નવી દિલ્હી:આમ આદમી પાર્ટી 22 સપ્ટેમ્બર (રવિવાર)ના રોજ દિલ્હીમાં એક મોટી રેલીનું આયોજન કરી રહી છે. મુખ્યમંત્રી પદ પરથી રાજીનામું આપ્યા બાદ અરવિંદ કેજરીવાલ જનતાની વચ્ચે જશે. તેમની ઈમાનદારીના નામે વોટ માંગશે. તેમણે કહ્યું છે કે, જનતાનો દરેક મત તેમની ઈમાનદારીનું પ્રમાણપત્ર હશે. આમ આદમી પાર્ટીના વરિષ્ઠ નેતા અને રાજ્યસભા સાંસદ સંજય સિંહે આ બાબતે કહ્યું છે કે, અરવિંદ કેજરીવાલ મુખ્યમંત્રીને આપવામાં આવતી તમામ સુવિધાઓ છોડી દેશે. તે સામાન્ય લોકોની વચ્ચે રહેશે. આ રીતે તેઓ દિલ્હીના મતદારોને રીઝવવાનો પ્રયાસ કરશે.
જેલમાંથી છૂટ્યા બાદ સીધું દિલ્હીની જનતાને સંબોધન: આમ આદમી પાર્ટીના સૂત્રોના જણાવ્યા અનુસાર, પાર્ટી 22 સપ્ટેમ્બર એટલે કે રવિવારે એક મોટી રેલી કરવાની તૈયારી કરી રહી છે. આ રેલી દિલ્હીના રામલીલા મેદાન અથવા બુરારીમાં યોજવામાં આવી શકે છે. હાલ સ્થળ હજુ નક્કી થયું નથી. આ રેલીમાં પૂર્વ મુખ્યમંત્રી અરવિંદ કેજરીવાલ જનતાને સંબોધિત કરશે. આ પહેલો પ્રસંગ હશે જ્યારે અરવિંદ કેજરીવાલ જેલમાંથી છૂટ્યા બાદ સીધું દિલ્હીની જનતાને સંબોધિત કરશે. આ રેલીને આગામી ચૂંટણીની દૃષ્ટિએ પણ મહત્વની ગણવામાં આવે છે.