ભારતીય પુરૂષ હોકી ટીમનું શાનદાર પ્રદર્શન, આર્જેન્ટિના સાથે 1-1થી ડ્રો કરી - Paris Olympics 2024

ભારતીય પુરૂષ હોકી ટીમ પેરિસ ઓલિમ્પિક 2024માં શાનદાર પ્રદર્શન કરવાનું ચાલુ રાખે છે. સોમવારે ભારતે આર્જેન્ટિના સાથે કપરા મુકાબલામાં 1-1થી ડ્રો કરી હતી.

પેરિસ (ફ્રાન્સ): ભારતીય પુરૂષ હોકી ટીમે પેરિસ ઓલિમ્પિક 2024ની તેની બીજી ગ્રુપ સ્ટેજ મેચમાં શાનદાર પ્રદર્શન કર્યું છે. હરમનપ્રીત સિંહની આગેવાની હેઠળની ભારતીય ટીમે સોમવારે આર્જેન્ટિના સાથે 1-1થી ડ્રો રમી હતી. આર્જેન્ટિનાના તરફથી એકમાત્ર ગોલ લુકાસ માર્ટિનેઝે (22મી મિનિટે) કર્યો હતો. તે જ સમયે, મેચ સમાપ્ત થવાની માત્ર 1 મિનિટ પહેલા, ભારતીય સુકાની હરમનપ્રીત સિંહે પેનલ્ટી કોર્નરને ગોલમાં ફેરવીને સ્કોર 1-1થી બરાબર કર્યો હતો.

બીજા ક્વાર્ટરમાં આર્જેન્ટિનાએ કર્યો ગોલ: ભારતે મેચની શરૂઆત આક્રમણથી કરી હતી. પહેલા ક્વાર્ટરમાં બંને ટીમોને ગોલ કરવાની ઘણી તકો મળી હતી. પરંતુ, બંને ટીમો ગોલ કરવામાં નિષ્ફળ રહી હતી. પરિણામે પ્રથમ ક્વાર્ટર ગોલ રહિત રહ્યું હતું. બીજા ક્વાર્ટરમાં ભારતીય ખેલાડીઓએ ઘણી શાનદાર તકો સર્જી પરંતુ ગોલ કરી શક્યા નહીં. ત્યારબાદ 22મી મિનિટે લુકાસ માર્ટિનેઝના શાનદાર ગોલની મદદથી આર્જેન્ટિનાએ હાફ ટાઈમમાં ભારત પર 1-0ની સરસાઈ મેળવી લીધી હતી.

ત્રીજો ક્વાર્ટર રોમાંચક રહ્યો: મેચના ત્રીજા ક્વાર્ટરમાં ભારતે આક્રમણની શરૂઆત કરી હતી. ભારતના સુખજીતે 33મી મિનિટે શાનદાર શોટ કર્યો હતો. પરંતુ આર્જેન્ટિનાના ગોલકીપરે શાનદાર બચાવ કર્યો હતો. ભારતીય ખેલાડીઓએ ત્રીજા ક્વાર્ટરમાં ઘણા વળતા હુમલા કર્યા પરંતુ તેઓ આર્જેન્ટિનાના સંરક્ષણને ભેદવામાં નિષ્ફળ રહ્યા. આર્જેન્ટિનાને 38મી મિનિટે ફરીથી પેનલ્ટી સ્ટ્રોક મળ્યો, જેને તેઓ ગોલમાં ફેરવવામાં નિષ્ફળ રહ્યા.