ಕೊವಿಡ್​-19 ಚಿಕಿತ್ಸಾ ಕೇಂದ್ರಗಳಿಗಾಗಿ ರೆಸಾರ್ಟ್​ಗಳನ್ನು ನೀಡಲು ಮುಂದಾದ ಆನಂದ್​ ಮಹೀಂದ್ರಾ

ಕೊವಿಡ್​-19 ತಾತ್ಕಾಲಿಕ ಚಿಕಿತ್ಸಾ ಕೇಂದ್ರಗಳಾಗಿ ಬಳಸಿಕೊಳ್ಳಲು ನಮ್ಮ ರೆಸಾರ್ಟ್​ಗಳನ್ನು ನೀಡಲು ಸಿದ್ಧವಿದ್ದೇವೆ ಎಂದು ಆನಂದ್​ ಮಹೀಂದ್ರಾ ಟ್ವೀಟ್​ ಮಾಡಿದ್ದಾರೆ.

ನವದೆಹಲಿ: ದೇಶದಲ್ಲಿ ಕೊರೊನಾ ವೈರಸ್​ ವಿರುದ್ಧದ ಹೋರಾಟದಲ್ಲಿ ಸರ್ಕಾರದೊಂದಿಗೆ ಕೈ ಜೋಡಿಸಲು ಮಹೀಂದ್ರಾ ಗ್ರೂಪ್‌ನ ಸಮೂಹ ಸಂಸ್ಥೆಗಳ ಅಧ್ಯಕ್ಷ ಆನಂದ್​ ಮಹೀಂದ್ರಾ ಮುಂದಾಗಿದ್ದು, ಅವರ ಒಡೆತನದ ರೆಸಾರ್ಟ್​ಗಳನ್ನು ಸೋಂಕಿತರಿಗೆ ಪ್ರತ್ಯೇಕ ಚಿಕಿತ್ಸೆ ನೀಡಲು ಒದಗಿಸುವುದಾಗಿ ತಿಳಿಸಿದ್ದಾರೆ.

ಈಗಾಗಲೇ ಭಾರತ ಕೊವಿಡ್​-19ನ 3ನೇ ಹಂತದಲ್ಲಿದ್ದು, ಇದು ವೈದ್ಯಕೀಯ ಮೂಲಸೌಕರ್ಯಗಳಮೇಲೆ ಭಾರಿ ಒತ್ತಡ ಉಂಟುಮಾಡುತ್ತದೆ. ಬೃಹತ್​ ಪ್ರಮಾಣದಲ್ಲಿ ತಾತ್ಕಾಲಿಕ ಆಸ್ಪತ್ರೆಗಳು ಮತ್ತು ವೆಂಟಿಲೇಟರ್‌ಗಳ ಅಗತ್ಯವಿದೆ. ಹೀಗಾಗಿ ತಾತ್ಕಾಲಿಕ ಚಿಕಿತ್ಸಾ ಕೇಂದ್ರಗಳಾಗಿ ಬಳಸಿಕೊಳ್ಳಲು ನಮ್ಮ ರೆಸಾರ್ಟ್​ಗಳನ್ನು ನೀಡಲು ಸಿದ್ಧವಿದ್ದೇವೆ ಎಂದು ಆನಂದ್​ ಮಹೀಂದ್ರಾ ಟ್ವೀಟ್​ ಮಾಡಿದ್ದಾರೆ.

ಅಲ್ಲದೇ ಮಹೀಂದ್ರಾ ಗ್ರೂಪ್​ ಕಡೆಯಿಂದ ವೆಂಟಿಲೇಟರ್‌ಗಳ ತಯಾರಿಕೆ ಕುರಿತು ಸಹ ಗಮನ ಹರಿಸುವುದಾಗಿ ತಿಳಿಸಿದ್ದು, ಇನ್ನೂ ಕೆಲವು ವಾರಗಳ ಕಾಲ ದೇಶದಲ್ಲಿ ಲಾಕ್‌ಡೌನ್ ಮಾಡುವ ಅವಶ್ಯಕತೆ ಇದೆ ಎಂದು ಆನಂದ್​ ಮಹೀಂದ್ರಾ ಅಭಿಪ್ರಯಾ ವ್ಯಕ್ತಪಡಿಸಿದ್ದಾರೆ.