ಕೋವಿಡ್ ಮಹಾಮಾರಿಗೆ 5 ತಿಂಗಳ ಮಗು ಬಲಿ; ಹೆಚ್ಚಿದ ಆತಂಕ

ಎರಡನೇ ಹಂತದ ಕೋವಿಡ್ ಅಲೆಗೆ ದೆಹಲಿಯಲ್ಲಿ 5 ತಿಂಗಳ ಮಗುವೊಂದು ಬಲಿಯಾಗಿದ್ದು, ಜನರಲ್ಲಿ ಮತ್ತಷ್ಟು ಆತಂಕ ಮೂಡಿಸಿದೆ.

ನವದೆಹಲಿ: ಮಹಾಮಾರಿ ಕೊರೊನಾ ವೈರಸ್​ಗೆ ಇದೀಗ ಐದು ತಿಂಗಳ ಮಗುವೊಂದು ಬಲಿಯಾಗಿರುವ ಘಟನೆ ದೆಹಲಿಯಲ್ಲಿ ನಡೆದಿದ್ದು, ಅದರ ಕುಟುಂಬದ ಆಕ್ರಂದನ ಮುಗಿಲು ಮುಟ್ಟಿದೆ.

ಜ್ವರದಿಂದ ಬಳಲುತ್ತಿದ್ದ ಐದು ತಿಂಗಳ ಮಗುವನ್ನ ದಿಲ್ಶಾದ್ ಗಾರ್ಡ್​​ನಲ್ಲಿರುವ ಮಕ್ಕಳ ಆಸ್ಪತ್ರೆಗೆ ಕರೆದುಕೊಂಡು ಹೋಗಿದ್ದಾರೆ. ತದನಂತರ ಚಾಚಾ ನೆಹರೂ ಬಾಲ್​ ಚಿಕಿತ್ಸಾಲಯಕ್ಕೆ ಮಗುವನ್ನ ಕರೆದುಕೊಂಡು ಹೋಗಲಾಗಿದ್ದು, ಅಲ್ಲಿ ಸೋಂಕು ತಗುಲಿರುವುದು ದೃಢಗೊಂಡಿದೆ. ಹೀಗಾಗಿ ಮಗುವನ್ನ ಜಿಟಿಬಿ ಆಸ್ಪತ್ರೆ ಕರೆದೊಯ್ಯಲಾಗಿದೆ. ಮಗುವನ್ನ ಮೇ. 6ರಿಂದ ವೆಂಟಿಲೇಟರ್​​ನಲ್ಲಿಟ್ಟಿದ್ದರೂ ಮೇ 12ರಂದು ಸಾವನ್ನಪ್ಪಿದೆ. ಸೀಮಾಪುರಿ ಶವಾಗಾರದಲ್ಲಿ ಮಗುವಿನ ಅಂತ್ಯಕ್ರಿಯೆ ನಡೆಸಲಾಗಿದೆ.

ಕೊರೊನಾ ವೈರಸ್​ನ ಎರಡನೇ ಹಂತದ ಕೋವಿಡ್​ ಮಕ್ಕಳಲ್ಲಿ ಹೆಚ್ಚಾಗಿ ಕಂಡು ಬರುತ್ತಿದ್ದು, ದೇಶದಲ್ಲಿ ಈಗಾಗಲೇ ಸಾವಿರಾರು ಮಕ್ಕಳಿಗೆ ಈ ಸೋಂಕು ಕಂಡು ಬಂದಿದೆ. ಆದರೆ ಇದೀಗ ಐದು ತಿಂಗಳ ಮಗುವೊಂದು ಸಾವನ್ನಪ್ಪಿದ್ದು, ಎಲ್ಲರಲ್ಲೂ ಮತ್ತಷ್ಟು ಆತಂಕ ಮೂಡಿಸಿದೆ.