হায়দৰাবাদ: ছ’চিয়েল মিডিয়া প্লেটফৰ্ম ইনষ্টাগ্ৰামত অতি সোনকালে প্ৰৱৰ্তন হ’ব পাৰে নতুন কৃত্ৰিম বুদ্ধিমত্তা (AI) বৈশিষ্ট্য। এই নতুন বৈশিষ্ট্যৰ জৰিয়তে ব্যৱহাৰকাৰীয়ে AI প্ৰফাইল ফটো সৃষ্টি কৰিব পাৰিব । অৱশ্যে এতিয়াও এই বৈশিষ্ট্যই কেনেদৰে কাম কৰিব সেয়া এতিয়াও সম্পূৰ্ণৰূপে নিশ্চিত হোৱা নাই, তথাপিও ইয়াৰ এখন ছবি ইণ্টাৰনেটত ভাইৰেল হৈ পৰা পৰিলক্ষিত হৈছে ।
মেটাৰ মালিকানাধীন কোম্পানীটোৱে ফেচবুক আৰু হোৱাটছএপৰ বাবেও একেধৰণৰ বৈশিষ্ট্য প্ৰস্তুত কৰি থকা বুলি জানিব পৰা গৈছে । শেহতীয়াকৈ ইনষ্টাগ্ৰামৰ মুৰব্বী এডাম মছেৰীয়ে ঘোষণা কৰিছে যে নিৰ্দিষ্ট সময়ৰ পিছত এপটো খুলিলে অটোমেটিক ফিড ৰিফ্ৰেছিং হোৱাটো আগলৈ নহ’ব বুলি ।
ইনষ্টাগ্ৰাম এআই প্ৰফাইল ছবিৰ বৈশিষ্ট্য
ডেভেল’পাৰ আলেছান্দ্ৰ’ পালুজিয়ে ইনষ্টাগ্ৰাম এপত এই বৈশিষ্ট্যৰ আভাস পাইছিল আৰু থ্ৰেডছত এটা পোষ্টত শ্বেয়াৰ কৰিছিল । ইনষ্টাগ্ৰামত নিজৰ প্ৰফাইল পিকচাৰ আপডেট কৰি থাকোঁতে তেওঁ এটা নতুন মেনু অপচন দেখিলে য’ত লিখা আছিল, Create an AI profile picture. তাৰ পিছত ডেভেলপাৰে ইয়াৰ স্ক্ৰীণশ্বট লৈ থ্ৰেডছত শ্বেয়াৰ কৰিলে ।
যিহেতু ই এতিয়াও বিকশিত পৰ্যায়ত আছে গতিকে এই বৈশিষ্ট্যই সঠিকভাৱে কেনেকৈ কাম কৰিব সেয়া কোৱাটো কঠিন ৷ ইয়াক সম্ভৱতঃ মেটাৰ লামা বৃহৎ ভাষা মডেল (এল এল এম)ৰ এটাৰ দ্বাৰা চালিত হ'ব বুলি আশা কৰা হৈছে । এই বৈশিষ্ট্যই দুই ধৰণে কাম কৰিব পাৰে । ই ব্যৱহাৰকাৰীসকলক লিখনী-ভিত্তিক প্ৰমপ্ট ব্যৱহাৰ কৰি শূন্যৰ পৰা এখন AI ছবি সৃষ্টি কৰাৰ অনুমতি দিব পাৰে বা AI ব্যৱহাৰ কৰি বৰ্তমানৰ ছবিসমূহক বিভিন্ন শৈলীলৈ ৰূপান্তৰ কৰিব পাৰে।
উল্লেখ্য যে এইটো ইনষ্টাগ্ৰামত অহা প্ৰথমটো AI ফিচাৰ নহয় । মেটাৰ মালিকানাধীন প্লেটফৰ্মটোৱে ইতিমধ্যে ইয়াৰ কথোপকথনমূলক চেটবট মেটা এআই ব্যৱহাৰ কৰিব পাৰে, যিটো ব্যক্তিগত chat ৰ লগতে গ্ৰুপ চেটতো উপলব্ধ । কোম্পানীটোৱে ডাইৰেক্ট মেচেজৰ বাবে এআই ৰিৰাইট ফিচাৰো প্ৰৱৰ্তন কৰিছে, যাৰ সহায়ত ব্যৱহাৰকাৰীয়ে আন এজন ব্যৱহাৰকাৰীলৈ প্ৰেৰণ কৰা বাৰ্তা পুনৰ শুধৰাই লিখিব পাৰে ।
স্মৰ্তব্য যে শেহতীয়াকৈ মেটাই জনাইছিল যে ফেচবুকে ফেচবুক আৰু ইনষ্টাগ্ৰামত প্ৰৱঞ্চনামূলক বিজ্ঞাপন ধৰা পেলাবলৈ এআই চালিত মুখ চিনাক্তকৰণ প্ৰযুক্তি পৰীক্ষা কৰি আছে । এই বৈশিষ্ট্যই সেই বিজ্ঞাপনসমূহক চিনাক্ত কৰিব যিবোৰে ব্যৱহাৰকাৰীক প্ৰলোভিত কৰিবলৈ নিজৰ বিজ্ঞাপনত পৰিচিত মুখ একোখন জালিয়াতিৰে ব্যৱহাৰ কৰে আৰু সেইবোৰক ব্লক কৰিব ।
