ಕ್ರಯೋಜನಿಕ್ ಹಂತದಲ್ಲಿ ತಾಂತ್ರಿಕ ತೊಂದರೆ; ಉಪಗ್ರಹವನ್ನು ಕಕ್ಷೆ ಸೇರಿಸುವಲ್ಲಿ ಇಸ್ರೋ ವಿಫಲ

ಭಾರತೀಯ ಬಾಹ್ಯಾಕಾಶ ಸಂಸ್ಥೆ (ಇಸ್ರೋ) ಅತ್ಯಾಧುನಿಕ ಜಿಯೋ ಇಮೇಜಿಂಗ್ ಉಪಗ್ರಹವನ್ನು ನಿಗದಿತ ಕಕ್ಷೆ ಸೇರಿಸುವಲ್ಲಿ ವಿಪಲವಾಯಿತು. ಇಂದು ಮುಂಜಾನೆ 05.43ಕ್ಕೆ ಸರಿಯಾಗಿ ಉಪಗ್ರಹವನ್ನು ಹೊತ್ತು ಜಿಎಸ್‌ಎಲ್‌ವಿ-ಎಫ್‌ 10 ರಾಕೆಟ್‌ ನಭದತ್ತ ಜಿಗಿಯಿತು. ಆದರೆ, ಮಹತ್ವದ ಕ್ರಯೋಜನಿಕ್‌ ಹಂತದಲ್ಲಿ ಜ್ವಲನ ಪ್ರಕ್ರಿಯೆ ನಡೆಯದೆ ತಾಂತ್ರಿಕ ದೋಷವುಂಟಾಗಿ ಇಸ್ರೋ ಪ್ರಯತ್ನ ಫಲ ನೀಡಲಿಲ್ಲ.

ಶ್ರೀಹರಿಕೋಟ (ಆಂಧ್ರ ಪ್ರದೇಶ):ಅತ್ಯಾಧುನಿಕ ಜಿಯೋ ಇಮೇಜಿಂಗ್ ಉಪಗ್ರಹ ಇಒಎಸ್​-03 (Earth Observation Satellite-EOS) ಅನ್ನು ನಿಗದಿತ ಕಕ್ಷೆ ಸೇರಿಸುವಲ್ಲಿಇಸ್ರೋ ವಿಫಲವಾಗಿದೆ. ಇಂದು ಮುಂಜಾನೆ ಜಿಎಸ್ಎಲ್‌ವಿ-ಎಫ್ 10 ರಾಕೆಟ್ ಆಂಧ್ರ ಪ್ರದೇಶದ ನೆಲ್ಲೂರು ಜಿಲ್ಲೆಯಶ್ರೀಹರಿಕೋಟದಲ್ಲಿರುವ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ ಯಶಸ್ವಿ ಉಡಾವಣೆಯಾಗಿದ್ದು, ಕ್ರಯೋಜೆನಿಕ್ ಹಂತದಲ್ಲಿ ವೈಫಲ್ಯ ಅನುಭವಿಸಿದೆ.

ಉಪಗ್ರಹ ಉಡಾವಣೆಗೆ ನಿನ್ನೆ (ಬುಧವಾರ) ಮುಂಜಾನೆಯಿಂದಲೇ ಇಸ್ರೋ ಸಿದ್ದತೆಗಳನ್ನು ಪ್ರಾರಂಭಿಸಿತ್ತು. ಇಒಎಸ್​-03 ಅತ್ಯಾಧುನಿಕ ತಂತ್ರಜ್ಞಾನವನ್ನು ಹೊಂದಿರುವ ಭೂ ಪರಿವೀಕ್ಷಣಾ ಉಪಗ್ರಹ ಇದಾಗಿದ್ದು ಜಿಎಸ್​ಎಲ್​ವಿ ಎಫ್​-10 ಲಾಂಚಿಂಗ್ ವೆಹಿಕಲ್ ಮೂಲಕ ಜಿಯೋಸಿಂಕ್ರೊನಸ್ ಟ್ರಾನ್ಸ್‌ಫರ್ ಆರ್ಬಿಟ್‌ನಲ್ಲಿ ಇರಿಸಬೇಕಿತ್ತು.

ಉಪಗ್ರಹದ ಉದ್ದೇಶವೇನಿತ್ತು?

ಬಾಹ್ಯಾಕಾಶದಿಂದ ಕಾಲಕಾಲಕ್ಕೆ ದೇಶದ ಅಗತ್ಯತೆಗಳಿಗೆ ಅನುಗುಣವಾಗಿ ಸ್ಪಷ್ಟವಾದ ಚಿತ್ರಗಳನ್ನು ಇಸ್ರೋ ಮಾಸ್ಟರ್‌ ಕಂಟ್ರೋಲ್ ರೂಂಗೆ ರವಾನಿಸುವುದು. ಮುಖ್ಯವಾಗಿ ಪ್ರಕೃತಿ ವಿಕೋಪದ ಸಂದರ್ಭದಲ್ಲಿ ಇದು ಸಹಕಾರಿಯಾಗಬೇಕಿತ್ತು.