ಬಿಜೆಪಿ ಶಾಸಕನಿಗೆ ವಿಶೇಷ ಪಾಸ್​ ನೀಡಿರುವ ವಿಚಾರ: ತನಿಖೆಗೆ ಆದೇಶಿಸಿದ ಬಿಹಾರ ಸರ್ಕಾರ

ಲಾಕ್ ಡೌನ್ ನಡುವೆ ರಾಜಸ್ಥಾನಕ್ಕೆ ತೆರಳಲು ಬಿಜೆಪಿ ಶಾಸಕನಿಗೆ ವಿಶೇಷ ಪಾಸ್​ ನೀಡಿರುವ ಕುರಿತು ವಿರೋಧಗಳು ವ್ಯಕ್ತವಾದ ಹಿನ್ನೆಲೆ ಬಿಹಾರ ಸರ್ಕಾರ ಪ್ರಕರಣ ಕುರಿತು ತನಿಖೆಗೆ ಆದೇಶಿಸಿದೆ.

ಪಾಟ್ನಾ: ಲಾಕ್ ಡೌನ್​ ನಡುವೆ ರಾಜಸ್ಥಾನದ ಕೋಟಾದಲ್ಲಿದ್ದ ತಮ್ಮ ಮಗಳನ್ನು ಕರೆತರಲು ಬಿಜೆಪಿ ಶಾಸಕನಿಗೆ ಪಾಸ್​ ನೀಡಿರುವ ಕುರಿತು ಬಿಹಾರ ಸರ್ಕಾರ ತನಿಖೆಗೆ ಆದೇಶಿಸಿದೆ.

ಲಾಕ್​ ಡೌನ್​ ಹೆಸರಿನಲ್ಲಿ ಜನ ಸಾಮಾನ್ಯರನ್ನು ಹೊರಗಡೆ ಓಡಾಡಲು ಬಿಡದ ನಿತೀಶ್​ ಕುಮಾರ್​ ಸರ್ಕಾರ, ಬಿಜೆಪಿ ಶಾಸಕನಿಗೆ ಪಾಸ್​ ನೀಡುವ ಮೂಲಕ ಇಬ್ಬಗೆ ನೀತಿ ಅನುಸರಿಸುತ್ತಿದೆ ಎಂದು ಸರ್ಕಾರದ ವಿರುದ್ಧ ಪ್ರತಿಪಕ್ಷಗಳು ಹರಿಹಾಯ್ದಿವೆ.

ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಸರ್ಕಾರದ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ಅಮೀರ್ ಸುಭಾನಿ, ಮಾನದಂಡಗಳನ್ನು ಅನುಸರಿಸಿ ಪಾಸ್​ ನೀಡಲಾಗಿದೆಯೇ ಎಂದು ತಿಳಿಯಲು ತನಿಖೆಗೆ ಆದೇಶಿಸಲಾಗಿದೆ. ಪಾಸ್​ ನೀಡುವಲ್ಲಿ ಯಾವುದೇ ನಿಯಮ ಉಲ್ಲಂಘನೆ ನಡೆಸಿದ್ದು ಕಂಡು ಬಂದಲ್ಲಿ ತಪ್ಪಿತಸ್ಥ ಅಧಿಕಾರಗಳ ವಿರುದ್ಧ ಸೂಕ್ತ ಕ್ರಮಕೈಗೊಳ್ಳುವುದಾಗಿ ತಿಳಿಸಿದ್ದಾರೆ.

ನವಾಡ ಜಿಲ್ಲೆಯ ಹಿಸುವಾ ವಿಧಾನಸಭಾ ಕ್ಷೇತ್ರದ ಬಿಜೆಪಿ ಶಾಸಕ ಅನಿಲ್ ಸಿಂಗ್ ಅವರು​ ಏಪ್ರಿಲ್ 16ರಂದು ವಿಶೇಷ ಪಾಸ್​ ಮೂಲಕ ರಾಜಸ್ಥಾನದ ಕೋಟಾಗೆ ವೈದ್ಯಕೀಯ ಕೋಚಿಂಗ್ ಗೆ ತೆರಳಿದ್ದ ತಮ್ಮ ಮಗಳನ್ನು ಕರೆ ತಂದಿದ್ದರು.