નવી દિલ્હીઃ સ્પોર્ટ્સ ક્ષેત્રે ભારત અને પાકિસ્તાન વચ્ચેની હરીફાઈને લઈને ભારતીય ચાહકો હંમેશા ઉત્સાહિત હોય છે. આ બંને કટ્ટર હરીફ વચ્ચેની આગામી મેચની તારીખ જાહેર કરવામાં આવી છે.
13 જાન્યુઆરીએ યોજાશે ભારત-પાકિસ્તાનની મેચ:
ખો-ખો ફેડરેશન ઓફ ઈન્ડિયા (KKFI) એ બુધવારે જાહેરાત કરી છે કે, ખો-ખો વર્લ્ડ કપ 2025 નવી દિલ્હીમાં 13 જાન્યુઆરીથી 19 જાન્યુઆરી દરમિયાન યોજાશે. આયોજકોએ એવી પણ જાહેરાત કરી છે કે, ટૂર્નામેન્ટની શરૂઆતની મેચ યજમાન ભારત અને પાકિસ્તાન વચ્ચે 13 જાન્યુઆરીએ રમાશે.
ખો-ખો વર્લ્ડ કપમાં 24 દેશો ભાગ લેશે:
આ ખો-ખો વર્લ્ડ કપ એક સપ્તાહ સુધી ચાલશે. આ ટુર્નામેન્ટમાં 24 દેશોના 21 પુરૂષ અને 20 મહિલા ટીમ ભાગ લેશે,અને ટુર્નામેન્ટ માટે ભારત આવશે. જવાહરલાલ નહેરુ સ્ટેડિયમમાં આયોજિત રાષ્ટ્રીય ખેલાડીઓની તાલીમ શિબિરમાં મીડિયાની સામે આ જાહેરાત કરવામાં આવી હતી, જેમાં KKFI પ્રમુખ સુધાંશુ મિત્તલ, મહાસચિવ એમએસ ત્યાગી સહિત ભારતીય પુરૂષ અને મહિલા ખેલાડીઓ અને કોચ હાજર રહ્યા હતા.
ફાઈનલ મેચ 19 જાન્યુઆરીએ યોજાશે:
ખો ખો વર્લ્ડ કપના સીઈઓ વિક્રમ દેવ ડોગરાએ અહીં પત્રકારોને જણાવ્યું કે, 'ગ્રૂપ સ્ટેજની મેચ 13 જાન્યુઆરીથી શરૂ થશે. ભારત અને પાકિસ્તાન વચ્ચે 13 જાન્યુઆરીએ ઉદ્ઘાટન મેચ રમાશે. આ પહેલા ઉદ્ઘાટન સમારોહનું આયોજન કરવામાં આવશે. તેમણે કહ્યું કે, 'આ પછી 14, 15 અને 16 જાન્યુઆરીએ ગ્રુપ સ્ટેજની મેચો પણ રમાશે. આ ઉપરાંત ક્વાર્ટર ફાઈનલ 17 જાન્યુઆરીએ, સેમી ફાઈનલ 18 જાન્યુઆરીએ અને ફાઈનલ 19 જાન્યુઆરીએ રમાશે.
સલમાન ખાન બ્રાન્ડ એમ્બેસેડર બન્યો:
ખો-ખો ફેડરેશન ઓફ ઈન્ડિયા (KKFI) એ ખો-ખો વર્લ્ડ કપની પ્રથમ આવૃત્તિને પ્રમોટ કરવા માટે ભારતીય સુપરસ્ટાર સલમાન ખાનને બ્રાન્ડ એમ્બેસેડર તરીકે નિયુક્ત કર્યા છે. સલમાને અગાઉ ખો-ખો વર્લ્ડ કપ માટે પોતાની ખુશી વ્યક્ત કરી હતી.
મેગા સ્ટારે એક સંદેશમાં કહ્યું, 'મને ખો-ખો વર્લ્ડ કપ 2025 સાથે સંકળાયેલા હોવાનો ગર્વ છે, જે પ્રથમ ભારતમાં વખત યોજાઈ રહ્યો છે! આ માત્ર ટુર્નામેન્ટ નથી – તે ભારતની માટી, ભાવના અને શક્તિને શ્રદ્ધાંજલિ છે. મારા સહિત આપણે બધાએ આપણા જીવનમાં અમુક સમયે ખો-ખો રમ્યા જ હોઈશું.
તેણે આગળ કહ્યું, 'તે સતત એક્શન અને સતત ઉત્તેજના સાથેની રમત છે, જેણે પહેલેથી જ વૈશ્વિક ધ્યાન આકર્ષિત કર્યું છે. ચાલો આપણે બધા સાથે મળીને વૈશ્વિક મંચ પર ખો-ખોની ભાવનાની ઉજવણી કરીએ.
આ પણ વાંચો:
- 6 વર્ષ પછી ઘરઆંગણે ઝીમ્બાબ્વે મેચ જીતીને તેની હારનો સિલસિલો સમાપ્ત કરશે? રોમાંચક મેચ અહીં જુઓ લાઈવ
- ક્રિકેટ જગતમાં એક યુગનો અંત: ભારત - ઓસ્ટ્રેલિયા ટેસ્ટ સિરીઝ દરમિયાન આ ભારતીય ખેલાડીએ ટીમને કહ્યું અલવિદા
