বাক্সা, ২৬ ছেপ্টেম্বৰ : শুকুৰবাৰে অৰ্থাৎ ২৭ ছেপ্টেম্বৰত বিশ্ব পৰ্যটন দিৱস উদযাপন কৰা হ’ব ৷ উক্ত দিনাই আৰম্ভ হ’ব মানাহ ৰাষ্ট্ৰীয় উদ্যানৰ ২০২৫-২৬ পৰ্যটন বৰ্ষ ৷ অৰ্থাৎ শুকুৰবাৰে পুনৰ মুকলি কৰা হ’ব মানাহৰ প্ৰৱেশদ্বাৰ ।
উল্লেখ্য যে ১ অক্টোবৰত পৰ্যটকৰ বাবে মুকলি কৰাৰ কথা আছিল মানাহ ৰাষ্ট্ৰীয় উদ্যানখন ৷ কিন্তু উদ্যানখন ২৭ ছেপ্টেম্বৰত পুনৰ মুকলি কৰা হ’ব বুলি এক জাননীযোগে সদৰী কৰিছে মানাহ ব্যাঘ্ৰ প্ৰকল্পৰ ক্ষেত্ৰ সঞ্চালক ড৹ চি. ৰমেশে ৷ ভাৰত চৰকাৰৰ পৰিৱেশ মন্ত্ৰণালয়, বন আৰু জলবায়ু পৰিৱৰ্তন মন্ত্ৰণালয়, ৰাষ্ট্ৰীয় ব্যাঘ্ৰ সংৰক্ষণ প্ৰাধিকাৰীৰ বিধি অনুসৰি এই ঘোষণা কৰে মানাহ ৰাষ্ট্ৰীয় উদ্যান কৰ্তৃপক্ষই ৷ আনহাতে ২০২৪-২৫ পৰ্যটন বৰ্ষৰ বাবে উদ্যানখন সপ্তাহত ছদিন মুকলি থাকিব ৷ পুনৰ জাননী নিদিয়াপৰ্যন্ত পৰ্যটকৰ বাবে খোলা থাকিব মানাহৰ প্ৰৱেশদ্বাৰ ৷
উল্লেখ্য যে শুকুৰবাৰে ২০২৫-২৬ পৰ্যটন বৰ্ষৰ মুকলি অনুষ্ঠানৰ কাৰ্যসূচীত মুখ্য অতিথি হিচাপে উপস্থিত থাকিব ৰাজ্যৰ পৰ্যটন বিভাগৰ মন্ত্ৰী জয়ন্ত মল্লবৰুৱা, বি টি আৰৰ মুখ্য কাৰ্য্যবাহী সদস্য প্ৰমোদ বড়ো ৷ উল্লেখ্য যে, যোৱা ২০ জুনত বাৰিষাৰ পৰিপ্ৰেক্ষিতত প্ৰতিকূল বতৰৰ প্ৰতি লক্ষ্য ৰাখি পৰ্যটকৰ বাবে বন্ধ কৰা হৈছিল ৰাষ্ট্ৰীয় উদ্যানখনৰ প্ৰৱেশদ্বাৰ ৷ মানাহ ৰাষ্ট্ৰীয় উদ্যান মুকলি হ’ব বুলি ইতিমধ্যে জাননী জাৰি কৰাৰ লগে লগে প্ৰকৃতিপ্ৰেমীসকলৰ উৎসাহ বৃদ্ধি পোৱা পৰিলক্ষিত হৈছে ৷