গুৱাহাটী :দীপাৱলীৰ আনন্দৰ মাজতে নিশা মহানগৰীৰ খানাপাৰাত সংঘটিত হয় ভয়ংকৰ দুৰ্ঘটনা । এই দুৰ্ঘটনাত প্ৰাণ গ’ল দুই যুৱক-যুৱতীৰ । দুখন স্ক’ৰপিঅ’ বাহনৰ মুখামুখি সংঘৰ্ষৰ ফলতে থিতাতে নিহত হয় এজন যুৱক আৰু এগৰাকী যুৱতী । লগতে দুৰ্ঘটনাটোত গুৰুতৰভাৱে আহত হয় আন দুই যুৱক ৷ জানিব পৰা মতে, আহত দুয়োকে নিশাই গুৱাহাটী চিকিৎসা মহাবিদ্যালয় হাস্পতালত ভৰ্তি কৰোৱা হয় ।
তথ্য মতে, খানাপাৰৰ হোটেল ভিভাণ্টাৰ সন্মুখৰ ফুটব্ৰীজৰ তলতে সংঘটিত হয় ভয়ংকৰ দুৰ্ঘটনাটো । এখন ক’লা আৰু এখন বগা ৰঙৰ স্ক’ৰপিঅ’ৰ মাজত মুখামুখি সংঘৰ্ষ হয় । খানাপাৰা দিশৰ পৰা তীব্ৰ বেগত আহিছিল ক’লা ৰঙৰ স্ক’ৰপিঅ’খন । ছয় মাইল ফালৰ পৰা পৰা আহি আছিল বগা ৰঙৰ স্ক’ৰপিঅ’খন ।
বগা ৰঙৰ স্ক’ৰপিঅ’খনে খানাপাৰৰ ফুটব্ৰীজৰ তলতে চাইন্স মিউজিয়ামৰ ফালে সোমাব লওঁতেই প্ৰচণ্ড জোৰেৰে খুন্দা মাৰে ক’লা ৰঙৰ স্কৰপিঅ’খনে । ফলত ৰেলিং ভাঙি ফুটব্ৰীজৰ ওপৰলৈ উঠি যায় ক’লা স্ক’ৰপিঅ’খন । ফুটব্ৰীজৰ ওপৰত খুন্দা মাৰি পুনৰ তলত পৰে বাহনখন । মাত্ৰ তিনিদিন পূৰ্বে ক্ৰয় কৰিছিল ক’লা ৰঙৰ স্ক’ৰপিঅ’খন ।