গুৱাহাটী,১৭ আগষ্ট:অসমত শিক্ষাৰ মান উন্নত কৰাৰ লগতে শিক্ষাৰ অধিকাৰৰ পৰা যাতে কোনো বঞ্চিত নহয় তাৰ বাবে চৰকাৰে বিশেষ উদ্যোগ গ্ৰহণ কৰি আহিছে । বিশেষকৈ স্ত্রী শিক্ষাৰ বাবে চৰকাৰে বিভিন্ন আঁচনি ৰূপায়ণ কৰি আহিছে । কিন্তু তাৰ পাচতো অসম স্ত্রী শিক্ষাৰ ক্ষেত্রত যথেষ্ট পিছপৰি আছে । ছাত্রীয়ে আধাতে বিদ্যালয় ত্যাগ কৰাৰ হাৰ ৰাজ্যখনত উদ্বেগজনকভাৱে বৃদ্ধি পাইছে ।
শেহতীয়াকৈ শিক্ষা মন্ত্রণালয়ৰ বিদ্যালয় শিক্ষা বিভাগে প্ৰকাশ কৰা তথ্যত অসমত স্ত্রী শিক্ষাৰ শোচনীয় দিশটো পোহৰলৈ আহিছে । বিদ্যালয় শিক্ষা বিভাগে ২০১৯-২০, ২০২০-২১ আৰু ২০২১-২২ বৰ্ষৰ তথ্য প্ৰকাশ কৰিছে । তথ্য অনুসৰি দেশৰ সকলো ৰাজ্য আৰু কেন্দ্রীয় শাসিত অঞ্চলবোৰৰ ভিতৰত প্ৰাথমিক, উচ্চ প্রাথমিক আৰু মাধ্যমিক স্তৰত অসমৰ স্থান যথেষ্ট নিম্ন । ২০২১-২২ বৰ্ষত ভাৰতত প্ৰাথমিক পৰ্যায়ত শিক্ষা জীৱন সামৰণি পৰা ছাত্ৰীৰ হাৰ ১.৪ শতাংশ ।
উচ্চ প্রাথমিকত এই হাৰ ৩.৩ শতাংশ আৰু মাধ্যমিক পৰ্যায়ত এই হাৰ ১২.৩ শতাংশ । ৰাষ্ট্ৰীয় স্তৰৰ এই হাৰৰ তুলনাত অসম যথেষ্ট পিছপৰি আছে । অসমত প্ৰাথমিক পৰ্যায়ত শিক্ষা জীৱন ত্যাগ কৰা ছাত্ৰীৰ হাৰ ৫.২ শতাংশ । সেইদৰে মাধ্যমিক স্তৰত এই হাৰ ৭.৬ শতাংশ আৰু মাধ্যমিক স্তৰত এই হাৰ ২০.৭ শতাংশ ।
স্ত্রী শিক্ষাৰ ক্ষেত্রত অসমৰ স্থান :
দেশৰ ৩৭ খন ৰাজ্য আৰু কেন্দ্ৰীয়শাসিত অঞ্চলৰ ভিতৰত অধিক সংখ্যক ছাত্ৰীয়ে বিদ্যালয় শিক্ষা ত্যাগ কৰা আন পাঁচখন ৰাজ্য আৰু কেন্দ্ৰীয় শাসিত অঞ্চলৰ লগত অসমৰ নাম আছে । সেই হিচাপত প্ৰাথমিক স্তৰত অসমৰ স্থান ৩১ নম্বৰত । একেদৰে উচ্চ প্ৰাথমিকত অসমৰ স্থান ৩৪ নম্বৰত আছে । মাধ্যমিক স্তৰত অসমৰ অৱস্থা আৰু অধিক বেয়া । এই তালিকাত অসমৰ স্থান ৩৫ নম্বৰত । তথ্যৰ পৰা দেখা গৈছে যে পূৰ্বৰ দুটা বছৰৰ তুলনাত অসমত আধাতে শিক্ষা জীৱন ত্যাগ কৰা ছাত্ৰীৰ হাৰৰ বিশেষ তাৰতম্য নাই ।
প্ৰাথমিক স্তৰত ছাত্রীৰ বিদ্যালয় ত্যাগৰ হাৰ :
২০১৯-২০ বৰ্ষত প্ৰাথমিক স্তৰত অসমৰ ৩.৬ শতাংশ ছাত্রীয়ে বিদ্যালয় শিক্ষা ত্যাগ কৰাৰ বিপৰীতে ২০২০-২১ বৰ্ষত সেই হাৰ আছিল ২.৩ শতাংশ । আনহাতে ২০২১-২২ বৰ্ষত সেই হাৰ ৫.২ শতাংশলৈ বৃদ্ধি হয় । ২০২২-২৩ বৰ্ষত ৮.০৩ শতাংশ ছাত্রীয়ে বিদ্যালয় ত্যাগ কৰে । ভাৰতৰ প্ৰেক্ষাপটত প্ৰাথমিক স্তৰত ২০১৯-২০ বৰ্ষত ১.২৪ শতাংশ, ২০২০-২১ বৰ্ষত ০.৬৯ শতাংশ আৰু ২০২১-২২ বৰ্ষত ১.৪ শতাংশ ছাত্রীয়ে বিদ্যালয় ত্যাগ কৰে ।
উচ্চ প্ৰাথমিক স্তৰত ছাত্রীৰ বিদ্যালয় ত্যাগৰ হাৰ :