নগাঁও, 7 ফেব্ৰুৱাৰী : ৰাজ্যৰ স্বাস্থ্যখণ্ডক অধিক গতিশীল কৰাৰ বাবে তৎপৰ হৈ পৰিছে ৰাজ্য চৰকাৰৰ স্বাস্থ্যমন্ত্ৰী কেশৱ মহন্ত । বিশেষকৈ ৰাষ্ট্ৰীয় স্বাস্থ্য অভিযানৰ অধীনত ভিতৰুৱা গ্ৰামঞ্চলৰ লোককো বিনামূলীয়া স্বাস্থ্য সেৱা প্ৰদানৰ উদ্দেশ্যে বিভিন্ন পদক্ষেপ গ্ৰহণ কৰি আহিছে চৰকাৰে ।
বিভাগটোৰ পৰ্যালোচনা কৰাৰ লগতে ভিতৰুৱা অঞ্চলৰ স্বাস্থ্যখণ্ড অধিক উন্নত কৰাৰ উদ্দেশ্যে মঙলবাৰে বিয়লি নগাঁৱত স্বাস্থ্য বিভাগৰ শীৰ্ষ বিষয়াৰে গুৰুত্বপূৰ্ণ বৈঠক মিলিত হয় ৰাজ্যৰ স্বাস্থ্য বিভাগৰ মন্ত্ৰী কেশৱ মহন্ত । মঙলবাৰে সন্ধিয়া নগাঁও জিলা উপায়ুক্ত কাৰ্যালয়ৰ সভাকক্ষত স্বাস্থ্য বিভাগ, ৰাষ্ট্ৰীয় স্বাস্থ্য অভিযানৰ শীৰ্ষ বিষয়াৰ উপস্থিতিত অনুষ্ঠিত হয় মন্ত্ৰী কেশৱ মহন্তৰ বৈঠক ।
বৈঠকত ৰাজ্যৰ স্বাস্থ্য বিভাগৰ কেবাটাও গুৰুত্বপূৰ্ণ বিষয় আলোচনা হোৱা বুলিও জানিব পৰা গৈছে । বিশেষকৈ চাহ বাগিচা এলেকাৰ স্বাস্থ্যখণ্ডৰ ওপৰতো গুৰুত্ব আৰোপ কৰে স্বাস্থ্য বিভাগৰ বৈঠকখনত । চাহ বাগিচা এলেকাৰ স্বাস্থ্যখণ্ড উন্নত কৰাৰ লগতে চাহ বাগিচা এলেকাৰ বাবে ৰোগী কঢ়িওৱা বাহন বিতৰণৰ বাবেও চিন্তা চৰ্চা কৰা হয় বৈঠকখনত ।