ಮುಂಬೈ: ಸಾಕುನಾಯಿಗಳಿಗೆ ಕೆಲ ಮಾಲೀಕರು ಎಂತಹ ಕಾಳಜಿ, ಪ್ರೀತಿ ತೋರಿಸುತ್ತಾರೆಂದರೆ ಕೆಲ ಬಾರಿ ಅಚ್ಚರಿಗೂ ಕಾರಣವಾಗುತ್ತದೆ. ಇಂತಹದ್ದೇ ಅಚ್ಚರಿ ಮೂಡಿಸುವ ಘಟನೆಯೊಂದು ಮುಂಬೈನಲ್ಲಿ ನಡೆದಿರುವುದು ವರದಿಯಾಗಿದೆ.
ಮುಂಬೈನಿಂದ ಚೆನ್ನೈಗೆ ತೆರಳಬೇಕಿದ್ದ ಉದ್ಯಮಿಯೋರ್ವ ತನ್ನ ಸಾಕುನಾಯಿಗಾಗಿ ಏರ್ ಇಂಡಿಯಾ ವಿಮಾನದ ಇಡೀ ಬ್ಯುಸಿನೆಸ್ ಕ್ಲಾಸ್ ಕ್ಯಾಬಿನ್ ಅನ್ನೇ ಬುಕ್ ಮಾಡಿ ಅಚ್ಚರಿ ಮೂಡಿಸಿದ್ದಾರೆ. ಬುಧವಾರ ಆತ ಮುಂಬೈನಿಂದ ಚೆನ್ನೈಗೆ ತೆರಳಬೇಕಿತ್ತು, ತನ್ನ ಸಾಕುನಾಯಿಯ ಜೊತೆ ಐಷಾರಾಮಿ ಪ್ರಯಾಣಕ್ಕಾಗಿ ಬರೋಬ್ಬರಿ 2.5 ಲಕ್ಷ ರೂಪಾಯಿ ವ್ಯಯಿಸಿ ಬ್ಯುಸಿನೆಸ್ ಕ್ಲಾಸ್ ಕ್ಯಾಬಿನ್ ಬುಕ್ ಮಾಡಿದ್ದಾರೆ.
ಏರ್ ಇಂಡಿಯಾ ಎ-320 ವಿಮಾನ ಒಟ್ಟು 12 ಬ್ಯುಸಿನೆಸ್ ಕ್ಲಾಸ್ ಕ್ಯಾಬಿನ್ ಹೊಂದಿದೆ. ಮುಂಬೈನಿಂದ ಚೆನ್ನೈಗೆ ಒಂದು ಬ್ಯುಸಿನೆಸ್ ಕ್ಲಾಸ್ ಟಿಕೆಟ್ನ ಬೆಲೆ 20 ಸಾವಿರ ರೂಪಾಯಿಯಾಗಿರಲಿದೆ. ಆದರೆ ಈ ಸಾಕುನಾಯಿ ಮಾಲೀಕ ಇಡೀ ಕ್ಯಾಬಿನ್ ಬುಕ್ ಮಾಡಿದ್ದರು. ಮಾಲ್ಟೀಸ್ ಫರ್ಬಾಲ್ ತಳಿಯ ನಾಯಿ ಮತ್ತು ಅದರ ಮಾಲೀಕ ಸೆ.15ರಂದು ಮುಂಬೈನಿಂದ ಚೆನ್ನೈಗೆ ತೆರಳಿದ್ದಾರೆ.
ಏರ್ ಇಂಡಿಯಾದ ವಿಮಾನ ನಿಯಮದ ಪ್ರಕಾರ, ನಾಯಿ, ಬೆಕ್ಕು ಮತ್ತು ಪಕ್ಷಿಗಳಿಗೆ ವಿಮಾನದಲ್ಲಿ ಪ್ರಯಾಣಿಸಲು ಅವಕಾಶವಿದೆ. ಆದರೆ ಈ ಪ್ರಾಣಿಗಳು ಲಸಿಕೆ ಪ್ರಮಾಣಪತ್ರವನ್ನು ಹೊಂದಿರಬೇಕು. ಒಬ್ಬ ಪ್ರಯಾಣಿಕನಿಗೆ ಎರಡು ಸಾಕುಪ್ರಾಣಿಗಳನ್ನು ತೆಗೆದುಕೊಂಡು ವಿಮಾನ ಏರಲು ಅನುಮತಿಸಲಾಗಿದೆ. ಪ್ರಾಣಿಗಳ ಗಾತ್ರ ಮತ್ತು ಯಾವ ಪ್ರಾಣಿ ಎಂಬುದರ ಮೇಲೆ ಅವುಗಳನ್ನು ಕ್ಯಾಬಿನ್ ಅಥವಾ ಸರಕಿನಲ್ಲಿ ಸಾಗಿಸಬಹುದು. ಆದರೆ ಬ್ಯುಸಿನೆಸ್ ಕ್ಲಾಸ್ನಲ್ಲಿ ತೆರಳಬೇಕಾದರೆ ಕೊನೆಯ ಸಾಲಿನ ಸೀಟ್ನಲ್ಲಿ ಮಾತ್ರ ಕುಳಿತುಕೊಳ್ಳಬೇಕಾಗುತ್ತದೆ.
ಇದನ್ನೂ ಓದಿ:ಪಂಜಾಬ್‌ ಸಿಎಂ ರೇಸ್‌ನಲ್ಲಿ ಮೂವರ ಹೆಸರು ; ಯಾರಿಗೆ ಮಣೆ ಹಾಕ್ತಾರೆ ಸೋನಿಯಾ ಗಾಂಧಿ!?