ডিব্ৰুগড়,৯ মে':ঘোষণা কৰা কৰা হ'ল উচ্চতৰ মাধ্যমিকৰ চূড়ান্ত বৰ্ষৰ ফলাফল । ৯ বজাৰ লগে লগে ঘোষণা হ’ল বিজ্ঞান, কলা আৰু বাণিজ্যৰ লগতে বৃত্তিমূখী শাখাৰ ফলাফল । এই ফলাফলে হাঁহি বিৰিঙালে বহুতৰে মুখত । কিন্তু এই ফলাফলেই প্ৰাণ কাঢ়িলে এগৰাকী ছাত্ৰীৰ । ঘটনা সংঘটিত হৈছে ডিব্ৰুগড়ৰ চিটি মহাবিদ্যালয়ৰ ছোৱালী আৱাসত ।
ফলাফল ঘোষণাৰ পাছতে ডিব্ৰুগড়ৰ চিটি মহাবিদ্যালয়ৰ ছোৱালী হোষ্টেলত চিপ লৈ ওলমি থকা অৱস্থাত উদ্ধাৰ হয় এগৰাকী ছাত্ৰী । উচ্চতৰ মাধ্যমিক চূড়ান্ত পৰীক্ষাত অৱতীৰ্ণ হোৱা ছাত্ৰীগৰাকীয়ে আত্মহত্যা কৰাৰ সন্দেহ শিক্ষানুষ্ঠানখনৰ কৰ্তৃপক্ষৰ লগতে আন একাংশ শিক্ষাৰ্থীৰ । ডিব্ৰুগড় জিলাৰ ৰমাই লাচন গাঁৱৰ ছাত্ৰীগৰাকীয়ে ডিব্ৰুগড়ৰ নন্দলাল বৰগোঁহাঞি চিটি মহাবিদ্যালয়ত কলা শাখাত অধ্যয়ন কৰিছিল ।
মহাবিদ্যালয়খনৰ চৌহদতে থকা ছোৱালী আৱাসত থাকি অধ্যয়ন কৰা ছাত্ৰীগৰাকীয়ে উচ্চতৰ মাধ্যমিক চূড়ান্ত পৰীক্ষাৰ ফলাফল বেয়া হোৱা বাবেই আত্মহত্যা কৰা বুলি সন্দেহ কৰা হৈছে । ইতিমধ্যে ঘটনাস্থলীত দণ্ডাধীশসহ আৰক্ষী উপস্থিত হৈ মৃতদেহ উদ্ধাৰ কৰি আৰম্ভ কৰে তদন্ত । ঘটনাক কেন্দ্ৰ কৰি সমগ্ৰ মহাবিদ্য়ালয়খনতে সৃষ্টি হৈছে চেপা উত্তেজনাৰ ।