গুৱাহাটী :ইতিহাস ৰচিবলৈ গৈ আছে ঝুমুৰ নৃত্যই । একেলগে একেস্থানত আঠ সহস্ৰাধিক নাচনীয়ে পৰিৱেশন কৰিব ঝুমুৰ নৃত্য । সকলো প্ৰস্তুতি সম্পূৰ্ণ কৰি তোলা হৈছে । অপেক্ষা মাথোঁ সেই ঐতিহাসিক ক্ষণৰ । যিটো ক্ষণত দেশৰ প্ৰধানমন্ত্ৰী নৰেন্দ্ৰ মোদীৰ উপস্থিতিত উদ্ভাসিত হ'ব ঝুমুৰ নৃত্য । সাজু হৈছে গুৱাহাটীৰ সৰুসজাই ষ্টেডিয়াম ।
সোমবাৰে সন্ধিয়া প্ৰধানমন্ত্ৰীকে ধৰি কেইবাগৰাকী কেন্দ্ৰীয় মন্ত্ৰী আৰু ৬০ খন ৰাষ্ট্ৰৰ ৰাষ্ট্ৰদূতৰ উপৰি বহু অভ্যাগতৰ উপস্থিতিত সৰুসজাইত একেলগে আঠসহস্ৰাধিক ঝুমুৰ শিল্পীয়ে পৰিৱেশন কৰিব ‘‘ঝুমুৰ নৃত্য’’ । অসম চৰকাৰৰ উদ্যোগত আয়োজন কৰা ‘‘ঝুমইৰ বিনন্দিনী’’ শীৰ্ষক এই মেগা ঝুমুৰ নৃত্যই সোমবাৰে সন্ধিয়া ইতিহাস ৰচনা কৰিব । মহিলা নৃত্যশিল্পীকে ধৰি পুৰুষ নৃত্যশিল্পীৰ লগতে বাদ্যযন্ত্ৰীসহ ৯ হাজাৰৰো অধিক শিল্পীয়ে এই অনুষ্ঠানত ভাগ ল'ব ।
ইতিমধ্যে মুখ্যমন্ত্ৰীয়ে ঘোষণা কৰা অনুসৰি ঝুমইৰ বিনন্দিনীত ভাগ লোৱা প্ৰতিগৰাকী শিল্পীলৈ ২৫ হাজাৰকৈ টকা আগবঢ়োৱা হ'ল । লগতে ৰাজ্যৰ ৮০০ খন চাহ বাগিচালৈয়ো ২৫ হাজাৰ টকাকৈ আগবঢ়োৱা হ'ব । ইফালে ঝুমুৰ নৃত্যৰ মেগা অনুষ্ঠান আৰু এডভাণ্টেজ অসমৰ দ্বিতীয় সংস্কৰণৰ বাবে আজিৰে পৰাই অসমলৈ সোঁত ব'ৱ দেশী বিদেশী অভ্যাগতৰ । কেন্দ্ৰীয় বিদেশ মন্ত্ৰী এছ জয়শংকৰৰ নেতৃত্বত আজি আহিব ৬০ খন ৰাষ্ট্ৰৰ ৰাষ্ট্ৰদূত ।
অপেক্ষা মাথোঁ সোমবাৰ বিয়লিলৈ । সোমবাৰে সন্ধিয়া ৬ বজাত ঝুমইৰ বিনন্দিনীৰে মুখৰিত হৈ পৰিব সৰুসজাই ষ্টেডিয়াম । ৰাজ্যৰ বিভিন্ন জিলাৰ পৰা অহা ঝুমুৰ নৃত্যৰ শিল্পীসকলে ইতিমধ্যে সৰুসজাইত চলাই আছে অনুশীলন । আজি সন্ধিয়া চূড়ান্ত অনুশীলন অনুষ্ঠিত হ'ব । য'ত উপস্থিত থাকিব মুখ্যমন্ত্ৰী ড৹ হিমন্ত বিশ্ব শৰ্মা ।
| লগতে পঢ়ক :ড৹ সংগীতা কাকতিৰ কণ্ঠত দুটি আদিবাসী ঝুমুৰ গীত লগতে পঢ়ক :শোষিত চাহ শ্ৰমিকৰ ঝুমুৰ নৃত্যৰে বিশ্ব ৰেকৰ্ডৰ প্ৰয়াস অসম চৰকাৰৰ |
- উৎসাহিত চাহ জনগোষ্ঠীৰ লোকসকল :
অসমৰ চাহ বাগিচা আৰু আদিবাসী সমাজৰ এক অবিচ্ছেদ্য অংগ হ'ল ঝুমুৰ লোকনৃত্য । ঝুমুৰৰ আছে এক নিজা বৈশিষ্ট । চাহ বাগিচাক কেন্দ্ৰ কৰি গঠন হোৱা চাহ জনগোষ্ঠীটোৰ সংস্কৃতি বৰ্ণময় । বিহুৰ পাছত অসম চৰকাৰে চাহ জনগোষ্ঠীয় লোকসকলৰ চহকী সংস্কৃতি ঝুমুৰ নৃত্যকো বিশ্বমুখী কৰাৰ প্ৰয়াসেৰে এই বিশাল আয়োজন কৰিছে । এই আয়োজনক লৈ সমগ্ৰ জনগোষ্ঠীটোৱেই আজি আনন্দিত আৰু উৎফুল্লিত । কিন্তু এই জনগোষ্ঠীটোৰ দুখ-বেদনাৰো আন এক ইতিহাস আছে ।
বছৰৰ পাছত বছৰ ধৰি শোষণ-বঞ্চনাৰ সন্মুখীন হৈ অহা এই জনগোষ্ঠীটো আজিও অতি পিছপৰি থকাৰ লগতে নানান সমস্যাৰে ভাৰাক্ৰান্ত । অৱশ্যে অসম চৰকাৰে আয়োজন কৰা ঝুমুৰৰ এই বিশাল অনুষ্ঠানে জনগোষ্ঠীটোক বিশেষভাৱে উৎসাহিত কৰিছে ।
- চহকী কলা-সংস্কৃতিৰে ঐশ্বৰ্যশালী চাহ জনগোষ্ঠী :
চাহ জনগোষ্ঠীৰ অতি আদৰৰ ঝুমুৰ নৃত্যৰ আছে এক নিজা বৈশিষ্ট । চাহ বাগিছাক কেন্দ্ৰ কৰি গঠন হোৱা চাহ জনগোষ্ঠীটো নিজৰ সুকীয়া কলা-সংস্কৃতিৰে মহিমামণ্ডিত । চাহ জনগোষ্ঠীয় লোকসকল অসমতহে চাহ জনগোষ্ঠী হিচাপে পৰিচিত ।
১৮ শতিকাতে অন্ধ্ৰপ্ৰদেশ, মধ্যপ্ৰদেশ, উৰিশ্যা, ঝাৰখণ্ড, ছত্তিশগড়, বিহাৰ, উত্তৰ প্ৰদেশ, পশ্চিমবংগ আদিত আদিবাসী হিচাপে পৰিচিত তাঁতি, ওৰাং, বাউৰি, মুণ্ডা, ভূমিজ, কৰ্মকাৰ, তেলেঙা, বঢ়াইক, পানিকা, প্ৰধান, বণিয়া, গণ্ডা, গাজলু, গোবালা, মাঝি, চন্দ, নাগবংশী, তাচা, কৈৰী, ধানোৱাৰ, তেলী, ঘাটোৱাৰ, মলা, ভূঞা, নানিয়া আদি জাতি-উপজাতি আৰু খেলৰ শ্ৰমিকক অসমত চাহখেতি কৰিবলৈ ব্ৰিটিছসকলে আনিছিল ।
এনে শতাধিক আদিবাসী জাতি, উপজাতিৰ সংমিশ্ৰণত অসমত কালক্ৰমত সৃষ্টি হ’ল চাহ জনগোষ্ঠী । সেয়ে তেওঁলোকৰ বিভিন্ন গোটৰ নিজা নিজা সংস্কৃতি আছে । অসমত চাহ জনগোষ্ঠীয় লোকসকলৰ মাজত কৰম পূজা, টুচু পৰব, সৰহাই পৰব, ফাগুণ পৰব, দুৰ্বা পূজা, গ্ৰাম্য পূজা, মনসা পূজা ত্ৰিনাথ পূজা আদি প্ৰচলিত হৈ আহিছে ।
ঝুমুৰ, ঘেৰা, দমকচ, সাদি, সহৰাই, টুচু, নিচুকনি, ওমলা গীত আদিৰ জৰিয়তে চাহ জনগোষ্ঠীয় লোকসকলৰ বৈচিত্ৰময় জীৱন প্ৰতিফলিত হৈ আহিছে । ব্ৰিটিছৰ দিনত দেশৰ ভিন্ন ৰাজ্যৰ পৰা আনি চাহ বাগান তৈয়াৰ কৰাৰ কামত নিয়োজিত এই লোকসকলে চাহ বাগিচাৰ ভূমিতেই বাস কৰিছিল আৰু এতিয়াও চাহ শ্ৰমিকসকলে বাগানৰ ভূমিতেই বাস কৰি আহিছে ।