পথৰ পৰা বাগৰিল বাহন; শিশুসহ থিতাতে নিহত চাৰিগৰাকী যাত্ৰী

কন্যাৰ বিয়ালৈ আছিল 4 দিন মাত্ৰ, ৰে’ল ষ্টেচনৰ পৰা আলহীক আনিবলৈ গৈ প্ৰাণ হেৰুৱালে পিতৃয়ে ৷ আন তিনিজনৰো মৃত্যু ৷ পঢ়ক সবিশেষ-

তিনিচুকীয়া : মঙলবাৰে পুৱতি নিশা তিনিচুকীয়া বাইপাছত সংঘটিত হয় এক শোকাৱহ দুৰ্ঘটনা । পথৰ দাঁতিৰ দ খালত বাগৰি পৰে এখন চাৰিচকীয়া বাহন ৷ এই দুৰ্ঘটনাত থিতাতে নিহত হয় বাহনখনত থকা চাৰিগৰাকী লোক আৰু আহত হয় দুগৰাকী মহিলা ৷ জানিব পৰা মতে, নিহত হোৱা যাত্ৰী চাৰিজনৰ ভিতৰত এটি শিশুও আছে ৷

পথৰ কাষত খালত বাগৰিল বাহন

জানিব পৰা মতে, নিহত লোক কেইজনৰ দুজন বৰডুবিৰ আৰু দুজন বিহাৰৰ । AS 06 AA 2583 নম্বৰৰ মাৰুতি চুইফট্‌ বাহনখনেৰে ডিব্ৰুগড় ৰে’লৱে ষ্টেচনৰ পৰা তিনিচুকীয়ৰ বৰডুবিলৈ আহি থকাৰ সময়তে পুৱা সংঘটিত হয় পথ দুৰ্ঘটনাটো । তেওঁলোক আহি থকা বাহনখন পথৰ কাষৰ দ খালত বাগৰি পৰে ৷ দুৰ্ঘটনাটোত নিহত লোককেইজন বৰডুবিৰ মহন শ্বাহ, মণ্টু শ্বাহ আৰু বিহাৰৰ অৰ্থ গুপ্তা, ৰাজেশ গুপ্তা ৷

চাৰি দিন পাছত আছিল কন্যাৰ বিবাহ

তথ্য অনুসৰি, অহা ১৬ নৱেম্বৰত বৰডুবিৰ মহন শ্বাহৰ কন্যাৰ বিবাহৰ দিন ধাৰ্য কৰিছিল আৰু সেই বিবাহ অনুষ্ঠানলৈ বিহাৰৰ পৰা আহিছিল পৰিয়ালৰ লোক । বিহাৰৰ পৰা ৰে’লে ডিব্ৰুগড় ৰে’লৱে ষ্টেচনলৈ আহে মহন শ্বাহৰ পৰিয়ালৰ লোক কেইজন ৷ ডিব্ৰুগড় ৰে’লৱে ষ্টেচনৰ পৰা বৰডুবিৰ ঘৰলৈ এখন চাৰিচকীয়া বাহনেৰে আহি থকাৰ সময়তে সংঘটিত হয় শোকাৱহ পথ দুৰ্ঘটনাটো । পথৰ কাষতে থকা দ খালত বাগৰি পৰে বাহনখন ৷ ফলত এটি শিশুসহ চাৰিগৰাকীয়ে প্ৰাণ হেৰুৱায় ৷ মহন শ্বাহৰ পৰিয়ালৰ এজন সদস্যই এই কথা জানিবলৈ দিছে ৷

মৰণোত্তৰ পৰীক্ষাৰ বাবে প্ৰেৰণ মৃতদেহ

পৰৱৰ্তী সময়ত ঘটনাস্থলীত স্থানীয় আৰক্ষী উপস্থিত হৈ মৃতদেহ কেইটা মৰণোত্তৰ পৰীক্ষাৰ কাৰণে তিনিচুকীয়া অসামৰিক চিকিৎসালয়লৈ প্ৰেৰণ কৰাৰ লগতে উদ্ধাৰ কৰিছে বাহনখন ৷ সমান্তৰালভাৱে আঘাতপ্ৰাপ্ত পৰিয়ালৰে দুই মহিলাক চিকিৎসালয়ত ভৰ্তি কৰে । এই পথ দুৰ্ঘটনাই সমগ্ৰ পৰিয়ালটোক শোকসাগৰত পেলাই যায় ৷

পূৰ্বেও সেই স্থানত দুৰ্ঘটনা সংঘটিত হোৱাৰ অভিযোগ:

স্থানীয় লোকৰ অভিযোগ অনুসৰি উক্ত স্থানত ইয়াৰ পূৰ্বেও সংঘটিত হৈছে কেইবাটাও পথ দুৰ্ঘটনা । বাইপাছ পথ নিৰ্মাণৰ সময়ত খন্দা গাঁতসমূহ এতিয়া মৰণফাণ্ডত পৰিণত হৈছে বুলি কয় একাংশ স্থানীয় লোকে ৷ সেই স্থানত থকা কেঁকুৰিটোত এটা কালভাৰ্ট স্থাপন কৰা হৈছিল যদিও কাম সম্পূৰ্ণ নকৰাৰ বাবেই দুৰ্ঘটনা সংঘটিত হৈ থাকে বুলি স্থানীয় লোকে জনাইছে ৷

লগতে পঢ়ক:ভয়ংকৰ দুৰ্ঘটনা: অৰ্ধশতাধিক যাত্ৰীসহ দ খাৱৈত বাগৰিল বাছ; কমেও ৩৬ জনৰ মৃত্যু