ಲಿಫ್ಟ್​ ಬಾಗಿಲಲ್ಲಿ ಸಿಲುಕಿ ಬಾಲಕ ದಾರುಣ ಸಾವು - ವಿಡಿಯೋ

ಲಿಫ್ಟ್ ಬಾಗಿಲಲ್ಲಿ ಸಿಲುಕಿ ಹೊರಬರಲಾರದೆ ಬಾಲಕ ಮೃತಪಟ್ಟ ಘಟನೆ ಮುಂಬೈನ ಧಾರಾವಿ ಬಳಿ ನಡೆದಿದೆ.

ಮುಂಬೈ : ಬಾಲಕನೋರ್ವ ಲಿಫ್ಟ್​ನಲ್ಲಿ ಸಿಲುಕಿ ದಾರುಣವಾಗಿ ಮೃತಪಟ್ಟ ಘಟನೆ ಧಾರಾವಿಯ ಶಾಹು ನಗರ ಪೊಲೀಸ್​ ಠಾಣಾ ವ್ಯಾಪ್ತಿಯ ಪಾಲ್ವಾಡಿ ಪ್ರದೇಶದ ಕಟ್ಟಡವೊಂದರಲ್ಲಿ ಸಂಭವಿಸಿದೆ.

ಮೊಹಮ್ಮದ್ ಹುಝೈಫಾ ಸರ್ಫರಾಝ್ ಶೇಖ್ (5) ಮೃತ ಬಾಲಕ. ಈತ ತನ್ನ 7 ವರ್ಷದ ಸಹೋದರಿ ಮತ್ತು 3 ವರ್ಷದ ಸಹೋದರನ ಜೊತೆ, ತಾವು ವಾಸಿಸುತ್ತಿದ್ದ ಕಟ್ಟಡದ ಲಿಫ್ಟ್ ಏರಿದ್ದ. ಹೀಗೆ ಲಿಫ್ಟ್ ಏರಿದ ಮೂವರು ಮಕ್ಕಳು ಕಟ್ಟಡದ ಕೆಳ ಮಹಡಿಗೆ ತಲುಪುತ್ತಾರೆ. ಈ ವೇಳೆ ಲಿಫ್ಟ್ ನ ಬಾಗಿಲು ತೆರೆಯುತ್ತದೆ. ಇಬ್ಬರು ಮಕ್ಕಳು ಹೊರ ಹೋಗುತ್ತಾರೆ. ಆದರೆ ಹುಝೈಫಾ ಮಾತ್ರ ಲಿಫ್ಟ್​ನ ಕಬ್ಬಿಣದ ಗ್ರಿಲ್ ಮತ್ತು ಮರದ ಬಾಗಿಲ ಮಧ್ಯೆ ಸಿಲುಕಿಕೊಳ್ಳುತ್ತಾನೆ. ಬಾಲಕ ಹುಝೈಫಾ ಬಾಗಿಲು ತೆರೆದು ಹೊರ ಹೋಗಲು ಪ್ರಯತ್ನಿಸಿದರೂ, ಅಷ್ಟೊತ್ತಿಗಾಗಲೇ ಲಿಫ್ಟ್ ಚಾಲನೆಗೊಂಡಿತ್ತು. ಹೀಗಾಗಿ ಹುಝೈಫಾ ಹೊರ ಬರಲಾಗದೆ, ಲಿಫ್ಟ್ ಒಳಗಡೆ ಸಿಲುಕಿ ದಾರುಣವಾಗಿ ಕೊನೆಯುಸಿರೆಳೆದಿದ್ದಾನೆ. ಘಟನೆಯ ದೃಶ್ಯ ಲಿಫ್ಟ್​ ಒಳಗಡೆ ಅಳವಡಿಸಿದ್ದ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.

ಮುಂಬೈನ ಸಿಯಾನ್ ಆಸ್ಪತ್ರೆ ವೈದ್ಯಾಧಿಕಾರಿ ಬಾಲಕನ ಪರೀಕ್ಷೆ ನಡೆಸಿ ಮೃತಪಟ್ಟಿದ್ದಾಗಿ ಘೋಷಿಸಿದ್ದಾರೆ. ಘಟನೆಗೆ ಲಿಫ್ಟ್​ನ ಯಾವುದೇ ತಾಂತ್ರಿಕ ದೋಷ ಕಾರಣವಲ್ಲ, ಇದೊಂದು ಆಕಸ್ಮಿಕ ಘಟನೆಯೆಂದು ತಿಳಿದು ಬಂದಿದೆ. ಈ ಕುರಿತು ಪ್ರಕರಣ ದಾಖಲಾಗಿದ್ದು, ಉಪ ಪೊಲೀಸ್ ಇನ್ಸ್‌ಪೆಕ್ಟರ್ ಸಂದೀಪ್ ಸಾವಂತ್ ಮತ್ತು ಹಿರಿಯ ಪೊಲೀಸ್ ಇನ್ಸ್‌ಪೆಕ್ಟರ್ ವಿಲಾಸ್ ಗಂಗವಾನೆ ಹೆಚ್ಚಿನ ತನಿಖೆ ನಡೆಸುತ್ತಿದ್ದಾರೆ.