শিলচৰ, 8 জুলাই:সোমবাৰেশিলচৰত উপস্থিত হয় কংগ্ৰেছ নেতা ৰাহুল গান্ধী ৷ বিমানযোগে আহি পুৱাই শিলচৰত উপস্থিত হ’ল বিৰোধী নেতা ৰাহুল গান্ধী ৷ বিমানবন্দৰৰ পৰা পোনে পোনে হিংসাজৰ্জৰ মণিপুৰৰ পৰিস্থিতিৰ বুজ লোৱাৰ উদ্দেশ্যৰে সোমবাৰে মণিপুৰলৈ ৰাওনা হৈছে লোকসভাৰ বিৰোধী দলপতিগৰাকী । প্ৰাণৰ মমতাত মণিপুৰৰ পৰা কাছাৰৰ ফুলেৰতলত আশ্ৰয় শিবিৰত আশ্ৰয় গ্ৰহণ কৰা লোকসকলকো ৰাহুল গান্ধীয়ে সাক্ষাৎ কৰিব বুলি অসম প্ৰদেশ কংগ্ৰেছৰ সভাপতি ভূপেন বৰাই দেওবাৰে সংবাদ মাধ্যমৰ আগত উল্লেখ কৰিছিল ৷
শিলচৰ বিমানবন্দৰত পুৱা 9 বজাত ৰাহুল গান্ধী উপস্থিত হোৱাৰ কথা আছিল যদিও, কিছু পলমকৈ তেওঁ উপস্থিত হয় ৷ অসম প্ৰদেশ কংগ্ৰেছৰ নেতৃত্বৰ লগতে মণিপুৰ কংগ্ৰেছৰ নেতৃত্বয়ো ৰাহুলক আদৰণি জনায় ৷ বিমানবন্দৰৰ পৰা তেওঁ স্থলপথেৰে মণিপুৰৰ জিৰিবাম অভিমুখে যাত্ৰা কৰে । এই যাত্ৰা পথত কাছাৰৰ ফুলেৰতলত আশ্ৰয় শিবিৰ পৰিদৰ্শন কৰিব ৰাহুল গান্ধীয়ে । যি আশ্ৰয় শিবিৰত মণিপুৰৰ আতংকিত ৰাইজে আহি আশ্ৰয় গ্ৰহণ কৰিছে । আশ্ৰয় শিবিৰ পৰিদৰ্শনৰ পিচত তেওঁ মণিপুৰৰ জিৰিবাম জিলালৈ যাব ।
জিৰিবামত উপস্থিত হৈ শেহতীয়া পৰিস্থিতিৰ বুজ লৈ পুনৰ শিলচৰ বিমানবন্দৰলৈ উভতি আহিব সাংসদগৰাকী । ইয়াৰ পাচত দুপৰীয়া শিলচৰ বিমানবন্দৰৰ পৰা ৰাহুল গান্ধী বিশেষ বিমানেৰে মণিপুৰৰ ইম্ফললৈ যাব ৷ ইম্ফলত কেইবাটাও আশ্ৰয় শিবিৰলৈ গৈ পৰিস্থিতিৰ বুজ লোৱাৰ পাচত নিশাটো ইম্ফলতে কটাই মঙলবাৰে নাগালেণ্ড অভিমুখে ৰাওনা হ’ব বিৰোধী নেতা ৰাহুল গান্ধী ।
উল্লেখ্য যে, কংগ্ৰেছ সাংসদগৰাকীৰ আগমনক লৈ কটকটীয়া কৰি তোলা হৈছে শিলচৰ বিমানবন্দৰত নিৰাপত্তা ব্যৱস্থা ৷ সমান্তৰালভাৱে, শৰণাৰ্থীসকলৰ মাজত বিশেষ উৎকণ্ঠা দেখিবলৈ পোৱা গৈছে ৷ শিলচৰ বিমানবন্দৰত অসম প্ৰদেশ কংগ্ৰেছৰ নেতৃবৰ্গৰ পৰা অসমৰ শেহতীয়া বান পৰিস্থিতি সন্দৰ্ভত এক প্ৰতিবেদন গ্ৰহণ কৰে ৰাহুল গান্ধীয়ে । প্ৰদেশ কংগ্ৰেছৰ সভাপতি ভূপেন বৰাকে প্ৰমুখ্য কৰি কেবাজনো নেতাই সাক্ষাৎ কৰে ৰাহুলক ৷
ৰাহুলৰ ভ্ৰমণৰ পূৰ্বে জিৰিবামত সংঘৰ্ষ: