ಯುವತಿಯೊಂದಿಗೆ ಸಂಬಂಧ... ಯುವಕನಿಗೆ ಥಳಿಸಿ ಬೆಟ್ಟದ ಮೇಲಿಂದ ತಳ್ಳಿದ ಕುಟುಂಬಸ್ಥರು

ಮಗಳೊಂದಿಗೆ ಸಂಬಂಧ ಮುಂದುವರಿಸಬೇಡ ಎಂದು ಯುವಕನಿಗೆ ಯುವತಿ ಕುಟುಂಬಸ್ಥರು ಅಮಾನುಷವಾಗಿ ಥಳಿಸಿ ಬೆಟ್ಟದ ಮೇಲಿಂದ ನೂಕಿರುವ ಘಟನೆ ಮಹಾರಾಷ್ಟ್ರದ ಥಾಣೆ ಜಿಲ್ಲೆಯಲ್ಲಿ ನಡೆದಿದೆ.

ಥಾಣೆ (ಮಹಾರಾಷ್ಟ್ರ): ಮಗಳೊಂದಿಗೆ ಸಂಬಂಧ ಮುಂದುವರಿಸಬೇಡ ಎಂದು 18 ವರ್ಷದ ಯುವಕನಿಗೆ ಯುವತಿ ಕುಟುಂಬಸ್ಥರು ಹಿಗ್ಗಾಮುಗ್ಗ ಥಳಿಸಿ ಸಿಗರೇಟ್​ನಿಂದ ಸುಟ್ಟು ಹಿಂಸೆ ನೀಡಿದ್ದಾರೆ. ಬಳಿಕ ಬೆಟ್ಟದ ಮೇಲಿಂದ ತಳ್ಳಿರುವ ಅಮಾನವೀಯ ಘಟನೆ ಜಿಲ್ಲೆಯಲ್ಲಿ ನಡೆದಿದೆ.

ಅದೃಷ್ಟವಶಾತ್ ಯುವಕ ಓವೈಸಿ​ ಅಬ್ದುಲ್​ ರಹೀಂ ಖಾನ್​ ಪ್ರಾಣಾಪಾಯದಿಂದ ಪಾರಾಗಿದ್ದು, ತನ್ನ ಸ್ನೇಹಿತರ ನೆರವಿನಿಂದ ಮುಂಬ್ರಾ ಠಾಣೆಗೆ ದೂರು ನೀಡಿದ್ದಾನೆ. ಅಪಹರಣ ಮತ್ತು ಚಿತ್ರಹಿಂಸೆ ನೀಡಿದ ಆರೋಪದ ಮೇಲೆ ಪೊಲೀಸರು 30 ಜನರ ವಿರುದ್ಧ ಎಫ್​ಐಆರ್ ದಾಖಲಿಸಿದ್ದಾರೆ. ಆದರೆ ಈವರೆಗೂ ಯಾರನ್ನೂ ಬಂಧಿಸಿಲ್ಲ. ಈ ಪ್ರಕರಣದಲ್ಲಿ ಯುವತಿ ತಂದೆ ಪ್ರಮುಖ ಆರೋಪಿ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ರಾಡ್ ಮೂಲಕ ಮಾರಣಾಂತಿಕವಾಗಿ ಥಳಿಸಿ, ಜನವರಿ 23ರಂದು ಬೆಟ್ಟದ ಮೇಲಿಂದ ತಳ್ಳಿರುವುದಾಗಿ ಓವೈಸ್​ ಅಬ್ದುಲ್​ ರಹೀಂ ಖಾನ್​ ದೂರಿನಲ್ಲಿ ಉಲ್ಲೇಖಿಸಿದ್ದಾನೆ. ತೀವ್ರವಾಗಿ ಗಾಯಗೊಂಡಿರುವ ಯುವಕನಿಗೆ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗ್ತಿದೆ.