ನಗರ ಜೀವನದಿಂದ ವಿಶ್ರಾಂತಿಗೆ ಸೂಕ್ತ ಈ ಗ್ರಾಮ.. ಮೂಲ ಸೌಕರ್ಯವಿಲ್ಲದೆ ಸೊರಗಿದೆ ರಮಣೀಯ ತಾಣ

ಧಂಕಿದಂಗದ ಸ್ಥಳೀಯರು ಈ ಪ್ರವಾಸಿ ತಾಣದ ಅಭಿವೃದ್ಧಿಗಾಗಿ ಕಾದಿದ್ದಾರೆ. ಇದರಿಂದ ಗ್ರಾಮದ ಕೆಲ ಯುವಕರಿಗೆ ಇಲ್ಲಿಯೇ ಉದ್ಯೋಗ ದೊರೆತಂತಾಗುತ್ತದೆ. ಜೊತೆಗೆ ಊರಿಗೆ ಇನ್ನಷ್ಟು ಮೂಲಸೌಕರ್ಯ ದೊರೆಯಲಿದೆ ಎಂಬುದು ಅವರ ಆಶಯವಾಗಿದೆ.

ಕೋಲ್ಕತ್ತಾ (ಪಶ್ಚಿಮ ಬಂಗಾಳ): ನಗರ ಜೀವನದಿಂದ ಒಂದಿಷ್ಟು ಸಮಯ ದೂರವಿದ್ದು ವಿಶ್ರಾಂತಿ ಪಡಿಬೇಕು ಅಂತ ಕೆಲವರು ಹಳ್ಳಿಗಳತ್ತ ಪಿಕ್​ನಿಕ್​ ಹೋಗ್ತಾರೆ. ಅಂತಹ ಮಂದಿಗೆ ಇಲ್ಲೊಂದು ಪುಟ್ಟ ಗ್ರಾಮ ಹೇಳಿ ಮಾಡಿಸಿದಂತಿದೆ. ಬಂಕೂರಾ ಪ್ರದೇಶದಿಂದ ಸುಮಾರು 7 ಕಿ.ಮೀಟರ್​​ನಷ್ಟು ದುರ್ಗಮ ಹಾದಿಯಲ್ಲಿ ತಲುಪಿದರೆ ಈ ಧಂಕಿದಂಗ ಎಂಬ ಪುಟ್ಟ ಹಳ್ಳಿ ಎದುರಾಗಲಿದೆ.

ವಾಹನಗಳ ಓಡಾಟದ ಸದ್ದು, ಗದ್ದಲವಿಲ್ಲ. ಕಿವಿಗಳಿಗೆ ಪಕ್ಷಿಗಳ ಇಂಚರ, ಸಣ್ಣ ತೊರೆಯ ಶಬ್ದ ಬಿಟ್ಟರೆ ಬೇರೇನೂ ಕೇಳಿಸುವುದೇ ಇಲ್ಲ. ಇಂತಹ ನಿರ್ಜನ ಪ್ರದೇಶದಲ್ಲಿ ಸಣ್ಣ ಬೆಳ್ಳಿಯ ರೇಖೆಯಂತೆ ಜಾಯ್​​​ಪಾಂಡಾ ನದಿ ಸ್ವಚ್ಛಂದವಾಗಿ ಹರಿಯುತ್ತದೆ.

ಆದ್ರೆ ಅಷ್ಟೇನೂ ಪ್ರಚಾರ ಇಲ್ಲದ್ದಕ್ಕೆ ಬಂಕೂರಾ ಪ್ರದೇಶ ಪ್ರವಾಸಿಗಳನ್ನು ಸೆಳೆಯುವಲ್ಲಿ ಯಶಸ್ವಿಯಾಗಿಲ್ಲ. ಪ್ರವಾಸವನ್ನೇ ಇಷ್ಟಪಡುವ ಮಂದಿ ಈ ಹೆಸರನ್ನೇ ಕೇಳಿಲ್ಲ. ಕೇಳಿದವರು ಈ ತಾಣಕ್ಕೆ ಭೇಟಿ ಕೊಟ್ಟಿರುವುದು ಕಡಿಮೆ. ಈ ಪ್ರದೇಶಕ್ಕೆ ಮೂಲಸೌಕರ್ಯದ ಕೊರತೆ ಇದ್ದು, ಇದು ಸುತ್ತಮುತ್ತಲಿನ ಸ್ಥಳೀಯರಿಗಷ್ಟೇ ಇರುವ ಪಿಕ್ನಿಕ್ ಸ್ಥಳ ಎಂಬಂತಾಗಿದೆ.

ಧಂಕಿದಂಗದ ಸ್ಥಳೀಯರು ಈ ಪ್ರವಾಸಿ ತಾಣದ ಅಭಿವೃದ್ಧಿಗಾಗಿ ಕಾದಿದ್ದಾರೆ. ಇದರಿಂದ ಗ್ರಾಮದ ಕೆಲ ಯುವಕರಿಗೆ ಇಲ್ಲಿಯೇ ಉದ್ಯೋಗ ದೊರೆತಂತಾಗುತ್ತದೆ. ಜೊತೆಗೆ ಊರಿಗೆ ಇನ್ನಷ್ಟು ಮೂಲಸೌಕರ್ಯ ದೊರೆಯಲಿದೆ ಇದರಿಂದ ಗ್ರಾಮೀಣ ಬದುಕು ಸುಧಾರಿಸಲಿದೆ ಎಂಬುದು ಅವರ ಆಶಯವಾಗಿದೆ.