কাজিৰঙা,১৩ জুন:ৰাজ্যৰ বিভিন্ন প্ৰান্তত অব্যাহত আছে কাঠৰ অবৈধ সৰবৰাহ । বিভিন্ন উপায় অৱলম্বন কৰি আৰক্ষী-প্ৰশাসন কিম্বা বন বিভাগৰ চকুত ধূলি দি একাংশ সৰবৰাহকাৰীয়ে চলাই গৈছে কাঠৰ অবৈধ সৰবৰাহ ৷ সময়ে সময়ে বন বিভাগে অভিযান চলাই যদিও নিতৌ সৰবৰাহকাৰীয়ে চলাই গৈছে এই দুষ্কাৰ্য । কোনো কোনো সময়ত বন বিভাগলৈ উঠিছে সন্দেহৰ আঙুলি ।
এইবাৰ বন বিভাগৰ একাংশ লোকক মেনেজ কৰি কাজিৰঙাত বনদস্যুৱে দপদপনি চলোৱাৰ অভিযোগ ৷ কিয়নো কাজিৰঙা ৰাষ্ট্ৰীয় উদ্যানৰ গাতে লাগি থকা কাৰ্বি পাহাৰত দিনে-নিশাই অবৈধভাৱে গছ কাটি তহিলং কৰা হৈছে যদিও এই বিষয়বোৰত গুৰুত্ব দিবলৈ যেন আহৰি নাই বন বিভাগৰ একাংশ বৰমূৰীয়াৰ ৷
কাজিৰঙা ৰাষ্ট্ৰীয় উদ্যানৰ বাবে অত্যন্ত প্ৰয়োজনীয় হিচাপে বিবেচিত হোৱা কাৰ্বি আংলং তহিলং কৰাত নামি পৰা একাংশ বনদস্যুৱে বুধবাৰে নিশা কাঠ কঢ়িয়াই আনোতে বন বিভাগৰ হাতত ধৰা পৰে ৷ মন কৰিবলগীয়া কথাটো হ’ল, কাজিৰঙা ৰাষ্ট্ৰীয় উদ্যানৰ দাঁতি কাষৰীয়া কাৰ্বি পাহাৰত দিনে-নিশাই অব্যাহত আছে অবাধ বন ধ্বংসযজ্ঞ । একাংশ অসাধু ব্যৱসায়ীয়ে কাৰ্বি পাহাৰৰ মূল্যবান গছ কাটি অব্যাহত ৰাখিছে কাঠৰ ৰমৰমীয়া ব্যৱসায় ।