'ಕೈ' ಬಿಟ್ಟ ನವಜೋತ್​ ಸಿಂಗ್​ ಸಿದ್ದು ಪತ್ನಿ... ಮುಂದಿನ ನಡೆ!?

2016ರಲ್ಲಿ ಭಾರತೀಯ ಜನತಾ ಪಕ್ಷಕ್ಕೆ ವಿದಾಯ ಘೋಷಣೆ ಮಾಡಿ ಕಾಂಗ್ರೆಸ್​ ಸೇರಿದ್ದ ನವಜೋತ್​ ಸಿಂಗ್ ಸಿದ್ದು ಪತ್ನಿ ಇದೀಗ ಕಾಂಗ್ರೆಸ್​​ ಪಕ್ಷಕ್ಕೂ ರಾಜೀನಾಮೆ ನೀಡಿದ್ದಾರೆ.

ಚಂಡೀಗಢ:ಈ ಹಿಂದೆ ಭಾರತೀಯ ಜತನಾ ಪಾರ್ಟಿ ಬಿಟ್ಟು ಕಾಂಗ್ರೆಸ್​ ಸೇರಿದ್ದ ಮಾಜಿ ಕ್ರಿಕೆಟರ್​ ನವಜೋತ್​ ಸಿಂಗ್​ ಸಿದ್ದು ಪತ್ನಿ ಇದೀಗ ಕಾಂಗ್ರೆಸ್​ ಪಕ್ಷಕ್ಕೂ ರಾಜೀನಾಮೆ ನೀಡಿದ್ದಾರೆ.

2019ರ ಲೋಕಸಭಾ ಚುನಾವಣೆಯಲ್ಲಿ ಚಂಡೀಗಢ ಲೋಕಸಭಾ ಕ್ಷೇತ್ರದಿಂದ ಕಾಂಗ್ರೆಸ್​ ಅಭ್ಯರ್ಥಿಯಾಗಿ ಕಣಕ್ಕಿಳಿಯಲು ಮುಂದಾಗಿದ್ದ ನವಜೋತ್​ ಸಿಂಗ್​ ಸಿದ್ದು ಪತ್ನಿ ನವಜೋತ್​ ಕೌರ್​ ಸಿದ್ದುಗೆ ಪಕ್ಷ ಟಿಕೆಟ್​ ನೀಡಿರಲಿಲ್ಲ. ಇದರಿಂದ ಅಸಮಾಧಾನಗೊಂಡಿದ್ದ ಅವರು ಇದೀಗ ಕಾಂಗ್ರೆಸ್​ ಪಕ್ಷಕ್ಕೆ ವಿದಾಯ ಹೇಳಿದ್ದಾರೆ ಎಂದು ತಿಳಿದು ಬಂದಿದೆ.

ಇದೇ ವೇಳೆ ಮಾತನಾಡಿರುವ ಅವರು ಮುಂದಿನ ದಿನಗಳಲ್ಲಿ ತಾವು ಯಾವುದೇ ಪಕ್ಷಕ್ಕೂ ಸೇರಿಕೊಳ್ಳುವುದಿಲ್ಲ ಎಂದು ಹೇಳಿರುವ ನವಜೋತ್​ ಕೌರ್​​, ಓರ್ವ ಸಾಮಾಜಿಕ ಕಾರ್ಯಕರ್ತೆಯಾಗಿ ಸೇವೆ ಸಲ್ಲಿಸುವುದಾಗಿ ತಿಳಿಸಿದ್ದಾರೆ.

ಇನ್ನು ಪಂಜಾಬ್​ ಕಾಂಗ್ರೆಸ್​ ಸರ್ಕಾರದಲ್ಲಿ ಸಚಿವರಾಗಿದ್ದ ಗಂಡ ನವಜೋತ್​ ಸಿಂಗ್​ ಸಿದ್ದುಗೂ ಸಹ ಸಚಿವ ಸಂಪುಟ ಪುನರ್​ವಿಂಗಡನೆ ವೇಳೆ ಮಂತ್ರಿ ಸ್ಥಾನದಿಂದ ಕೆಳಗಿಳಿಸಲಾಗಿದೆ. ಈ ಹಿಂದೆ ಬಿಜೆಪಿಯಲ್ಲಿದ್ದಾಗ ಮೊದಲು ಪತ್ನಿ ಪಕ್ಷ ತೊರೆದು, ತದನಂತರ ನವಜೋತ್​ ಬಿಜೆಪಿಗೆ ವಿದಾಯ ಹೇಳಿದ್ದರು. ಈಗಲೂ ಇಂತಹ ಘಟನೆ ನಡೆದರೂ ಅಚ್ಚರಿ ಪಡಬೇಕಾಗಿಲ್ಲ.