೊಳ್ಳುವುದಾಗಿ ಖಾಸಗಿ ಮೆಡಿಕಲ್ ಕಾಲೇಜು ಆಸ್ಪತ್ರೆಗಳಿಗೆ ಖಡಕ್ ಎಚ್ಚರಿಕೆ ನೀಡಲಾಗಿದೆ ಎಂದು ಕಂದಾಯ ಸಚಿವ ಆರ್.ಅಶೋಕ್ ತಿಳಿಸಿದರು.

ಖಾಸಗಿ ಮೆಡಿಕಲ್ ಕಾಲೇಜು ಆಸ್ಪತ್ರೆಗಳ ಮುಖ್ಯಸ್ಥರ ಜೊತೆ ಸಿಎಂ ಸಭೆ ಬಳಿಕ ಮಾತನಾಡಿದ ಅವರು, 50% ಹಾಸಿಗೆಯನ್ನು ಬಿಟ್ಟುಕೊಡಬೇಕು ಎಂದು ಹೇಳಿದ್ದಾರೆ.

ಸಭೆಗೆ 10 ಮೆಡಿಕಲ್ ಕಾಲೇಜುಗಳ ಮುಖ್ತಸ್ಥರು ಬಂದಿದ್ರು. ವೈದೇಹಿ ಕಾಲೇಜು ಮುಖ್ಯಸ್ಥರು ಬಂದಿರಲಿಲ್ಲ. ಅವರಿಗೆ ನೊಟೀಸ್ ಕೊಡಲಾಗ್ತಿದೆ. ಆಕಾಶ್ ಮತ್ತು ಅಂಬೇಡ್ಕರ್ ಮೆಡಿಕಲ್ ಕಾಲೇಜುಗಳು ಕೊರೊನಾ ರೋಗಿಗಳಿಗೆ ಪೂರ್ತಿ ಆಸ್ಪತ್ರೆಗಳನ್ನು ಬಿಟ್ಟು ಕೊಡಲು ಮುಂದಾಗಿವೆ. ಉಳಿದ ಮೆಡಿಕಲ್ ಕಾಲೇಜುಗಳು ಹತ್ತು ದಿನಗಳೊಳಗೆ ಶೇ.50 ರಷ್ಟು ಬೆಡ್ ಗಳನ್ನು ಕೊಡಲು ಒಪ್ಪಿವೆ ಎಂದು ತಿಳಿಸಿದರು.

ಖಾಸಗಿ ಮೆಡಿಕಲ್ ಕಾಲೇಜು ಆಸ್ಪತ್ರೆಗಳಿಂದ ಸುಮಾರು 6,000 ಬೆಡ್ ಸಿಗಲಿದೆ. ಬೆಡ್ ನೀಡಲು ನಿರಾಕರಿಸುವ ಆಸ್ಪತ್ರೆಗಳಿಗೆ ಇನ್ನು ಮುಂದೆ ನೋಟೀಸ್ ಸರ್ವ್‌ ಮಾಡಲ್ಲ. ಎಸ್ ಡಿಆರ್ ಎಫ್ ಕಾಯ್ದೆ ಅಡಿ ಪ್ರಕರಣ ದಾಖಲಿಸಲಾಗುತ್ತದೆ ಎಂದರು. ಸಿಎಂ ಪ್ರತಿದಿನ ನಿದ್ದೆ ಬಿಟ್ಟು ಪ್ರಯತ್ನ ಮಾಡುತ್ತಿದ್ದಾರೆ. ಮಾಧ್ಯಮದಲ್ಲಿ ಏನು ಬರುತ್ತೆ ಅದರ ಬಗ್ಗೆ ಕೂಡಲೇ ಕ್ರಮ ಕೈಗೊಳ್ಳುವಂತೆ ಸಿಎಂ ನನಗೆ ಸೂಚನೆ ನೀಡಿದ್ದಾರೆ ಎಂದು ಸ್ಪಷ್ಟಪಡಿಸಿದರು.

ಮಂಜುನಾಥ್ ಪ್ರಸಾದ್ ಫುಲ್ ಟೈಂ ಆಯುಕ್ತರು:

ಬಿಬಿಎಂಪಿ ಆಯುಕ್ತರ ವರ್ಗ ವಿಚಾರವಾಗಿ ಪ್ರತಿಕ್ರಿಯಿಸಿದ ಅವರು, ಮೊನ್ನೆ ಹೈಕೋರ್ಟ್ ಬಿಬಿಎಂಪಿ ಕಾರ್ಯ ವೈಖರಿಗೆ ಅಸಮಧಾನ ವ್ಯಕ್ತಪಡಿಸಿತ್ತು. ಅಧಿಕಾರಿಗಳ ವರ್ಗ ಆಗೋದು ಸಹಜ. ಇನ್ನು ಮುಂದೆ ಮಂಜುನಾಥ್ ಪ್ರಸಾದ್ ಫುಲ್ ಟೈಂ ಬಿಬಿಎಂಪಿ ಆಯುಕ್ತರಾಗಿದ್ದಾರೆ ಎಂದರು.

ಮಂಜುನಾಥ್ ಪ್ರಸಾದ್ ಅವರನ್ನು ಆದಷ್ಟು ಬೇಗ ಕಂದಾಯ ಇಲಾಖೆಯಿಂದ ರಿಲೀಸ್ ಮಾಡ್ತೇವೆ. ಮತ್ತೊಬ್ಬ ಅಧಿಕಾರಿ ಬರೋವರೆಗೂ ಮಂಜುನಾಥ್ ಪ್ರಸಾದ್ ಕಂದಾಯ ಇಲಾಖೆ ಪ್ರಧಾನ ಕಾರ್ಯದರ್ಶಿ ಆಗಿರ್ತಾರೆ. ಅನಿಲ್ ಕುಮಾರ್ ಅವರೂ ಸಮರ್ಥರಿದ್ರು. ಮಂಜುನಾಥ್ ಪ್ರಸಾದ್ ಅವರೂ ಸಮರ್ಥರಿದಾರೆ. ಸಿಎಂ ವರ್ಗಾವಣೆ ಸಂಬಂಧ ನಿರ್ಧಾರ ಕೈಗೊಂಡಿದ್ದಾರೆ ಎಂದು ಸ್ಪಷ್ಟಪಡಿಸಿದರು.

ಲಾಕ್‌ಡೌನ್ ಮುಂದುವರಿಕೆ ಇಲ್ಲ:

ಬೆಂಗಳೂರಲ್ಲಿ ಲಾಕ್‌ಡೌನ್ ಮುಂದುವರಿಕೆ ಇಲ್ಲ ಎಂದು ಸಚಿವ ಆರ್.ಅಶೋಕ್ ಸ್ಪಷ್ಟಪಡಿಸಿದರು. ಈ ಸಂಬಂಧ ಸಿಎಂ ಈಗಾಗಲೇ ಹೇಳಿದ್ದಾರೆ ಎಂದು ತಿಳಿಸಿದರು.

ಲಾಕ್‌ಡೌನ್ ವಿಸ್ತರಿಸುವ ಬಗ್ಗೆ ಸಚಿವ ನಾರಾಯಣಗೌಡರ ಹೇಳಿಕೆ ವಿಚಾರವಾಗಿ ಮಾತನಾಡಿದ ಅವರು, ಸಿಎಂ ನಿತ್ಯ ಹಲವು ಸಭೆ ಮಾಡುತ್ತಿದ್ದಾರೆ. ಸಿಎಂ ಎಲ್ಲರ ಅಭಿಪ್ರಾಯ ಪಡೆಯುತ್ತಾರೆ. ಲಾಕ್‌ಡೌನ್, ಸೀಲ್‌ಡೌನ್ ಬಗ್ಗೆ ಜಿಲ್ಲೆಗಳ ಅಧಿಕಾರಿಗಳ ಅಭಿಪ್ರಾಯ ಪಡೆಯುತ್ತಾರೆ. ಪರಿಸ್ಥಿತಿ ಅವಲೋಕಿಸಿ ತೀರ್ಮಾನ ಮಾತ್ರ ಸಿಎಂ ಅವರೇ ಮಾಡೋದು ಎಂದರು.

ಖಾಸಗಿ ಆಸ್ಪತ್ರೆ ಜವಾಬ್ದಾರಿ ಕಾರ್ಪೊರೇಟರ್ ಹೆಗಲಿಗೆ:

ಖಾಸಗಿ ಆಸ್ಪತ್ರೆಗಳಲ್ಲಿ ಬೆಡ್​ಗಳು ಸಮಸ್ಯೆಯಾಗದಂತೆ ನೋಡಿಕೊಳ್ಳಲು ಸಚಿವ ಆರ್. ಅಶೋಕ್, ದಕ್ಷಿಣ ವಲಯದ ಖಾಸಗಿ ಆಸ್ಪತ್ರೆಗಳಲ್ಲಿನ ಬೆಡ್ ಗಳ ಮೇಲೆ ನಿಗಾ ವಹಿಸುವ ಜವಾಬ್ದಾರಿಯನ್ನು ಕಾರ್ಪೊರೇಟರ್ ಹೆಗಲಿಗೆ ವಹಿಸಿದ್ದಾರೆ.

ಆಸ್ಪತ್ರೆಗಳಲ್ಲಿ ಎಷ್ಟು ಬೆಡ್ ಇದೆ ಎಷ್ಟು ಬೆಡ್ ನಲ್ಲಿ ಪೆಷಂಟ್ ಇದ್ದಾರೆ. ಅನ್ನೋ ಮಾಹಿತಿ ಎಲ್ಲವೂ ಕಾರ್ಪೊರೇಟರ್ ನೋಡಿಕೊಳ್ಳಬೇಕು. ಪ್ರತಿಯೊಂದು ಆಸ್ಪತ್ರೆ ಮುಂದೆ ಒಬ್ಬ ಪೇದೆ ನಿಯೋಜಿಸಲಾಗುತ್ತದೆ. ಆಸ್ಪತ್ರೆ ಮುಂದೆ ಯಾರೇ ಬಂದ್ರು ಅವರಿಗೆ ಚಿಕಿತ್ಸೆ ಸಿಗಬೇಕು ಎಂದರು.