3,648 ಬಾಲಕಿಯರು ಸೇರಿ 4,169 ಮಕ್ಕಳು ನಾಪತ್ತೆ: ಲಾಕ್​ಡೌನ್‌ನಲ್ಲಿ ಮಾನವ ಕಳ್ಳಸಾಗಣೆ ವಿಪರೀತ

ಲಾಕ್​ಡೌನ್ ಸಂದರ್ಭದಲ್ಲಿ ಮಧ್ಯಪ್ರದೇಶದಲ್ಲಿ ಮಾನವ ಕಳ್ಳಸಾಗಣೆ ಜೋರಾಗಿ ನಡೆದಿರುವುದು ತಿಳಿದು ಬಂದಿದ್ದು, ಸಾವಿರಾರು ಬಾಲಕಿ-ಬಾಲಕರು ನಾಪತ್ತೆಯಾಗಿದ್ದಾರೆ.

ಭೋಪಾಲ್​(ಮಧ್ಯಪ್ರದೇಶ): ಕೊರೊನಾ ವೈರಸ್​ ಸಂದರ್ಭದಲ್ಲಿ ಎಲ್ಲವೂ ಬಂದ್​ ಆಗಿತ್ತು. ವಾಹನ ಸಂಚಾರದ ಮೇಲೆ ಕಟ್ಟುನಿಟ್ಟಿನ ನಿಗಾ ವಹಿಸಲಾಗಿತ್ತು. ಆದರೆ ಈ ಸಂದರ್ಭದಲ್ಲೇ ಮಧ್ಯಪ್ರದೇಶದಲ್ಲಿ ಮಾನವ ಕಳ್ಳಸಾಗಣೆ ಬಲು ಜೋರಾಗಿ ನಡೆದಿರುವುದು ಬೆಳಕಿಗೆ ಬಂದಿದೆ. 2020ರ ಏಪ್ರಿಲ್​ ತಿಂಗಳಿಂದ 2021ರ ಜೂನ್​ ತಿಂಗಳಲ್ಲಿ ಒಟ್ಟು 4,169 ಮಕ್ಕಳ ಕಳ್ಳಸಾಗಣೆ ಮಾಡಲಾಗಿದೆ ಎಂದು ತಿಳಿದು ಬಂದಿದೆ.

ಮಧ್ಯಪ್ರದೇಶದಲ್ಲಿ ಮಾನವ ಕಳ್ಳಸಾಗಣೆ ತಡೆಯಲು 'ಆಪರೇಷನ್​ ಮುಸ್ಕಾನ್' ನಡೆಸಲಾಗುತ್ತಿದ್ದು, ಈ​​ ಮೂಲಕ 1,249 ಮಕ್ಕಳ ರಕ್ಷಣೆ ಮಾಡಲಾಗಿದೆ. ಲಾಕ್​ಡೌನ್​ ಸಂದರ್ಭದಲ್ಲಿ ಕಟ್ಟುನಿಟ್ಟಿನ ಮಾರ್ಗಸೂಚಿ ಹೊರಗಾಗಿ ಕೂಡ ಇಷ್ಟೊಂದು ಮಕ್ಕಳ ಕಳ್ಳಸಾಗಣೆ ಮಾಡಿರುವುದು ಹೆಚ್ಚಿನ ಆತಂಕಕ್ಕೆ ಕಾರಣವಾಗಿದೆ. ಕೇವಲ ಏಪ್ರಿಲ್​-ಮೇ ತಿಂಗಳಲ್ಲಿ ರಾಜ್ಯದಿಂದ 1,574 ಮಕ್ಕಳು ನಾಪತ್ತೆಯಾಗಿದ್ದಾರೆ. ಜೂನ್ ತಿಂಗಳಲ್ಲಿ 912 ಬಾಲಕಿಯರು ಸೇರಿ 1,068 ಮಕ್ಕಳು ನಾಪತ್ತೆಯಾಗಿದ್ದಾರೆ.

ಮಧ್ಯಪ್ರದೇಶದಲ್ಲಿ ಸದ್ಯ ಅನ್​ಲಾಕ್​ ಮಾಡಲಾಗಿದ್ದು, ಈ ಸಂದರ್ಭದಲ್ಲಿ ಹೆಚ್ಚಿನ ಮಕ್ಕಳು ಕಣ್ಮರೆಯಾಗುತ್ತಿರುವುದು ಕಂಡು ಬಂದಿದೆ. ಇದೇ ತಿಂಗಳು ರಾಜ್ಯಾದ್ಯಂತ 832 ಮಕ್ಕಳು ಕಾಣೆಯಾಗಿದ್ದು, ಇದರಲ್ಲಿ 92 ಬಾಲಕರು ಹಾಗೂ 740 ಬಾಲಕಿರು ಸೇರಿಕೊಂಡಿದ್ದಾರೆ. ಆದರೆ 543 ಮಕ್ಕಳ ರಕ್ಷಣೆ ಮಾಡುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ.

2020ರ ಏಪ್ರಿಲ್ ತಿಂಗಳಲ್ಲಿ 271 ಮಕ್ಕಳು ಕಾಣೆಯಾಗಿದ್ದು, ಇದರಲ್ಲಿ 220 ಬಾಲಕಿಯರು ಸೇರಿಕೊಂಡಿದ್ದರು, ಅದೇ ರೀತಿ 2020ರ ಮೇ ತಿಂಗಳಲ್ಲಿ 506 ಮಕ್ಕಳಲ್ಲಿ 443 ಬಾಲಕಿಯರು ಸೇರಿಕೊಂಡಿದ್ದಾಗಿ ವರದಿಯಾಗಿದೆ.