তিনিচুকীয়া, ২৭ ছেপ্টেম্বৰ : উজনি অসমৰ অন্যতম বাণিজ্যিক চহৰ তিনিচুকীয়াৰ পৰা মাত্ৰ ৯ কিলোমিটাৰ দূৰত্বত অৱস্থিত ২১ খন গাঁৱৰে পৰিবেষ্টিত বৃহত্তৰ বাৰেকুৰি অঞ্চল । বাৰেকুৰিলৈ যিকোনো বাহন লৈ যিকোনো সময়তে পৰ্যটকসকলে নিশ্চিন্তমনে কৰিব পাৰে যাত্ৰা । শেহতীয়াকৈ বাৰেকুৰি অঞ্চল গঢ়ি উঠিছে গ্ৰাম্য পৰ্যটনৰ এক বিশেষ স্থল হিচাপে । বাৰেকুৰিবাসীৰ সাধাৰণ জীৱন প্ৰণালীৰ লগতে প্ৰাকৃতিক পৰিৱেশে হাতবাউলি মাতে পৰ্যটকসকলক ।
বাৰেকুৰিত পৌৰাণিক কালৰে পৰা বসবাস কৰি অহা বিলুপ্তপ্ৰায় হলৌ বান্দৰে বিশেষকৈ বিশ্বত নাম উজলাবলৈ সক্ষম হৈছে । বাৰেকুৰিৰ ২১ খনকৈ গাঁৱৰ প্ৰতিঘৰ মানুহৰ বাৰীত বনৰীয়া হলৌ বান্দৰকেইটাই ঘৰচীয়া জীৱ-জন্তুৰ দৰে বাস কৰি আহিছে । একপ্ৰকাৰে ক’বলৈ গ’লে মানুহৰ সৈতে হলৌ বান্দৰে বাৰেকুৰিত সহবাস কৰি আহিছে । অন্যস্থানত অৰ্থাৎ বনাঞ্চলসমূহত থকা হলৌ বান্দৰে ওখ গছৰ আগত আশ্ৰয় লয় । পৰ্যটকসকলে ওচৰৰ পৰা নাপাই দৰ্শন কৰিবলৈ । কিন্তু বাৰেকুৰিত বাস কৰা ২২ টাকৈ হলৌ বান্দৰে মানুহৰ নিচেই কাষলৈ আহে আৰু হাতৰ পৰাই কল খাই আহিছে ।
বাৰেকুৰিৰ প্ৰতিগৰাকী ব্যক্তিয়ে হলৌ বান্দৰকেইটাক নিজৰ ঘৰৰে সদস্য বুলি ভাবি লৈ কৰি আহিছে মৰম-চেনেহ । যিটো কাৰণে চলিত বৰ্ষৰ ২৫ আগষ্টত দেশৰ প্ৰধানমন্ত্ৰী নৰেন্দ্ৰ মোদীৰ ‘মন কী বাত’ অনুষ্ঠানত স্থান পাইছে বাৰেকুৰিয়ে । মন কী বাতৰ জৰিয়তে প্ৰধানমন্ত্ৰীগৰাকীয়ে বাৰেকুৰিবাসীয়ে হলৌ বান্দৰৰ প্ৰতিপালন কৰি দায়িত্বক প্ৰশংসাৰে উপচাই পেলায় ।
বাৰেকুৰি অঞ্চললৈ হলৌ বান্দৰৰ উপৰিও ঘৰচীয়া ৰূপত থকা ধনেশ পক্ষী, মটাপুং মাগুৰি বিলৰ আলহী পক্ষী, বাৰেকুৰিৰ ধৰ্মীয় স্থানসমূহৰ বহু আপুৰুগীয়া গছ-গছনি চাবলৈ প্ৰতি বছৰে আহে দেশ-বিদেশৰ পৰ্যটকসকল । সমান্তৰালভাৱে বহু শিক্ষানুষ্ঠানৰ পৰা ছাত্ৰ-ছাত্ৰীও আহে বাৰেকুৰিৰ বিভিন্ন দিশৰ ওপৰত অধ্যয়ন কৰিবলৈ । এবাৰ যদি পৰ্যটক বা ছাত্ৰ-ছাত্ৰীসকলে বাৰেকুৰিবাসীৰ সান্নিধ্য লাভ কৰে, তেন্তে পুনৰ হাতবাউলি মাতে বাৰেকুৰিবাসীৰ মৰম-চেনেহে ।
ইফালে, জৈৱ-বৈচিত্ৰ্যৰে ভৰপূৰ ১০ কিল'মিটাৰ ব্যাসাৰ্ধৰ বৃহৎ মটাপুং মাগুৰি বিলখনলৈ শীতৰ আগমনৰ লগেলগে চাইবেৰিয়া, ৰাছিয়া, নৰ’ৱে, ইংলেণ্ড, জাপান, টুন্দ্ৰা, লেহ-লাডাখ ইত্যাদি ঠাইৰ পৰা Baikal Teal, Eastern Spot Billed Duck, Mallard, Tufted Duck ইত্যাদি ৩০১ বিধৰো অধিক দেশী-বিদেশী পক্ষীৰ আগমন ঘটে ।