ગેરકાયદે ઘૂસણખોરોને ટૂંક સમયમાં ભારતમાંથી પરત મોકલાશે, સમયમર્યાદા નક્કી

સુપ્રીમ કોર્ટે આસામ સરકારને ફટકાર લગાવી, કહ્યું- વિદેશી નાગરિકોને પરત મોકલવા માટે તમે કઈ ક્ષણની રાહ જોઈ રહ્યા છો?

નવી દિલ્હી:સુપ્રીમ કોર્ટે મંગળવારે આસામના ટ્રાન્ઝિટ કેમ્પમાં અટકાયતમાં રાખવામાં આવેલા 270 વિદેશી નાગરિકોને દેશનિકાલ કરવાના મામલામાં કડક વલણ અપનાવ્યું છે. કોર્ટે તેની અગાઉની સૂચનાઓનું પાલન સુનિશ્ચિત કરવા માટે કેન્દ્ર સરકાર પાસેથી જવાબ માંગ્યો છે. સુનાવણી દરમિયાન, કોર્ટે 21 માર્ચની સમયમર્યાદા નક્કી કરી અને કહ્યું કે વધુ સમય આપવામાં આવશે નહીં.

કેન્દ્ર સરકાર વતી સોલિસિટર જનરલ તુષાર મહેતાએ જણાવ્યું હતું કે આ મુદ્દે ચર્ચા ચાલુ રહેવી જોઈએ અને વધારાના સમયની જરૂર છે. જસ્ટિસ અભય એસ ઓકા અને જસ્ટિસ ઉજ્જલ ભુયાનની બેંચે સોલિસિટર જનરલની અપીલ પર સુનાવણી મુલતવી રાખી હતી. અગાઉ, બેન્ચે કહ્યું હતું કે વિદેશીઓના દેશનિકાલના મુદ્દા પર ઉચ્ચ સ્તરે કાર્યવાહી કરવામાં આવી રહી છે અને જો શક્ય હોય તો, સરકારે આ સંબંધમાં સત્તાવાર નિર્ણય રેકોર્ડ પર મૂકવો જોઈએ.

સુપ્રિમ કોર્ટે આસામ સરકારને વિદેશીઓને દેશનિકાલ કરવાને બદલે અનિશ્ચિત સમય માટે અટકાયતમાં રાખવા બદલ ઠપકો આપ્યો છે. કોર્ટે સરકારને પૂછ્યું હતું કે શું તે આ લોકોને પાછા મોકલવા માટે કોઈ 'મુહૂર્ત'ની રાહ જોઈ રહી છે. બેન્ચે એમ પણ કહ્યું હતું કે આસામ સરકાર તથ્યો છુપાવી રહી છે અને અટકાયતમાં લેવાયેલા લોકોને તરત જ દેશનિકાલ કરવા જોઈએ કારણ કે તે વિદેશી હોવાની પુષ્ટિ થાય છે.

SCએ કહ્યું- શું તમે કોઈ મુહૂર્ત સમયની રાહ જોઈ રહ્યા છો?

કોર્ટે આસામ સરકારના સ્પષ્ટતા પર આશ્ચર્ય વ્યક્ત કર્યું હતું કે તે વિદેશ મંત્રાલયને રાષ્ટ્રીયતા ચકાસણી ફોર્મ મોકલી રહી નથી કારણ કે વિદેશમાં કેદીઓનું સરનામું જાણીતું નથી. તેના પર કોર્ટે તીખી ટીપ્પણી કરતા કહ્યું કે, 'તમે દેશનિકાલ પ્રક્રિયા શરૂ કરવાનો એમ કહીને ના પાડી દીધી હતી કે તેમના સરનામાની જાણ નથી. આ આપણી ચિંતા શા માટે થવી જોઈએ? તમે તેમને તેમના દેશમાં મોકલો. શું તમે કોઈ મુહૂર્ત સમયની રાહ જોઈ રહ્યા છો?'

સર્વોચ્ચ અદાલતે કેન્દ્ર સરકારને અત્યાર સુધી દેશનિકાલ કરાયેલા લોકોની વિગતો આપવાનો પણ નિર્દેશ આપ્યો છે. આ સાથે કોર્ટે એ પણ સ્પષ્ટતા કરવા કહ્યું છે કે સરકાર આવા કેદીઓના કેસમાં આગળ કેવી રીતે કાર્યવાહી કરશે, જેમની રાષ્ટ્રીયતા અજાણ છે.