ભુજની ગૃહિણી બની ડિજિટલ એરેસ્ટનો શિકાર, જાણો આરોપીઓની મોડસ ઓપરેન્ડી

ભુજના માધાપરની મહિલા સાથે ડિજિટલ એરેસ્ટનો બનાવ બન્યો છે. આરોપીએ પાર્સલમાં નકલી પાસપોર્ટ, ડ્રગ્સ, ડોલર હોવાનું જણાવી છેતરપિંડી કરી હતી.

કચ્છ :માધાપર ગામના માનવીબેન સાથે ડિજિટલ એરેસ્ટનો બનાવ બન્યો છે. મહિલાને અજાણ્યા નંબર પરથી ફોન કે, તેમના પાર્સલમાં ડ્રગ્સ-ડોલર અને નકલી પાસપોર્ટ મળ્યા છે. ઉપરાંત મુંબઈ ક્રાઈમ બ્રાન્ચમાંથી બોલતા હોવાનું જણાવી ઓનલાઈન રૂ. 96,776ની છેતરપિંડી કરવામાં આવી હતી. જોકે, સાયબર ક્રાઈમ સેલે આ રકમ ફ્રિઝ કરાવી મહિલાને પરત અપાવી હતી.

ડિજિટલ એરેસ્ટનો કિસ્સો :સાયબર ક્રાઇમ સેલમાંથી મળતી વિગતો મુજબ માધાપરના ગૃહિણી માનવીબેનને એક અજાણ્યા નંબરથી ફોન આવ્યો અને જણાવ્યું કે, તમારું પાર્સલ ફેડએક્સ કુરિયરમાંથી પરત થયું છે. જો તમે કસ્ટમર કેરમાં વાત કરવા માંગતા હોવ તો 2 નંબર દબાવીને વાત કરી શકો છો. વધુમાં જણાવ્યું કે, પાર્સલ કસ્ટમ ડિપાર્ટમેન્ટ દ્વારા ઝડપી પાડવામાં આવ્યું છે. તેમાં MD ડ્રગ્સ, હાર્ડ ડ્રાઈવ, ડોલર તથા નકલી પાસપોર્ટ છે. આ બાબતે મુંબઈ ક્રાઈમ બ્રાન્ચમાં મહિલા વિરુદ્ધ FIR પણ દાખલ કરવામાં આવી છે.

આરોપીઓની મોડસ ઓપરેન્ડી :કસ્ટમર કેરના સ્ટાફે મહિલાને વધુમાં જણાવ્યું કે, જો આ પાર્સલ મહિલાએ મંગાવ્યું ન હોય તો મુંબઈ ક્રાઈમ બ્રાન્ચને રૂબરૂ રજૂઆત કરી શકે છે. આ બાદ મુંબઈ ક્રાઈમ બ્રાન્ચના અધિકારીની ઓળખ આપી એક વ્યકિતએ મહિલાને જણાવ્યું કે, આ પાર્સલ તમારા નામે ઈરાનના શેખે મોકલ્યું છે. જેમાં ડ્રગ્સ, નકલી પાસપોર્ટ, ડોલર અને હાર્ડ ડ્રાઇવ મળી આવી છે. સાથે જ સ્કાયપ પર વિડીયો કોલમાં ખોટું આઈકાર્ડ તથા બનાવટી FIR પણ બતાવી.

96 હજારની છેતરપિંડી :મુંબઈ ક્રાઈમ બ્રાન્ચના અધિકારી સાથે વાત કરી રહ્યા હોવાનું માની મહિલા ડરી ગયા હતા. ફોન પૂર્ણ થયા બાદ નકલી અધિકારીએ ગૃહિણીને એક પત્ર મોકલ્યો, જેમાં FIR ની કોપી હતી. સાથે જ જણાવ્યું કે, જો તમે કોઈ ક્રાઈમ ન કર્યું હોય તો જણાવેલ એકાઉન્ટ નંબર પર 96,776 રૂપિયા મોકલો. જેથી તમારા ખાતાની વિગતો ચકાસી અને રકમ આવ્યા બાદ 15 મીનીટમાં જ રૂપિયા ખાતામાં પરત કરી દેવામાં આવશે.

સાયબર પોલીસની કાર્યવાહી :મહિલાએ ડરમાં નાણાં મોકલી દીધા હતા. ત્યારબાદ નકલી અધિકારીએ વધુ નાણા માંગતા ફ્રોડ થયું હોવાનું ધ્યાને આવતા મહિલાએ તુરંત પોતાના પતિને ફોન કરી જાણ કરી હતી. માનવીબેનના પતિએ તરત સાયબર સેલનો સંપર્ક કરતા સ્ટાફ દ્વારા ભોગ બનનારને મદદરૂપ થઈ તાત્કાલિક પત્રવ્યવહાર તથા ટેક્નિકલ રિસોર્સના આધારે અરજદારે ગુમાવેલી પૂરે-પૂરી રકમ તેમના ખાતામાં પરત અપાવી હતી.

જનહિતમાં સૂચના :ઉલ્લેખનીય છે કે, ઓનલાઇન છેતરપિંડીના બનાવમાં નાણાં ફ્રોડ કરનારના ખાતામાં ગયા હોય અને ત્યાંથી અન્ય બેંક એકાઉન્ટ સાથે વ્યવહાર થાય તે પહેલાં વહેલી તકે સાયબર ક્રાઈમ સેલનો સંપર્ક કરવામાં આવે તો નાણાં પરત મળવાની સંભાવના વધી જાય છે. જેથી જે પણ વ્યક્તિ સાથે ફ્રોડ થાય તેમને તાત્કાલિક સાયબર ક્રાઇમ બ્રાન્ચને સંપર્ક કરવું જરૂરી છે.