গুৱাহাটী, ৩১ জানুৱাৰী: দেশত এতিয়া লোকসভা নিৰ্বাচনৰ দামামা বাজিছে ৷ ফেব্ৰুৱাৰী মাহৰ ভিতৰতে নিৰ্বাচনী অধিসূচনা জাৰি কৰাৰ সম্ভাৱনা । তাৰ পূৰ্বেই দুদিনীয়া কাৰ্যসূচীৰে অসমলৈ আহিব প্ৰধানমন্ত্ৰী নৰেন্দ্ৰ মোদী । অহা ৩ আৰু ৪ ফেব্ৰুৱাৰীত অসমত এলানি চৰকাৰী আৰু বেচৰকাৰী কাৰ্যসূচী লৈ উপস্থিত হ’বহি প্ৰধানমন্ত্ৰীগৰাকী ৷
এই দুটা দিনত অসমত একাধিক প্ৰকল্পৰ উদ্বোধন আৰু শিলান্যাস কৰিব প্ৰধানমন্ত্ৰী নৰেন্দ্ৰ মোদীয়ে । এই কথা ইতিমধ্যেই সদৰী কৰিছে মন্ত্ৰী তথা চৰকাৰৰ মুখপাত্ৰ জয়ন্ত মল্ল বৰুৱাৰ লগতে মন্ত্ৰী অশোক সিংহলে ৷
প্ৰধানমন্ত্ৰীৰ অসম ভ্ৰমণক লৈ ব্যস্ত হৈ পৰিছে অসম চৰকাৰৰ গৃহ-ৰাজনৈতিক বিভাগ আৰু ৰাজ্যিক বিজেপিৰ নেতৃত্ব ৷ শেহতীয়াভাৱে অসমত হৈ যোৱা ৰাহুল গান্ধীৰ ভাৰত জোড়ো ন্যায় যাত্ৰাৰ প্ৰত্যুত্তৰ হিচাবেই প্ৰধানমন্ত্ৰীৰ এই অসম ভ্ৰমণৰ কাৰ্যসূচী বুলি ধাৰণা কৰা হৈছে ৷ আনুষ্ঠানিকভাৱে প্ৰধানমন্ত্ৰী মোদীৰ অসম ভ্ৰমণৰ কাৰ্যসূচী বৰ্তমানলৈকে ঘোষণা কৰা হোৱা নাই ৷
অৱশ্যে এইটো নিশ্চিত যে চৰকাৰী ভ্ৰমণসূচীৰে প্ৰধানমন্ত্ৰী নৰেন্দ্ৰ মোদী অসমলৈ আহিব যদিও একাধিক দলীয় কাৰ্যসূচীতো তেওঁ ভাগ লোৱাৰ সম্ভাৱনা আছে ।
উল্লেখযোগ্য যে মঙলবাৰে দুপৰীয়া অসমৰ মুখ্যমন্ত্ৰী ড৹ হিমন্ত বিশ্ব শৰ্মা আকস্মিকভাৱে দিল্লীলৈ ৰাওনা হয় । তাৰ পিচতেই প্ৰধানমন্ত্ৰী নৰেন্দ্ৰ মোদীৰ ৩ আৰু ৪ ফেব্ৰুৱাৰীৰ অসম ভ্ৰমণ নিশ্চিত কৰা হয় ৷ প্ৰধানমন্ত্ৰীৰ অসম ভ্ৰমণৰ কাৰ্যসূচীৰ সন্দৰ্ভত ৰাজ্য চৰকাৰৰ গৃহ-ৰাজনৈতিক বিভাগে ইতিমধ্যে ৰাজধানী দিছপুৰত বৈঠক অনুষ্ঠিত কৰিছে । অহা ৪ ফেব্ৰুৱাৰীত প্ৰধানমন্ত্ৰী নৰেন্দ্ৰ মোদীয়ে অসমত এক বিশাল জনসভাৰ লগতে ৰোড শ্ব’ও কৰিব বুলি বিজেপিৰ দলীয় সূত্ৰত প্ৰকাশ ।
আনহাতে ৩ জানুৱাৰী নিশাৰ ভাগতেই অসমত আহি উপস্থিত হ’বহি প্ৰধানমন্ত্ৰীগৰাকী । অসমৰ ১৪ খন লোকসভা আসনৰ ভিতৰত বিজেপিয়ে কমেও ১১ খন আসন জয়ৰ লক্ষ্য কৰি লৈছে বুলি ইতিমধ্যে ঘোষণা কৰিছে । সেয়ে লোকসভা নিৰ্বাচনক লৈ বিজেপিৰ শীর্ষ নেতৃত্বই অসমত সাংগঠনিক কাৰ্য-ক্ৰমণিকা বৃদ্ধি কৰিছে ৷