কাজিৰঙাৰ বনদুৰ্গাৰ সৈতে প্ৰধানমন্ত্ৰী মোদীৰ বাৰ্তালাপ

PM Modi in Kaziranga: ভূতপূৰ্ব প্ৰধানমন্ত্ৰী জৱাহৰলাল নেহৰুৰ পিচত প্ৰধানমন্ত্ৰী নৰেন্দ্ৰ মোদীয়ে পৰিদৰ্শন কৰিলে কাজিৰঙা ৰাষ্ট্ৰীয় উদ্যান ৷ ৰাষ্ট্ৰীয় উদ্যানখনত উপস্থিত হৈ প্ৰধানমন্ত্ৰীগৰাকীয়ে ৩৬ গৰাকী মহিলা বনকৰ্মীৰ সৈতেও বাৰ্তালাপ কৰে ৷

কাজিৰঙা, 9 মাৰ্চ: কাজিৰঙাৰ কেউফালে মোদীময় পৰিৱেশৰ মাজতে শনিবাৰে পুৱা বিশ্ব ঐতিহ্যক্ষেত্ৰ কাজিৰঙা ৰাষ্ট্ৰীয় উদ্যান ভ্ৰমণ কৰে দেশৰ প্ৰধানমন্ত্ৰী নৰেন্দ্ৰ মোদীয়ে ৷ আনহাতে, কাজিৰঙাৰ নৈসৰ্গিক পৰিৱেশ উপভোগ কৰি বনবিভাগৰ বনদুৰ্গাৰ সৈতে প্ৰধানমন্ত্ৰী মোদীয়ে বাৰ্তালাপ কৰে ৷

কাজিৰঙাৰ বনদুৰ্গাৰ সৈতে প্ৰধানমন্ত্ৰী মোদীৰ বাৰ্তালাপ

ৰাষ্ট্ৰীয় উদ্যান দৰ্শন কৰি কাজিৰঙাৰ বন বিভাগৰ বনদুৰ্গা নামকৰণৰ ৩৬ গৰাকী মহিলা বনকৰ্মীৰ সৈতে বাৰ্তালাপ কৰে নৰেন্দ্ৰ মোদীয়ে ৷ উল্লেখ্য যে প্ৰদুম্ন্য নামৰ এটা হাতীৰ পিঠিত উঠি কাজিৰঙাৰ বিনন্দীয়া সুধা পান কৰি আপ্লুত হৈ পৰা দেশৰ প্ৰধানমন্ত্ৰী নৰেন্দ্ৰ মোদীয়ে খোলা জীপছীত উঠি উদ্যান ভ্ৰমণ কৰে ৷

উদ্যানৰ ডাফলাং দৰ্শন চূড়াৰ পৰা ৰঙা পলাশ-শিমলুৰে ভৰি পৰা কাজিৰঙাৰ অপৰূপ সৌন্দৰ্য উপভোগ কৰে প্ৰধানমন্ত্ৰীগৰাকীয়ে ৷ ৰাষ্ট্ৰীয় উদ্যানখনৰ ভিতৰত প্ৰধানমন্ত্ৰী মোদীয়ে দুঘণ্টাতকৈও অধিক সময় অতিবাহিত কৰে ৷ খোলা জিপছীত উঠি ৰাষ্ট্ৰীয় উদ্যান ভ্ৰমণ কৰা প্ৰধানমন্ত্ৰী নৰেন্দ্ৰ মোদীয়ে বিভিন্ন বন্যজন্তু দেখা পায় ৷ এটা খৰ্গ থকা গঁড়ৰ লগতে এছীয় ম’হ, এছীয় বনৰীয়া হাতী, দলহৰিণ তথা ঢেকীয়াপতীয়া বাঘৰ আৱাসস্থলী কাজিৰঙাৰ অৰণ্য ছয় শতাধিক পক্ষৰো বিচৰণভূমি ৷

বিভিন্ন স্থলচৰ-জলচৰক নিজৰ বুকুত স্থান দিয়া কাজিৰঙা অভয়াৰণ্যই ৰাষ্ট্ৰীয় উদ্যান হিচাপে স্বীকৃতি লাভ কৰাৰ ৫০ সংখ্যক বছৰত উপস্থিত হৈ প্ৰধানমন্ত্ৰী মোদীয়ে বনকৰ্মীৰ অভাৱ-অভিযোগ সম্বন্ধেও বাৰ্তালাপ কৰে ৷ মোদীয়ে যথেষ্ট সময় বনবিভাগৰ বন দুৰ্গাসকলৰ কথা পাতি আনন্দ উপভোগ কৰা পৰিলক্ষিত হয় ৷

উল্লেখ্য যে 1957 চনৰ পিচত কাজিৰঙা ৰাষ্ট্ৰীয় উদ্যান দৰ্শন কৰা প্ৰথমগৰাকী প্ৰধানমন্ত্ৰী হ’ল নৰেন্দ্ৰ মোদী ৷ কিন্তু প্ৰধনমন্ত্ৰী মোদীয়ে এটি নিশাও কাজিৰঙাত কটোৱাৰ বাবে মুখ্যমন্ত্ৰী ড৹ হিমন্ত বিশ্ব শৰ্মাই তেওঁক অসমবাসীৰ হৈ ধন্যবাদ জ্ঞাপন কৰে ৷

লগতে পঢ়ক:সীমান্তৱৰ্তী গাঁওবোৰক অৱহেলা কৰাৰ বাবে কংগ্ৰেছক সমালোচনা মোদীৰ