ಜಗತ್ತಿನಲ್ಲಿ ವಿಭಿನ್ನ ರೀತಿಯ ಜನರಿದ್ದಾರೆ. ಅವರ ಆಸೆ, ಆಕಾಂಕ್ಷೆಗಳು ಬೇರೆ ಬೇರೆ. ಹೆಚ್ಚು ಸಂಬಳ ಬರಲಿ, ಐಷಾರಾಮಿ ಜೀವನವಿರಲೆಂಬ ಕನಸಿನ ಹಿಂದೆ ಓಡುವವರುಂಟು. ಕೆಲವರಿಗೆ ಪುಸ್ತಕ ಓದುವ ಅದಮ್ಯ ಉತ್ಸಾಹವಾದ್ರೆ, ಇನ್ನೂ ಕೆಲವರಿಗೆ ಸಂಗೀತ, ಮತ್ತೆ ಕೆಲವರಿಗೆ ಕಲೆ, ಕ್ರೀಡೆ.. ಹೀಗೆ ಮನುಷ್ಯನಿಗೆ ಆತ ಇಷ್ಟಪಡುವ ಹವ್ಯಾಸಗಳಿರುತ್ತವೆ. ಅದೇನೇ ಇರಲಿ, ಆದ್ರೆ ನಾವೀಗ ಹೇಳಹೊರಟಿರುವುದು ನಮ್ಮ ರಾಜ್ಯದವರೇ ಆದ ಅನ್ಯೋನ್ಯ ದಂಪತಿಯ ಸ್ಟೋರಿ.
ಹೌದು, ಬೆಂಗಳೂರಿನ ಆಶಾ ಮತ್ತು ಕಿರಣ್ ದಂಪತಿಗೆ ಪ್ರವಾಸ ಎಂದರೆ ಅಚ್ಚುಮೆಚ್ಚು. ಪ್ರಪಂಚವನ್ನು ಅನ್ವೇಷಿಸುವುದು, ವಿವಿಧ ದೇಶದ ಆಕರ್ಷಕ ಪ್ರವಾಸಿ ತಾಣಗಳು, ಅಲ್ಲಿನ ಕಲೆ, ಸಾಹಿತ್ಯ, ಹೊಸ ಹೊಸ ಸಮುದಾಯವನ್ನು ಕಣ್ತುಂಬಿಕೊಳ್ಳುವುದು ಇವರ ಕನಸು. ಜರ್ಮನಿಯಲ್ಲಿ ಮಾಸ್ಟರ್ಸ್ ಮುಂದುವರಿಸಲು ಯೋಚಿಸಿರುವ ಈ ಪತಿ-ಪತ್ನಿ, ಸದ್ಯಕ್ಕೆ ವೃತ್ತಿಜೀವನದಿಂದ ಕೊಂಚ ವಿರಾಮ ತೆಗೆದುಕೊಂಡು, ತಮ್ಮ ಕನಸಿನತ್ತ ಸಾಗುತ್ತಿದ್ದಾರೆ.
ಇಲ್ಲಿಯವರೆಗೆ ಇವರಿಬ್ಬರು ಜಗತ್ತಿನ 5 ಖಂಡಗಳಿಗೆ ಪ್ರಯಾಣಿಸಿದ್ದು, ಉತ್ತರ ಅಮೆರಿಕದಿಂದ ಹಿಡಿದು ಆಫ್ರಿಕಾದ ಸಹಾರಾ ಮರುಭೂಮಿ ಸೇರಿದಂತೆ 76 ದೇಶಗಳಿಗೆ ಭೇಟಿ ನೀಡಿದ್ದಾರೆ. ಪ್ರತಿನಿತ್ಯ ಹೊಸ ಸ್ಥಳ, ವಿಚಾರಗಳನ್ನು ಹುಡುಕಿ ಸಾಗುವ ಇವರು ಸಾರ್ವಜನಿಕರಿಗೂ ಉಪಯುಕ್ತ ಮಾಹಿತಿ ನೀಡುತ್ತಿದ್ದಾರೆ.