અમદાવાદને મળશે 7 નવા આઇકોનિક રોડ, PM મોદીના હસ્તે 8 હજાર કરોડથી વધુના કાર્યોનું ઇ-લોકાર્પણ - PM Modi Gujarat visit

અમદાવાદ GMDC ગ્રાઉન્ડ ખાતે યોજાનાર કાર્યક્રમમાં વડાપ્રધાન નરેન્દ્ર મોદી ઔડા (Ahmedabad urban development authority) અને અમદાવાદ મહાનગરપાલિકાના અંદાજે 8 હજાર કરોડથી વધુના કામોનું ઈ-લોકાર્પણ અને ઈ-ખાતમુહૂર્ત કરશે.

અમદાવાદ : વડાપ્રધાન નરેન્દ્ર મોદી ત્રીજી વખત વડાપ્રધાન બન્યા બાદ પ્રથમવાર પોતાના વતન ગુજરાતની મુલાકાતે આવ્યા છે. આજ રોજ પીએમ મોદીના હસ્તે અમદાવાદ શહેરમાં 8 હજાર કરોડથી વધુના કામોનું લોકાર્પણ અને ખાતમુહૂર્ત કરવામાં આવશે.

અમદાવાદને મળશે 7 નવા આઇકોનિક રોડ :વડાપ્રધાન નરેન્દ્ર મોદી 7 આઈકોનિક રોડ અને 4 જંકશન પર બ્રિજના કામનું ઈ-ખાતમુહૂર્ત કરશે. અંદાજિત 81.44 કરોડના ખર્ચે બાકરોલ જંક્શન બ્રિજ, 98.72 કરોડના ખર્ચે હાથીજણ જંક્શન બ્રિજ, 102 કરોડના ખર્ચે રામોલ જંક્શન બ્રિજ, 108 કરોડના ખર્ચે વસ્ત્રાલ પાંજરાપોળ જંક્શન બ્રિજ, સાથે 7 આઈકોનિક રોડનું. ઈ-લોકાર્પણ અને ઈ-ખાતમુહૂર્ત કરવામાં આવશે.

• 4 જંકશન પર ઓવરબ્રિજ :

1. બાકરોલ જંક્શન બ્રિજ
2. હાથીજણ જંકશન બ્રિજ
3. રામોલ જંક્શન બ્રિજ
4. વસ્ત્રાલ પાંજરાપોળ જંક્શન બ્રિજ

• 7 આઇકોનિક રોડ :

1. આશ્રમરોડ
2. એરપોર્ટ સર્કલથી ડફનાળા જંકશન
3. કેશવબાગ જંકશનથી પકવાન જંકશન
4. ઇસ્કોનથી પકવાન જંકશન
5. કેનયુગથી શ્યામલ થઇ એસ.જી. હાઇવે
6. વિસત સર્કલથી તપોવન સર્કલ
7. નરોડા મુક્તિધામથી દહેગામ જંકશન

આઇકોનિક રોડની વિશેષતાઓ :આ આઈકોનિક રોડમાં કેનયુગ-એસજી હાઇવેના રોડને ઓલમ્પિક થીમ પર ડેવલપ કરવામાં આવશે. જેમાં થીમબેઝ ડેવલમેન્ટ-લેન્ડસ્કેપિંગ હશે. સાથે જ રાહદારીઓ માટે 2 થી ૩ મીટરનો ફૂટપાથ, થ્રી લેન રોડ અને સેન્ટ્રલ મિડિયન 1 થી 1.5 મીટર પહોળા તથા સેન્ટ્રલ મિડિયનમાં ગ્રીનરી-પ્લાન્ટેશન હશે. જ્યાં રોડ પહોળા હશે ત્યાં સર્વિસ રોડ બનશે અને ઇન્ટીગ્રેટેડ લેન્ડ સ્કેપ લાઇટીંગ સાથે વેન્ડીંગ ઝોન, ગઝેબો સાથે બફર ઝોન બનાવાશે. સાથે જ રોડની પહોળાઈ મુજબ ઓન સ્ટ્રીટ પાર્કિંગ પણ બનશે.

અન્ય લોકાર્પણના કામો :આ સાથે નરોડામાં 81.73 કરોડના અને ઝુંડાલમાં બનાવાયેલા 128 કરોડના આવાસનું ઈ-લોકાર્પણ તથા વોટર ડિસ્ટ્રિબ્યુશન સ્ટેશન અને 15.46 કરોડના શેલ્ટર હોમનું ઇ-લોકાર્પણ કરવામાં આવશે.