નવી દિલ્હી : દિલ્હીના મુખ્યમંત્રી અરવિંદ કેજરીવાલ લિકર પોલિસી કૌભાંડ કેસમાં EDની કસ્ટડીમાં છે. આજે શુક્રવાર (22 માર્ચ) ખૂબ જ મહત્વપૂર્ણ દિવસ છે. કેજરીવાલની ધરપકડ બાદ દિલ્હીના રાજકારણમાં ખળભળાટ મચી ગયો છે. પરંતુ એ જાણવું ખૂબ જ રસપ્રદ છે કે કેવી રીતે એક સામાન્ય માણસ દિલ્હીના ટોચના સિંહાસન સુધી પહોંચ્યો અને સત્તાના સળિયા પાછળની આખી સફર શું છે.
અરવિંદ કેજરીવાલ અહીં કેવી રીતે પહોંચ્યા? : અરવિંદ કેજરીવાલ, સામાજિક કાર્યકર્તા અણ્ણા હજારે સાથે ભ્રષ્ટાચાર સામેની લડાઈ શરૂ કરવા ઓગસ્ટ 2011માં રામલીલા મેદાનમાં પહેલીવાર ધરણા પર બેઠા હતા. જે બાદ 2012માં જંતરમંતર પર અને ત્યારબાદ ઓક્ટોબર 2013માં તેમણે રામલીલા મેદાનમાં પોતાની રાજકીય પાર્ટી આમ આદમી પાર્ટીની જાહેરાત કરી હતી. આ પછી તેઓ ચૂંટણી લડ્યાં અને જીત્યા, મુખ્યમંત્રી બન્યા. તેઓ જ્યારે મુખ્યમંત્રી હતા ત્યારે દિલ્હીમાં દારૂનું કૌભાંડ થયું હતું. જેમાં નાયબ મુખ્યમંત્રી મનીષ સિસોદિયા અને રાજ્યસભાના સાંસદ સંજય સિંહને જેલમાં જવું પડ્યું હતું. હવે આ જ દારૂ કૌભાંડની તપાસમાં ED દ્વારા કેજરીવાલની ધરપકડ કરવામાં આવી છે. ED શુક્રવારે કેજરીવાલને રાઉસ એવન્યુ કોર્ટમાં રજૂ કરશે અને તેમની કસ્ટડીની માંગણી કરશે.
હરિયાણામાં જન્મ :અરવિંદ કેજરીવાલનો જન્મ 16 ઓગસ્ટ 1968ના રોજ હરિયાણાના ભિવાની જિલ્લામાં થયો હતો અને તેમણે પ્રાથમિક શિક્ષણ હિસારથી કર્યું હતું. અરવિંદ કેજરીવાલે IIT ખડગપુરમાંથી મિકેનિકલ એન્જિનિયરિંગનો અભ્યાસ કર્યો છે. આ પછી, તેઓ 1993 માં ભારતીય મહેસૂલ સેવામાં જોડાયા અને પછી માત્ર બે વર્ષ પછી, 1995 માં, તેમણે તેમની બેચમેટ સુનીતા કેજરીવાલ સાથે લગ્ન કર્યા.
નોકરી દરમિયાન જ એનજીઓ શરૂ કરી :આઈઆરએસમાં કામ કરતી વખતે કેજરીવાલે લોકો સાથે જોડાયેલા મુદ્દાઓ પર પણ ધ્યાન આપવાનું શરૂ કર્યું. અહીં તેમણે મનીષ સિસોદિયા સાથે મળીને દિલ્હીના લોકોની ફરિયાદો દૂર કરવા પરિવર્તન નામની ચળવળ શરૂ કરી હતી. આ પછી કેજરીવાલે પણ આરટીઆઈ એક્ટિવિસ્ટ તરીકે કામ કરવાનું શરૂ કર્યું. આ પછી, 2006 માં કેજરીવાલને આ માટે રેમન મેગ્સેસે એવોર્ડથી સન્માનિત કરવામાં આવ્યા હતા.
2013માં દિલ્હીના સાતમા મુખ્યમંત્રી બન્યાં : અરવિંદકેજરીવાલે પોતાની પાર્ટી બનાવી જેનું નામ આમ આદમી પાર્ટી રાખવામાં આવ્યું. તેમણે ડિસેમ્બર 2013માં આમ આદમી પાર્ટીની ટિકિટ પર દિલ્હી વિધાનસભાની ચૂંટણી લડી હતી અને દિલ્હીની લગભગ તમામ 70 વિધાનસભા બેઠકો પર પોતાના ઉમેદવારો ઉભા રાખ્યા હતા. કેજરીવાલે પોતે તત્કાલિન મુખ્યમંત્રી શીલા દીક્ષિત સામે નવી દિલ્હી બેઠક પરથી ચૂંટણી લડી હતી. કેજરીવાલે આ ચૂંટણીમાં શીલા દીક્ષિતને મોટા અંતરથી હરાવ્યા હતા. પ્રથમ ચૂંટણીમાં તેમની પાર્ટીએ 28 બેઠકો જીતી હતી અને કોંગ્રેસના સમર્થનથી તેઓ મુખ્યમંત્રી બનાવવામાં સફળ રહ્યા હતા. જોકે, તેમણે 49 દિવસમાં રાજીનામું આપી દીધું હતું. 2014ની લોકસભા ચૂંટણીમાં તેઓ બનારસથી વડાપ્રધાન નરેન્દ્ર મોદી સામે ચૂંટણી લડ્યા હતા અને કારમી હારનો સામનો કરવો પડ્યો હતો.
2015ની ચૂંટણીમાં જંગી બહુમતી મળી : 2014માં કેજરીવાલના રાજીનામા બાદ દિલ્હીમાં રાષ્ટ્રપતિ શાસન લાદવામાં આવ્યું હતું અને ત્યારબાદ 2015માં વિધાનસભા ભંગ કરીને ફરીથી વિધાનસભાની ચૂંટણી યોજાઈ હતી. આ ચૂંટણીમાં કેજરીવાલે દિલ્હીના તમામ રેકોર્ડ તોડી નાખ્યા અને 70માંથી 67 બેઠકો જીતી લીધી. આ પછી કેજરીવાલ ફરી મુખ્યમંત્રી બન્યા અને પોતાનો કાર્યકાળ પૂરો કર્યો હતો.
2020માં ફરી બહુમતી મેળવી અને ફરી મુખ્યમંત્રી બન્યાં : 2020ની વિધાનસભા ચૂંટણીમાં કેજરીવાલે ફરીથી 62 બેઠકો જીતીને સરકાર બનાવી અને ફરીથી દિલ્હીના મુખ્યમંત્રી બન્યા. 2022ની પંજાબ વિધાનસભા ચૂંટણીમાં પણ કેજરીવાલની પાર્ટીએ પ્રચંડ બહુમતી સાથે વિજય નોંધાવીને સરકાર બનાવી હતી. આ સાથે સુપ્રીમ કોર્ટના હસ્તક્ષેપ બાદ AAPએ એક મહિના પહેલા ચંદીગઢમાં મેયરની ચૂંટણી પણ જીતી હતી. હાલમાં કેજરીવાલની પાર્ટી મુખ્ય વિપક્ષી ગઠબંધન ઈન્ડિયા એલાયન્સની સહયોગી છે. કેજરીવાલ અને કોંગ્રેસ દિલ્હીમાં ચાર અને ત્રણ બેઠકો પર સંયુક્ત રીતે ચૂંટણી લડી રહ્યા છે.
- જાણો શું છે દિલ્હી દારૂ કૌભાંડ, જેમાં CM કેજરીવાલની ધરપકડ કરવામાં આવી - Delhi Liquor Scam
- અરવિંદ કેજરીવાલે સુપ્રીમ કોર્ટમાંથી પોતાની અરજી પાછી ખેંચી, કેજરીવાલ નીચલી કોર્ટમાં પોતાનો પક્ષ રજૂ કરશે - KEJRIWAL ARREST
