કચ્છ: વિશ્વ વિખ્યાત કચ્છનું સફેદ રણ દુનિયાભરના લાખો પ્રવાસીઓને આકર્ષે છે. નવેમ્બરથી ફેબ્રુઆરી સુધીમાં રણોત્સવની મુલાકાતે લાખોની સંખ્યામાં મુલાકાતીઓ આવતા હોય છે. પરંતુ આ વર્ષે કચ્છમાં આવેલ અતિભારે વરસાદના કારણે હજુ સુધી કચ્છના સફેદ રણમાં પાણી ભરાયેલું છે અને દરિયાની જેમ ઠેર ઠેર પાણી જ જોવા મળી રહ્યું છે. સફેદ રણના આ દ્રશ્યો દરિયા જેવા દેખાઈ રહ્યા છે. સફેદ રણની ચમક હજુ સુધી પ્રવાસીઓને જોવા નહીં મળે, દૂર દૂર સુધી જ્યાં નજર પહોંચે છે ત્યાં પાણી જ પાણી જોવા મળે છે.
સફેદ રણમાં જ્યાં જોવો ત્યાં પાણી જ પાણી
વિશ્વભરના પ્રવાસીઓ અન્ય રાજ્યો અને દેશોથી કચ્છ માત્ર સફેદ રણનો નજારો માણવા આવતા હોય છે. જોકે આ વખતે તેમણે સફેદ રણનો નજારો જોયા વગર જ પાછા જવું પડશે તેવી સ્થિતિ હાલ છે. આગામી 11 નવેમ્બરથી કચ્છના સફેદ રણમાં ઉજવાતો રણોત્સવ યોજાવા જઈ રહ્યો છે. ત્યારે હજુ સુધી રણમાં વરસાદના પાણી ભરાયાં છે જેને લીધે હજુ સુધી મીઠું પાક્યું નથી માટે આ વખતે રણોત્સવની મજા પણ ખરાબ થશે તેવું લાગી રહ્યું છે.
જો હવે વરસાદ ના પડે તો નવેમ્બર માસના અંત સુધીમાં પાણી સુકાઈ જશે
રણોત્સવ જે સ્થળે યોજાય છે તે ગામના સરપંચ મિયા હુસેને જણાવ્યું હતું કે, રણમાં પાણી તો ભરાયેલું છે પરંતુ નવેમ્બર મહિનાના અંત સુધીમાં રણ બની જશે. જેથી કરીને ડિસેમ્બરમાં લોકો રણની મજા માણી શકશે. હાલમાં વારંવાર કમોસમી વરસાદ વરસી રહ્યો છે, જેને કારણે રણમાં પાણી સુકાવાનું મોડું થતું જઈ રહ્યુ છે. હવે જો વરસાદના થાય તો રણમાં ભરાયેલું પાણી સુકાઈ જશે અને ડિસેમ્બરમાં પ્રવાસીઓ રણોત્સવ માણી શકશે.