પુણે (મહારાષ્ટ્ર): ભારતીય ક્રિકેટ ટીમે પુણેના મહારાષ્ટ્ર ક્રિકેટ એસોસિએશન સ્ટેડિયમ ખાતે રમાયેલી ચોથી ટી20 મેચમાં ઇંગ્લેન્ડને 15 રનથી હરાવ્યું. આ સાથે, સૂર્યકુમાર યાદવની આગેવાની હેઠળની ભારતીય ટીમે જોસ બટલરની ઈંગ્લેન્ડ સામે પાંચ મેચની T20 શ્રેણી જીતી લીધી છે. ચાર મેચના અંત પછી શ્રેણી 3-1 થી બરાબર છે. હવે, ટીમ ઈન્ડિયા પાસે વાનખેડે ખાતે રમાનારી પાંચમી અને અંતિમ મેચમાં 4-1થી શ્રેણી જીતવાની તક રહેશે.
ભારતે શ્રેણી જીતી લીધી:
આ મેચમાં ઇંગ્લેન્ડે ટોસ જીતીને ભારતને પહેલા બેટિંગ માટે આમંત્રણ આપ્યું હતું. હાર્દિક પંડ્યા અને શિવમ દુબેની અડધી સદીની મદદથી ટીમ ઈન્ડિયાએ 20 ઓવરમાં 9 વિકેટ ગુમાવીને 181 રન બનાવ્યા. ભારત દ્વારા આપવામાં આવેલા 182 રનના લક્ષ્યાંકનો પીછો કરતા ઇંગ્લેન્ડ 19.4 ઓવરમાં 166 રનમાં ઓલઆઉટ થઈ ગયું. આ સાથે, ભારતે મેચ 15 રનથી જીતીને શ્રેણી જીતી લીધી.
સારી શરૂઆત બાદ ઇંગ્લેન્ડ હાર્યું:
ફિલ સોલ્ટ અને બેન ડકેટે ઇંગ્લેન્ડને સારી શરૂઆત અપાવી. બંનેએ પહેલી વિકેટ માટે 62 રન જોડ્યા હતા. પરંતુ ત્યારબાદ ડકેટ 39 અને સોલ્ટ 29 રને આઉટ થયા હતા. આ પછી, બટલર 2 રન બનાવીને આઉટ થયો અને લિયામ લિવિંગસ્ટોન 9 રન બનાવીને આઉટ થયો. આ દરમિયાન, હેરી બ્રુકે શાનદાર અડધી સદી ફટકારી. તેણે 25 બોલમાં 5 ચોગ્ગા અને 2 છગ્ગાની મદદથી 50 રન પૂરા કર્યા. પરંતુ તે 51 રનના વ્યક્તિગત સ્કોર પર વરુણ ચક્રવર્તીનો શિકાર બન્યો.
ઇંગ્લેન્ડને હરાવવામાં આ 2 બોલરોનું યોગદાન:
આ પછી, ઇંગ્લેન્ડનો બીજો કોઈ બેટ્સમેન મોટી ઇનિંગ્સ રમી શક્યો નહીં અને ઇંગ્લેન્ડ 166 રનમાં ઓલઆઉટ થઈ ગયું. આ મેચમાં, શિવમ દુબેને બેટિંગ કરતી વખતે માથા પર બોલ વાગ્યો હતો, જેના કારણે હર્ષિત રાણા માથામાં ગંભીર ઈજા (કન્ક્યુશન) ખેલાડી તરીકે મેદાન પર આવ્યો હતો. આ ફાસ્ટ બોલરે પોતાની આંતરરાષ્ટ્રીય T20 ડેબ્યૂ મેચમાં શાનદાર પ્રદર્શન કર્યું અને 4 ઓવરમાં 33 રન આપીને મહત્વપૂર્ણ 3 વિકેટ લઈને ભારતને જીત અપાવી.
ભારત તરફથી રવિ બિશ્નોઈએ 4 ઓવરમાં 28 રન આપીને 3 વિકેટ ઝડપી હતી. વરુણ ચક્રવર્તીએ 4 ઓવરમાં 28 રન આપીને 2 વિકેટ અને અર્શદીપ સિંહે 3.4 ઓવરમાં 35 રન આપીને 1 વિકેટ લીધી. શિવમ દુબેને તેની શાનદાર ઇનિંગ બદલ 'પ્લેયર ઓફ ધ મેચનો એવોર્ડ' મળ્યો છે.
ગુજ્જુ બોય હાર્દિક પંડ્યાએ પણ ફટકારી અડધી સદી:
આ પહેલા ભારત તરફથી અભિષેક શર્માએ 29 રન અને રિંકુ સિંહે 30 રન બનાવ્યા હતા. આ બે ઉપરાંત, હાર્દિક પંડ્યાએ 30 બોલમાં 4 ચોગ્ગા અને 4 છગ્ગાની મદદથી 53 રન અને શિવમ દુબેએ 34 બોલમાં 7 ચોગ્ગા અને 2 છગ્ગાની મદદથી 53 રન બનાવ્યા. ઈંગ્લેન્ડ તરફથી સાકિબ મહમૂદે 4 ઓવરમાં 35 રન આપીને 3 વિકેટ અને જેમી ઓવરટને 4 ઓવરમાં 32 રન આપીને 2 વિકેટ ઝડપી હતી.
આ પણ વાંચો:
- સિરાજ અને બિગ બોસ ફેમ માહિરા શર્માના સંબંધો વિશે પૂછતા માહિરાની માતાએ ગુસ્સે થઈને કહ્યું…
- વિદેશમાં ભારતીય મહિલા ટીમનું જબરદસ્ત પ્રદર્શન, ઇંગ્લેન્ડને હરાવી અંડર-19 વર્લ્ડ કપની ફાઇનલમાં કર્યો પ્રવેશ
