ধেমাজি, ১৩ আগষ্ট: সাহস আৰু সজাগতাৰ মেটমৰা বাণী লৈ অকলে খোজকাঢ়ি ভাৰতবৰ্ষ ভ্ৰমণ কৰা কৃষ্ণ নায়ক নামৰ যুৱকজন মঙলবাৰে উপস্থিত হয় ধেমাজিত ৷ একেৰাহে পদযাত্ৰা কৰি চাৰি বছৰৰ ভিতৰত তিনিখন দেশৰ জনসাধাৰণৰ মাজত যোগৰ সজাগতা আৰু পৰিৱেশ সংৰক্ষণৰ লক্ষ্যৰে ওলাই আহিছে কৰ্ণাটকৰ মহীশূৰৰ যোগ শিক্ষক কৃষ্ণ নায়ক । অৰুণাচল প্ৰদেশৰ পৰা আহি তেওঁ ধেমাজিত উপস্থিত হোৱাৰ পাছতে ধেমাজিৰ এজন সচেতন ব্যক্তিয়ে এখন ফুলাম গামোচাৰে আদৰণি জনায় ৷
খোজ কাঢ়ি ভাৰতবৰ্ষ ভ্ৰমণ কৰা কৃষ্ণ নায়ক (ETV Bharat Assam) খোজ কাঢ়িছে ১২ হাজাৰ কিলোমিটাৰ :
২০২২ বৰ্ষৰ ১৬ অক্টোবৰৰ পৰা ধাৰাবাহিকভাৱে পদযাত্ৰা কৰি এইজন যুৱকে ইতিমধ্যে ১২ হাজাৰ কিলোমিটাৰ সম্পূৰ্ণ কৰিছে ৷ তেওঁ ইতিমধ্যে চুবুৰীয়া ৰাষ্ট্ৰ নেপাল আৰু ভূটান ভ্ৰমণ সমাপ্ত কৰাৰ লগতে সমগ্ৰ উত্তৰ পূৰ্বাঞ্চলো ইতিমধ্যে শেষ হোৱাৰ পথত ৷
পৰিৱেশ সংৰক্ষণৰ সজাগতা :
ভাৰতৰ অতি পুৰণি কলা হৈছে যোগ ৷ এই যোগক নৱ প্ৰজন্মৰ তথা সাধাৰণ জনতাৰ মাজত প্ৰচাৰ, প্ৰসাৰ আৰু সজাগতা সৃষ্টিৰ বাবেই এইদৰে পদযাত্ৰা কৰি আছে । তদুপৰি পৰিৱেশ সংৰক্ষণৰ শ্লোগানেৰে পিঠিত এটা বেগ এখন জাতীয় পতাকা লগত লৈ কৃষ্ণ নায়কে এদিনত যিমান দূৰ সম্ভৱ হয় সিমানেই পদযাত্ৰা কৰিছে । তেনেকৈয়ে দিনটোৰ অন্তত কেতিয়াবা যদি আৰক্ষী থানাত, আন কেতিয়াবা তেল ডিপো অথবা কেতিয়াবা প্ৰশাসনৰ সহযোগত আৱৰ্ত ভৱনত নিশাটো পাৰ কৰিছে ৷
কেতিয়া অন্ত পৰিব এই যাত্ৰাৰ ?
অৱশেষত মহীশূৰৰ এইজন যোগ শিক্ষকৰ যাত্ৰাৰ অন্ত পৰিব প্ৰধানমন্ত্ৰী নৰেন্দ্ৰ মোদীক সাক্ষাৎ কৰাৰ পিছতেই । তাৰ পিছত ঘৰলৈ আৰম্ভ কৰিব উভতনি যাত্ৰা ৷ এই যাত্ৰা সমাপ্তৰ পিছত তেওঁ যোগৰ সজাগতাৰ বাবে পদযাত্ৰা কৰা ভাৰতবৰ্ষৰ প্ৰথম ব্যক্তি হিচাপে স্বীকৃতি লাভ কৰিব । মন কৰিবলগীয়া যে উৎকট গৰম, ধুমুহা,বৰষুণ, বানপানী,শীত আদি হাজাৰটা প্ৰাকৃতিক দুৰ্যোগক প্ৰত্যাহ্বান জনাই অকলে খোজকাঢ়ি নিজৰ লক্ষ্যত উপনীত হ'বৰ বাবে অটল হৈ থকা কৃষ্ণ নায়ক সঁচা অৰ্থতেই হৈ পৰিছে 'নায়ক'।
