ಹೈದರಾಬಾದ್:2047ರ ವೇಳೆಗೆ ಭಾರತ ಅಭಿವೃದ್ಧಿಶೀಲ ಮತ್ತು ಸಿರಿವಂತ ರಾಷ್ಟ್ರವಾಗಿ ಬೆಳೆಯಬೇಕಾದರೆ, ಈಗಿನ ಆರ್ಥಿಕ ಪ್ರಗತಿ ಸಾಕಾಗದು ಎಂದು ಭಾರತೀಯ ರಿಸರ್ವ್ ಬ್ಯಾಂಕ್‌ನ ಮಾಜಿ ಗವರ್ನರ್, ಅರ್ಥಶಾಸ್ತ್ರಜ್ಞ ರಘುರಾಮ್ ರಾಜನ್ ಅಭಿಪ್ರಾಯಪಟ್ಟಿದ್ದಾರೆ.
ಸ್ವಾತಂತ್ರ್ಯೋತ್ಸವದ 100ನೇ ವರ್ಷಾಚರಣೆಯ (2047) ವೇಳೆಗೆ ಜನಸಂಖ್ಯೆಯಲ್ಲಿ ಯಾವುದೇ ಏರಿಕೆಯಾಗದೆ, ಸಂಭಾವ್ಯ ಬೆಳವಣಿಗೆ ದರವು ವಾರ್ಷಿಕ ಶೇಕಡಾ 6 ರಷ್ಟಿದ್ದರೆ ದೇಶ ಕೆಳಮಧ್ಯಮ ರಾಷ್ಟ್ರವಾಗಿಯೇ ಉಳಿಯುತ್ತದೆ ಎಂದು ಇಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ತಿಳಿಸಿದರು.
ಜನಸಂಖ್ಯೆ ಬೆಳವಣಿಗೆಯು ದೇಶದ ಆರ್ಥಿಕ ಪ್ರಗತಿಯ ಮೇಲೆ ಪರಿಣಾಮ ಬೀರುತ್ತದೆ. ಅಂದರೆ ವಯಸ್ಸಾದ ಜನಸಂಖ್ಯೆ ಹೊರೆಯಾಗುತ್ತದೆ. ಕಳೆದ ಎರಡು ತ್ರೈಮಾಸಿಕಗಳಲ್ಲಿ ದೇಶದ ಜಿಡಿಪಿ ಬೆಳವಣಿಗೆಯು ಶೇ 7.5ರಷ್ಟು ದಾಖಲಾಗಿದೆ. ಈಗಿನ ಕಾರ್ಮಿಕ ಬಲ ಮತ್ತು ಮಹಿಳೆಯರ ಪಾಲ್ಗೊಳ್ಳುವಿಕೆಯನ್ನು ತಾಳೆ ಹಾಕಿದರೆ, ಇದು ತುಂಬಾ ಕಡಿಮೆ. ಇದು ಜಿ20 ರಾಷ್ಟ್ರಗಳಲ್ಲಿಯೇ ಅತ್ಯಂತ ಕಡಿಮೆ ಎಂದು ರಾಜನ್ ವಿವರಿಸಿದರು.
ತಲಾ ಆದಾಯದ ಲೆಕ್ಕಾಚಾರ:ಭಾರತದ ಜಿಡಿಪಿ ಬೆಳವಣಿಗೆ ದರ ಸದ್ಯ ವರ್ಷಕ್ಕೆ ಶೇ 6ರಷ್ಟಿದೆ. ಗಣಿತದ ಲೆಕ್ಕಾಚಾರಗಳ ಪ್ರಕಾರ, ವರ್ಷಕ್ಕೆ 6 ಪ್ರತಿಶತವಿದ್ದಾಗ 12 ವರ್ಷಕ್ಕೆ ಇದು ದ್ವಿಗುಣಗೊಳ್ಳುತ್ತದೆ. ಅಂದರೆ, ನಮ್ಮ ತಲಾದಾಯ ಹೆಚ್ಚಳವಾಗಲು 24 ವರ್ಷಗಳು ಬೇಕಾಗುತ್ತವೆ. ದೇಶದಲ್ಲಿ ಈಗ ತಲಾ ಆದಾಯ ಪ್ರತಿ ವ್ಯಕ್ತಿಗೆ 2,500 ಡಾಲರ್ನಷ್ಟಿದೆ. ಅದನ್ನು ನಾಲ್ಕರಿಂದ ಗುಣಿಸಿದಾಗ, ಪ್ರತಿ ವ್ಯಕ್ತಿಗೆ 10,000 ಡಾಲರ್ ಆಗುತ್ತದೆ. ಇದು ಸದ್ಯಕ್ಕೆ ಜಿ20 ರಾಷ್ಟ್ರಗಳಲ್ಲಿ ಅತ್ಯಧಿಕವಾಗುತ್ತದೆ. ಹಾಗಂತ ನಾವು ನಾವು ಶ್ರೀಮಂತರಾಗುವುದಿಲ್ಲ. 2047 ರವರೆಗೆ ನಾವು ಕೆಳಮಧ್ಯಮ ಆದಾಯವನ್ನೇ ಹೊಂದಿರುತ್ತೇವೆ ಎಂಬುದು ರಾಜನ್ ಲೆಕ್ಕಾಚಾರ.